“O le a Tau e le Atua Au Taua — i Lana Ala,” Mo le Malosi o le Autalavou, Set. 2021, 15–17.
Sau, Mulimuli Mai ia te A’u
O le a Tau e le Atua Au Taua —i Lana Ala
Sa aoaoina e le Au Paia anamua se mea se tasi pe lua e uiga i ala o le Atua.
Tolauapiga a Siona, saunia e Jidith A. Mehr
Faatasi ai ma se vaega faatupu vevesi matamataita e silia ma le 300 na folafola mai e faaumatia i latou i le taeao, sa faamoemoe ma tatalo le vaega o le Au Paia o e na faatasi i le Tolauapiga a Siona mo se vavega.
I lalo o le taitaiga a Iosefa Samita, sa savavali ai le Tolauapiga a Siona mo le tele o vaiaso mai Ohaio i Misuri. O nei tagata o le Ekalesia sa faamoemoe e fesoasoani i le Au Paia o e na tutuli ese mai le Itumalo o Siakisone, Misuri, ISA, ina ia toe maua o latou laueleele. Ae sa latou feagai ma le taufaamatau ma le tetee i le taimi atoa o la latou savaliga. Ma o lenei, ua toe faamatauina latou e se isi vaega o tagata faatupu faalavelave.
O le vavega na tatalo i ai le Au Paia o le Tolauapiga a Siona e le o toe mamao ona taunuu mai lea. Na oo mai i le tulaga o ni ao pogisa o loo faapotopoto i le nofoaga mamao. Na oso mai se afa matautia i itu uma ma tau’ai mai ni timuaisa tetele. Sa taofia e le afa ia le au faatupu faalavelave.
“Sa foliga mai e peiseai ua alu atu le poloaiga o le tauimasui mai le Atua e uiga i taua e puipui ana auauna mai le faatafunaga o o latou fili,” o loo faamatala ai e le talafaasolopito a Iosefa Samita. “Ona pa’ū ai lea o le uatoa i luga o i latou, a e le o i matou, ma sa matou le mafatia i se mea, sei vagana ai nisi o o matou faleie na lelea i lalo ma susu ai, ae o o matou fili na pūpū o latou pulou ma faaleagaina, e oo lava i le gauia o a latou fana ma na sosola ese a latou solofanua.”1
O uatoa faaleagaina na o se tasi lea o vaega o le afa. Sa matuai malosi le maligi o timuga ma o le Fishing River, le vaitafe na vavae ai vaega e lua, na pa i luga toeitiiti 40 futu (12 mita) le loloto. Sa na o tapuvae na oo i ai le loloto i le taeao.
Sa folafola atu e le Alii i tagata o le Tolauapiga a Siona, “o le a ou tauina a outou taua” (Mataupu Faavae ma Feagaiga 105:14). A tupu lena mea, e leai se masalosalo po o fea le itu o le a manumalo.
Vavega o Aso Nei
O nisi taimi pe a e faitau i tala e pei o lenei, atonu e te mafaufau pe aisea e foliga mai ai e le tupu ni vavega maoae ia te oe i au tauiviga.
Sa faasoa mai talu ai nei e Elder Jeffrey R. Holland o le Korama a Aposetolo e Toasefululua nisi o malamalamaaga e mafai ona fesoasoani. Na ia saunoa mai: “Faamolemole ia malamalama o Ia e le moe e lē tautulemoe lava e popole mo le fiafia ma le faaeaga mulimuli o Lana fanau e sili atu i lo mea uma e ao ona faia e se tagata paia. O Ia o le alofa lē pona, o le tagata ua faamamaluina, ma o Lona suafa o le Tamā Alofa Mutimutivale.
“Ia, afai o le tulaga lea,’ e mafai ona e faapea, ‘pe lē tatau ea e Lona alofa ma le alofa mutimutivale ona faigofie ona vaeluaina ai o tatou Sami Ulaula patino ma faataga i tatou e savavali atu i o tatou puapuaga i luga o le eleele matūtū?’”
I se isi faaupuga, afai na tau e le Atua ia taua mo Ana fanau i le taimi ua tuanai, aisea la e le faia ai i le taimi nei? Aisea e le soloiesea ai faamai uma? Aisea e le faia ai se mutaaga i taua ma le fiaaai ma le puapuagatia i le lalolagi atoa?
Po o le aisea e le taofia ai lena tagata saua lea e le mafai na tuua oe? Pe fesoasoani i lou aiga ia sili atu le fealofani?
