Faanoanoa i Laei

Ata

tamaitai talavou o loo faataitai se ofu

Ata na tusia e Alyssa Gonzalez

A o ou i ai i le aoga tulagalua, sa filifilia au e auai i se faaaliga o laei mo se gaoioiga faaletausaga a le aoga. Sa ou iloa o le a filifili e le taitai faamaopoopo ni ofu e le talafeagai, o lea sa ou fai atu ai ia te ia o le a ou le auai pe afai o le ofu ou te ofuina e le tauagafau. Sa fai mai o ia, o le a lelei mea uma.

Ina ua matou o ma au uo e siaki o matou ofu, sa ou le mautonu. E ui i le mea na tau mai e le taitai faamaopoopo ia te au, o ofu uma o le faafeagai o tulaga faatonuina o laei ma foliga vaaia i le tamaitusi o le Mo le Malosi o le Autalavou . Ona sa foliga mai sa leai se fofo, sa ou faataitai ai loa se tasi o ofu le tauagafau. Sa ou manao e foliga aulelei, ae ina ua ou ofuina lena ofu, sa ou le lagonaina le o au moni lea. Sa ou mafaufau, “O le a sou lagona i le i ai i le afioaga o le Alii i lenei ituaiga o ofu?”

Sa ou mafaufau pe faapefea ona ou aluese mai lenei tulaga. Mulimuli ane, sa ou maua ai le ofu siva o lou uso matua, lea na ausia tulaga faatonuina a le Alii. Ina ua ou tau atu i au uo o le a ou faaaogaina lou lava ofu, sa mafai ona ou iloa mai o latou foliga na latou manatu o le a sili atu ona ou aulelei i le ofu e le talafeagai. O le mea e lelei ai, sa fai mai le taitai faamaopoopo e le afaina le ofuina o le ofu e tauagafau.

Sa ou fiafia, ma sa ou lagonaina le toa. Sa ou le popole i manatu o au uo. Sa ou maua se auala e auai ma se ofu matagofie ma tauagafau. Sa ou faafetai ona sa ou maua le lototele e tausisia ai le maualuga o ou tulaga faatonuina, aemaise lava ona e le faigofie pe lauiloa.

Jessika S., Initonesia