« ជម្រើស » ដើម្បីកម្លាំងនៃយុវជន ខែ កញ្ញា ឆ្នាំ ២០២១ ទំព័រ ១២–១៤ ។

ជម្រើស

ដោយប្រធាន ដាល្លិន អេក អូក

ទីប្រឹក្សាទីមួយក្នុងគណៈប្រធានទីមួយ

ច្រើនឆ្នាំកន្លងទៅ អ្នកមានសិទ្ធិអំណាចទូទៅរបស់យើងម្នាក់បានចែកចាយដំណើររឿងដ៏ពិបាកនេះ ៖

ជនជាតិឆេរ៉ូកេដ៏វាងវៃម្នាក់ នៅក្នុងកុលសម្ព័ន្ធជនជាតិអាមេរិកាំងដើមមួយនៅសហរដ្ឋអាមេរិក បានប្រាប់រឿងប្រៀបប្រដូចអំពីជីវិតដល់ចៅប្រុសរបស់គាត់ ។ ជីតាបានពោលថា « នៅក្នុងខ្លួនតា មានជម្លោះដ៏ព្រៃផ្សៃមួយរវាងសត្វឆ្កែចចកពីរ » ។ « ឆ្កែចចកមួយអាក្រក់ ៖ ពោរពេញដោយកំហឹង និងការច្រណែន ការស្រណោះស្រណោក និងទុក្ខសោក ការលោភលន់ និងការកុហក ។ ឆ្កែចចកមួយទៀតល្អ ៖ ពោរពេញដោយសន្ដានចិត្តល្អ និងចិត្តមេត្តាករុណា ការបន្ទាបខ្លួន និងសេចក្ដីពិត សេចក្ដីស្រឡាញ់ និងអំណរ ។ ជម្លោះនោះមាននៅក្នុងខ្លួនយើងម្នាក់ៗ » ។

ចៅប្រុសបានសួរថា « តើឆ្កែចចកមួយណានឹងឈ្នះ ? »

ជីតាបានឆ្លើយដោយវាងវៃថា « គឺឆ្កែចចកដែលចៅឲ្យចំណី » ។^១

រឿងប្រៀបប្រដូចអំពីឆ្កែចចកទាំងពីរនេះបង្ហាញពីសេចក្ដីពិតដ៏អស់កល្បមួយ ។ បុត្រាបុត្រីរបស់ព្រះកើតមកមានសិទ្ធិជ្រើសរើសរវាងសេចក្ដីល្អ និងសេចក្ដីអាក្រក់ ។ ការផ្ទុយអនុញ្ញាតឲ្យយើងរើសយកជម្រើសដ៏មានអត្ថន័យ និងសុចរិត ។ ព្រះគម្ពីរមរមនបង្រៀនសេចក្ដីពិតនេះជាភាសាបទគម្ពីរដូចតទៅ ៖ « ដ្បិតជាការចាំបាច់ ត្រូវតែមានការផ្ទុយចំពោះរឿងសព្វសារពើរ » ។^២

ផែនការរបស់ព្រះវរបិតាសួគ៌យើងប្រទានដល់យើងយ៉ាងហោចណាស់អំណោយទានចំនួនពីរ ដើម្បីជួយក្នុងការជ្រើសរើសទាំងនេះ ៖ ( ១ ) ទ្រង់ប្រទានព្រះវិញ្ញាណបរិសុទ្ធដល់យើងដើម្បីណែនាំពីជម្រើសរបស់យើង និង ( ២ ) ទ្រង់ប្រទានព្រះអង្គសង្គ្រោះដល់យើង ដែលដង្វាយធួនរបស់ទ្រង់បានធ្វើឲ្យយើងអាចប្រែចិត្តបាន ហើយដកចេញឥទ្ធិពលនៃជម្រើសមិនល្អចេញ—នៅពេលឥទ្ធិពលនោះបានឲ្យចំណីដល់ឆ្កែចចកអាក្រក់ ។

I. ការប្រែចិត្ត និង ការទទួលស្គាល់

នៅពេលខ្ញុំបាននិយាយទៅកាន់យុវវ័យ មានប្រធានបទដែលពួកគេសួរញឹកញាប់ខ្លាំងមួយ គឺអំពីការប្រែចិត្ត ។ « តើក្មួយអាចដឹងដោយរបៀបណា ថាពេលណាក្មួយបានប្រែចិត្តល្មមគ្រប់គ្រាន់ហើយនោះ ? » « តើក្មួយអាចដឹងដោយរបៀបណា ថាពេលណាក្មួយពិតជាទទួលបានការអភ័យទោសមែននោះ ? » ចម្លើយចំពោះសំណួរទាំងនេះកើតមានតាមរយៈព្រះវិញ្ញាណបរិសុទ្ធ ជាសមាជិកនៃក្រុមព្រះ ដែលនាំសារលិខិតមកពីស្ថានសួគ៌ ។