Na aoao atili mai Elder Holland: “ O le tali i fesili faapena o le “Ioe, e mafai e le Atua ona faia vavega i le taimi lava lena, ae i se taimi vave pe mulimuli ane tatou te aoaoina ai o taimi ma vaitau o la tatou malaga faaletino e na o Ia lava e faatonutonuina.” Na te faatautaia mea e tutupu ma le taimi e tutupu ai i olaga eseese o i tatou uma taitoatasi. ”2
Pe a e mulimuli i poloaiga a le Atua, ua ia te oe le aia tatau mo le fesoasoani a le Atua. Ae e leai se tasi o i tatou e mafai ona filifili pe faapefea pe o afea e taunuu mai ai lena fesoasoani.
Faamanuiaga e lei faamoemoeina
Sei o tatou toe foi atu i le Tolauapiga a Siona mo sina taimi. O le vavega i le Fishing River sa mautinoa lava le matautia. Ma sa le na o le pau lea o le vavega na vaai i ai tagata o le Tolauapiga a Siona i le taimi o la latou savaliga. Ae o le a e faitau i le Sau, Mulimuli Mai ia te Au ma aoao i le seminare i lenei masina, o mea e lei taunuu i le ala na fuafuaina e le Au Paia.
Sa latou manatu o le uiga atoa o le Tolauapiga a Siona o le fesoasoani lea ia toe maua mai fanua i le Itumalo o Siakisone ia na gaoia mai le Au Paia e ni tagata faatupu faalavelave.
Pe na toe maua mai e le Au Paia o latou laueleele? Leai.
Pe na puapuagatia le Au Paia i la latou savaliga toeitiiti atoa le 900-maila (1,448-kilomita) i Misuri? Ia, ioe. O nisi taimi na matuai tele naua. I le tulaga sili ona leaga, o se pepesi mai o le kolela na salalau atu i le tolauapiga ma feoti ai le 13.
I le vaai atu i ai, atonu e foliga mai o le taumafaiga atoa lava o se toilalo. Ae e le o le ala lena na vaai i ai e na savavali i le tolauapiga. Na saunoa Polika Iaga i lenei aafiaga, “Sa matuai lelei lo’u totogi—o le totogi faatasi ma se tului tele lava—ioe … o lea sa faapea ona faatumulia ai la’u fuataga i le poto ua ou mauaina e ala i le malaga faatasi ma le Perofeta [Iosefa Samita].”2
O le tele o isi tagata o le Tolauapiga a Siona sa talanoa foi e uiga i lesona na aoaoina ma le taua o le savaliga. Na saunoa foi le Perofeta o Iosefa Samita lava ia: “Uso e, o nisi o outou ua feita ia te a’u, ona tou te lei tau i Misuri; ae sei ou ta’u atu ia te outou, sa le’i finagalo le Atua tou te tau. Sa le mafai ona ia faatulagaina lona malo … sei vagana ai ua ia ave ona taitai] mai se tino o tagata o e na ofoina atu o latou ola, ma o e na faia se osigataulaga tele e pei o Aperaamo.”4
Tolauapiga a Siona na saunia e C.C.A. Christensen
Atonu e le i ai se taunuuga o lo latou faatuatua i le toefaafoiina mai o o latou fanua. Ae sa matuai faamanuiaina i latou i isi auala. O se mamanu lena e te ono matauina foi i lou olaga. Ma o le mea e fesoasoani le Atua ia avea ai i tatou e ala mai o tatou tofotofoga e masani lava o se vavega e sili atu nai lo Lona laveaiina o i tatou mai o tatou tofotofoga.
O le Manumalo Moni o le Atua
A o e suesue i olaga o le Au Paia anamua, e mafai ona e iloa atu le faatosinaga a le Atua i le tele o taimi. Ua e faitau e uiga i faamanuiaga maoae. E te maua foi taimi o tauiviga loloto. Ae mo i latou o e na faalagolago i le Atua e oo i le iuga, sa mautinoa lava lo latou taui e faavavau.
Pe a e mulimuli i le Atua ma faalagolago ia te Ia, o le a Ia tauina au taua ma tuuina atu vavega e te manaomia! O nei vavega o le a oo mai i Lana lava ala ma le taimi, ae o le taunuuga e mautinoa lava. Soo se tofotofoga lava o le a iu ina foia—i lenei olaga po o le isi. E tutusa lava le taua, a e mulimuli ia te Ia, o le a e le savali lava na o oe. “O lea, ia faamaoni; ma faauta, ma tagai, ua Ou faatasi ma outou e oo lava i le iuga” (Mataupu Faavae ma Feagaiga 105:41).