“O Le Sailia o Siona ma Faamanuiaga a le Alii,” Mo le Malosi o le Autalavou, Set. 2021, 2–5.
Sau, Mulimuli Mai ia te A’u
O Le Sailia o Siona ma Faamanuiaga a le Alii
Mataupu Faavae ma Feagaiga 97:21
O le fausiaina o Siona o se tiutetauave tele, ae e aumaia ai foi ni taui maoae.
O le upumoni muamua ma le sili o le lagi e faapea e alofa le Atua ia i tatou ma Lona finagalo atoa, manatu, mafaufau, ma le malosi atoa. E finagalo o Ia i le mea sili mo i tatou—e faapea lava o Ia i taimi uma, ma o le a Ia faapea lava i taimi uma. E finagalo o Ia ia tatou fiafia; e le mo se taimi puupuu po o se fiafia faafoliga ae e loloto ma o le fiafia e faavavau e pei ona i ai o Ia. E finagalo o Ia ia tatou tuputupu ae ma ausia o tatou gafatia paia o se atalii po o se afafine o le Atua.
Ou te iloa e le o taimi uma e faigofie ai lenei mea. O le toatele o outou e feagai ma faigata ma tofotofoga faaletagata lava ia e mafai ona lofituina i nisi o taimi. Atonu e te vaai i ou lava tulaga, i nisi o tulaga i lou aiga, po o faafitauli i totonu o atunuu i le salafa o le lalolagi, ma mafaufau, “e mafai faapefea ona ou manumalo i lenei paso lavelave o luitau?” O se tasi o tali e ono faateia ai oe: Saili e fausia Siona.
O Fea Siona?
Pe Sili Lou Alofa ia te Au i lo Latou Nei?saunia e David Lindsley
I le talafaasolopito atoa lava na valaau soo ai le Atua i Ona tagata e fausia Siona. O se nofoaga faapitoa lea e mafai ai e tagata o le Atua ona saoloto mai faatosinaga a le lalolagi ma ola ai ma le lotogatasi ma le tasi ma le isi. Ae i lenei tisipenisione sili mulimuli, o Siona e le faatapulaaina i se nofoaga faafaafanua se tasi. I o tatou aso, e mafai ona i ai Siona i soo se mea e maua ai se tagata faamaoni o le Ekalesia a Iesu Keriso o le Au Paia o Aso e Gata Ai. Sa faamatala e le Alii nei tagata o Siona “i le tasi o le loto ma tasi le mafaufau” (Mose 7:18) ma le “loto mama” (Mataupu Faavae ma Feagaiga 97:21). I se faapuupuuga, tatou te le toe mafaufau lava i Siona o le mea o le a tatou ola ai ae o le auala o le a tatou ola ai.
E tele faamanuiaga matagofie o loo teuina mo oe a o e faia le mea sili e fausia ai Siona, ina ia avea ma tagata e manaomia e le Faaola e avea ai oe, ma fesoasoani e saunia le ala mo Lona toe afio mai i le lalolagi. O lena taumafaiga e manaomia ai le galue ma le faatuatua tele, ae o le a aumaia ai foi le fiafia tumau ma le olioli. Ou te faamoemoe o le a e maua lenei mea ia avea ma se mea e siitia ma faafiafiaina ai au! E pei ona aoao mai e Peresitene Russell M. Nelson, e leai lava se mea—e moni lava e leai—lava se mea e mafai ona sili atu ona taua.1 Ma ua tatou maua le avanoa e auai ai! O i tatou o fitafita i laina pito i luma o le upumoni. Tatou te le tauaveina ni pulufana; tatou te tauaveina fusimanu’a! Ua valaauina i tatou e fesoasoani e faamalolo le lalolagi ma saunia se faapotopotoga o tagata i le lalolagi atoa o e e mafai ona afio mai i ai le Faaola.