អំណោយទាននៃការប្រែចិត្តត្រូវបានហៅថា « ដំណឹងល្អនៃព្រះសិក្ខាបទ » ។^៣ វាអនុញ្ញាតឲ្យយើងលុបចោលនូវឥទ្ធិពលនៃជម្រើសអាក្រក់ ដែលបានឲ្យចំណីដល់ឆ្កែចចកទុច្ចរិត ហើយបន្ថយសមត្ថភាពរបស់យើងដើម្បីស្ដាប់តាមការបំផុសគំនិតនៃព្រះវិញ្ញាណបរិសុទ្ធ ។ ការប្រែចិត្តរួមមានការទទួលស្គាល់ថា យើងបានធ្វើខុស បោះបង់កំហុសនោះ ហើយតាំងចិត្តថានឹងបង្វែរដួងចិត្តយើងទៅកាន់ព្រះ និងកាន់តាមព្រះបញ្ញត្តិរបស់ទ្រង់ ។ នៅពេលយើងប្រែចិត្ត នោះយើងទាញយកព្រះចេស្ដានៃដង្វាយធួនរបស់ព្រះយេស៊ូវគ្រីស្ទ ដែលនឹងបង្កើនការកោតសរសើរ និងសេចក្ដីស្រឡាញ់របស់យើងចំពោះទ្រង់ ក្នុងនាមជាព្រះអង្គសង្គ្រោះរបស់យើង ។

តម្រូវការដើម្បីមានការប្រែចិត្តមិនកំណត់តែលើអំពើបាបធ្ងន់ធ្ងរ ដែលចាំបាច់ត្រូវសារភាពចំពោះប៊ីស្សពនោះទេ ។ ការប្រែចិត្តគឺជារឿងចាំបាច់រាល់ថ្ងៃ ។ ការប្រែចិត្តភាគច្រើនទាក់ទងនឹងការទទួលស្គាល់របស់បុគ្គលម្នាក់ៗថា យើងបានធ្វើខុស រួចប្ដេជ្ញាចិត្តថានឹងផ្លាស់ប្ដូរ ហើយព្យាយាមធ្វើវាឲ្យត្រឹមត្រូវវិញ ចំពោះអ្វីដែលយើងបានធ្វើខុសនោះ ។ ទាក់ទងនឹងរឿងប្រៀបប្រដូចអំពីសត្វឆ្កែចចកពីរនោះ ការប្រែចិត្តរួមមានការឈប់ឲ្យចំណីទៅឆ្កែចចកទុច្ចរិត ទោះជាចំណីតិចតួចក្ដី ដូចជានៅពេលដែលយើងជ្រើសរើសដើម្បីខឹង ឬ ច្រណែន ។ យើងក៏ត្រូវប្រែចិត្ត ( ផ្លាស់ប្ដូរ ) ផងដែរ នៅពេលយើងបានជ្រើសរើសបង្ហិនពេលវេលាដែលព្រះបានប្រទានឲ្យ ទៅលើសកម្មភាពមួយចំនួន ដែលគ្មានសក្ដានុពលដើម្បីធ្វើឲ្យយើងក្លាយជាមនុស្សកាន់តែប្រសើរឡើង ។

II. ការទទួលស្គាល់ភាពខុសគ្នាដ៏សំខាន់មួយ

លទ្ធផលនៃការប្រែចិត្តដ៏អស្ចារ្យគឺ ការបង្កើតឲ្យមានភាពស័ក្ដិសមឡើងវិញ ដើម្បីទទួលបានការបំផុសគំនិតមកពីព្រះវិញ្ញាណបរិសុទ្ធ ដែលជួយយើងឲ្យធ្វើការជ្រើសរើសដ៏វាងវៃ ហើយបំពេញចិត្តយើងដោយអំណរ ។ យុវវ័យជាច្រើនក៏ឆ្ងល់ផងដែរថា « តើខ្ញុំដឹងថា តើការបំផុសគំនិត ឬ ចម្លើយដែលខ្ញុំទទួលបាននោះ ពិតជាមកពីព្រះអម្ចាស់មែនដែរឬទេ ហើយមិនមែនជាអ្វីដែល ខ្ញុំ ចង់បានដោយរបៀបណា ? »

ដើម្បីដឹងថាតើការបំផុសគំនិតមួយ គឺជាសារលិខិតមកពីព្រះវិញ្ញាណបរិសុទ្ធឬអត់ ឬគ្រាន់តែជាបំណងប្រាថ្នាផ្ទាល់ខ្លួន នោះយើងត្រូវអនុវត្តសេចក្ដីពិតចំនួនបី ។

