« ការព្រួយបារម្ភចំពោះរ៉ូប » ដើម្បីកម្លាំងនៃយុវជន ខែ កញ្ញា ឆ្នាំ ២០២១ ទំព័រ ៨ ។
គ្រឹះ ដ៏មាំមួន
ការព្រួយបារម្ភចំពោះរ៉ូប
រចនារូបភាពដោយ អាលីស្សា ហ្គន់សាឡេស
កាលខ្ញុំរៀននៅវិទ្យាល័យ ខ្ញុំត្រូវបានគេជ្រើសរើសឲ្យចូលរួមក្នុងការបង្ហាញម៉ូតសម្លៀកបំពាក់មួយ សម្រាប់ព្រឹត្តិការណ៍ប្រចាំឆ្នាំរបស់សាលារៀន ។ ខ្ញុំបានដឹងថា អ្នកសម្របសម្រួលនឹងជ្រើសរើសរ៉ូបដែលមិនរមទម្យឲ្យខ្ញុំ ដូច្នេះខ្ញុំបានប្រាប់គាត់ថា ខ្ញុំនឹងមិនចូលរួមទេ ប្រសិនបើរ៉ូបដែលខ្ញុំត្រូវពាក់នោះមិនរមទម្យ ។ គាត់បាននិយាយថា វានឹងមិនអីទេ ។
ពេលមិត្តខ្ញុំ និងខ្ញុំបានទៅមើលរ៉ូបរបស់យើង នោះខ្ញុំភាំងតែម្ដង ។ គឺមិនដូចជាអ្វីដែលអ្នកសម្របសម្រួលបានប្រាប់ខ្ញុំនោះទេ រ៉ូបទាំងអស់គឺផ្ទុយស្រឡះពីបទដ្ឋាននៃការស្លៀកពាក់ និង អាការៈខាងក្រៅដែលមាននៅក្នុងកូនសៀវភៅ ដើម្បីកម្លាំងនៃយុវជន ។ ដោយសារវាហាក់ដូចជាគ្មានដំណោះស្រាយផ្សេងទៀត នោះខ្ញុំបានសាក ល-រ៉ូបដែលមិនរមទម្យមួយ ។ ខ្ញុំចង់មើលទៅស្អាត ប៉ុន្ដែពេលខ្ញុំស្លៀករ៉ូបនោះ ខ្ញុំមានអារម្មណ៍ថា ខ្ញុំមិនមែនជាខ្ញុំទេ ។ ខ្ញុំបានឆ្ងល់ថា « តើខ្ញុំនឹងមានអារម្មណ៍យ៉ាងណា បើខ្ញុំស្លៀករ៉ូបបែបនេះនៅក្នុងវត្តមានរបស់ព្រះអម្ចាស់នោះ ? »
ខ្ញុំបានគិតពីវិធីដែលខ្ញុំអាចគេចចេញពីស្ថានភាពនេះ ។ ទីបំផុត ខ្ញុំបានរកឃើញរ៉ូបទៅជប់លៀងរបស់បងស្រីខ្ញុំ ដែលត្រូវគ្នានឹងបទដ្ឋានរបស់ព្រះអម្ចាស់ ។ ពេលខ្ញុំប្រាប់មិត្តខ្ញុំថា ខ្ញុំនឹងស្លៀករ៉ូបរបស់ខ្ញុំផ្ទាល់ នោះខ្ញុំអាចដឹងតាមទឹកមុខរបស់ពួកគេបានថា ពួកគេគិតថា ខ្ញុំនឹងមើលទៅស្អាតជាង បើខ្ញុំស្លៀករ៉ូបមិនរមទម្យនោះ ។ សំណាងល្អ អ្នកសម្របសម្រួលបាននិយាយថា វាមិនអីទេ បើខ្ញុំស្លៀករ៉ូបរមទម្យនោះ ។
ខ្ញុំធូរចិត្តណាស់ ហើយខ្ញុំមានអារម្មណ៍ថាមានទំនុកចិត្ត ។ ខ្ញុំមិនខ្វល់នឹងអ្វីដែលមិត្តរបស់ខ្ញុំគិតនោះទេ ។ ខ្ញុំរកឃើញរបៀបដើម្បីចូលរួមដោយប្រើរ៉ូបដ៏ស្រស់ស្អាត និង រមទម្យ ។ ខ្ញុំមានអំណរគុណ ដែលខ្ញុំមានចិត្តក្លាហានដើម្បីរក្សាបទដ្ឋានរបស់ខ្ញុំឲ្យបានខ្ពស់ ជាពិសេសពេលវាមិនងាយស្រួល ឬមិនសូវល្បី ។
ចេស៊ីកា អេស ប្រទេសឥណ្ឌូនេស៊ី