Alofa i le Atua ma Tuaoi
E mafai ona tatou ausia lenei ituaiga o aiga po o le pitonuu po o le atunuu e ala i le tausia o le poloaiga ia alofa atu. Ma o le tele o lo tatou alolofa i le Atua, o le tele foi lena o lo tatou alolofa i o tatou tuaoi ma vaai i auala e mafai ona tatou faamanuiaina ai i latou. O loo i ai tuaoi e fesoasoani, i e matitiva ina ia siitia i luga, ma le lelei ia faia i soo se mea.
Sa faamatalaina e le Alii i se tasi taimi lenei tiutetauave ma le faamanuiaga i le ala lenei:
“O le mea lea, ia e faamaoni; … ia fesoasoani i e vaivai, sii i luga lima ua tautau i lalo, ma faamalosi tulivae ua vaivai.
“Ma afai e te faamaoni e oo i le iuga o le a e maua se pale o le a ola pea, ma le ola e faavavau i maota ua Ou saunia i le fale o loʼu Tamā” (Mataupu Faavae ma Feagaiga 81:5–6).
Tu Atu mo le Upumoni
Pe a valaau mai le Atua ia i tatou e fausia Siona, ua Ia valaau mai ia i tatou e tutu atu mo Ana aoaoga ma ia tumau mausali i lo tatou faatuatua. O le a le faigofie pe manaia i taimi uma le faia o lenei mea, ae e tatau ona tatou faia—ma le agaalofa, lotomaualalo, malamalama, ma le alofa mama e le aunoa mo isi. I la tatou sailiga e faatuina Siona, o le a mautinoa lava lo tatou feiloai ia i latou o e atonu e le foliga pe laei pe amio talafeagai Pe a tatou feiloai i na tagata, e tatau ona tatou faaeteete e tali atu ma le amiotonu, ae le o le fia amiotonu. I tulaga faapea, o le mea sili e mafai ona tatou faia o le amio lelei lea oi tatou lava ma faaali atu le “alofa faamaoni” mo i latou (tagai i le Mataupu Faavae ma Feagaiga 121:41).
Ou te manao i isi ina ia olioli i faamanuiaga ua ia te au, ae o nisi taimi ou te mafaufau ai pe faapefea ona faasoa atu ia i latou i se auala o le a le faatiga ai pe le malamalama i ai. O lenei mau ua fesoasoani ia te au i ou valaauga uma o le Ekalesia ma tiutetauave patino o se soo o Keriso:
“O lea, e moni Ou te fai atu ia te oulua, ia sii a’e o oulua leo i lenei nuu; tautala atu mafaufauga o le a Ou tuu i o oulua loto, ma o le a le faafememeaiina oulua i luma o tagata;
“Aua o le a tuu atu ia te oulua i le itula tonu lava, ioe, i le minute tonu lava, mea e te lua fai atu ai.
“Ae Ou te tuu atu ia te oulua se poloaiga, ia oulua alaga atu soo se mea lua te alaga atu i lo’u igoa, i le mamalu o le loto, i le agaga o le agamalu, i mea uma.
“Ma Ou te tuu atu ia te oulua le folafolaga lenei, o le tulaga e oo i ai le lua faia o lenei mea, o le a liligi atu le Agaga Paia e molimau i mea uma o soo se mea lua te fai atu ai” (Mataupu Faavae ma Feagaiga 100:5–8).
O Se Faamanuiaga Agai i Luma
Au uo talavou pele, o le a i ai aso faigata o i luma atu, ae o le a iu lava ina ofoofogia lou olaga a o e tuuina atu lou loto i le Atua, alofa i le Alii o Iesu Keriso, ma faia le mea sili e te mafaia e ola ai i le talalelei. Afai e te faamaoni, o le a i ai Siona i soo se mea e te i ai. Ou te faamanuia ia te outou ina ia taliaina ma le fiafia. Ua tele naua mea o loo teuina e le Alii mo oe!