នៅក្នុងពិធីបរិសុទ្ធសាក្រាម៉ង់ មានសេចក្ដីសន្យាថា យើងនឹង « អាចបានព្រះវិញ្ញាណរបស់ទ្រង់គង់នៅជាមួយនឹង [ ពួកយើង ] ជាដរាប » នៅពេលយើងសន្យាថា យើងនឹងលើកដាក់ព្រះនាមរបស់ទ្រង់មកលើខ្លួនយើង ហើយចងចាំទ្រង់ជានិច្ច និងកាន់តាមបទបញ្ញត្តិរបស់ទ្រង់ជានិច្ច ។^៤ នៅពេលយើងខកខានមិនបានរក្សាសេចក្ដីសន្យាទាំងនេះ នោះយើងងាយនឹងភាន់ច្រឡំពីប្រភពនៃការបំផុសគំនិតដែលយើងទទួលបាន ។
ជាធម្មតា ការបំផុសគំនិតមកពីព្រះអម្ចាស់ទទួលបាននៅក្នុងគ្រាដ៏ស្ងប់ស្ងាត់ ឬនៅពេលកំពុងថ្វាយបង្គំ ការសិក្សាព្រះគម្ពីរ ឬការអធិស្ឋាន ឬអំឡុងពេលបំពេញការបម្រើតាមការហៅរបស់យើង មិនមែននៅពេលដេញតាមប្រយោជន៍ដ៏អាត្មានិយម ឬពេលហ៊ុមព័ទ្ធដោយសកម្មភាពខាងលោកិយនោះទេ ។
ជាចុងក្រោយ យើងត្រូវយកចិត្តទុកដាក់ជាពិសេស ចំពោះការដឹកនាំឲ្យផ្លាស់ប្ដូររបៀបដែលយើងកំពុងតែប្រព្រឹត្តនេះ ។ ចំណាប់អារម្មណ៍ឲ្យផ្លាស់ប្ដូរផ្លូវនេះ អាចកាន់តែទុកចិត្តបាន ជាងចំណាប់អារម្មណ៍ឲ្យដេញតាមអ្វីមួយដែលយើងចង់ធ្វើរួចហើយនោះ ។

III. ភាពត្រឹមត្រូវនៅតែជាភាពត្រឹមត្រូវ

មិត្តវ័យក្មេងជាទីស្រឡាញ់របស់ខ្ញុំអើយ ក្មួយកំពុងតែធំដឹងក្ដីនៅក្នុងពិភពលោកមួយផ្សេងពីឪពុកម្ដាយ និងជីដូនជីតារបស់ក្មួយៗធ្លាប់មានបទពិសោធន៍ ។ រឿងនោះធ្វើឲ្យវាសំខាន់ជាពិសេសសម្រាប់ក្មួយៗដើម្បីចងចាំថា គុណតម្លៃពីបុរាណ និងបទបញ្ញត្តិទាំងឡាយនៅតែមានសុពលភាពដដែល ។ យើងគឺជាបុត្រាបុត្រីរបស់ព្រះ ហើយបទបញ្ញត្តិរបស់ទ្រង់នៅតែសំខាន់ដដែល មិនថាយើងធ្វើដំណើរដោយរទេះគោ ឬយាន្ដអវកាស ហើយមិនថាយើងទាក់ទងគ្នាដោយសំឡេង ឬដោយផ្ញើសារនោះទេ ។

ភាពត្រឹមត្រូវនៅតែជាភាពត្រឹមត្រូវ ហើយភាពខុសឆ្គងគឺនៅតែជាភាពខុសឆ្គង ទោះជាវានិយាយ ឬធ្វើដោយតារាភាពយន្ដ តារាទូរទស្សន៍ ឬកីឡាករល្បីក្ដី ។ បទដ្ឋាននៅក្នុងព្រះគម្ពីរ ការបង្រៀនទាំងឡាយរបស់ព្យាការីដែលនៅរស់ និងគុណតម្លៃនៅក្នុងកូនសៀវភៅ ដើម្បីកម្លាំងនៃយុវជន នៅតែជាការដឹកនាំដ៏ល្អបំផុតរបស់ក្មួយៗ សម្រាប់ការជ្រើសរើសផ្ទាល់ខ្លួនទាក់ទងនឹងភាពបរិសុទ្ធខាងផ្លូវភេទ សុខភាពខាងរាងកាយ ភាពស្មោះត្រង់ ការស្លៀកពាក់ និងអាការៈខាងក្រៅ ព្រមទាំងប្រធានបទផ្សេងទៀតទាំងអស់នៅក្នុងសៀវភៅនោះ ។ សូមធ្វើតាមបទដ្ឋានទាំងនោះដោយស្មោះត្រង់ ហើយក្មួយៗនឹងមានពរជ័យ ។ ប្រធាន រ័សុល អិម ណិលសុន បានបង្រៀនយើងថា « កូនសៀវភៅដែលមានចំណងជើងថា ដើម្បីកម្លាំងនៃយុវជន គួរតែជាបទដ្ឋាន របស់ក្មួយៗ ។ វាគឺជាបទដ្ឋានដែលព្រះអម្ចាស់រំពឹងឲ្យយុវវ័យរបស់ទ្រង់ទាំងអស់លើកវាឡើង » ។^៥

នៅក្នុងការប្រជុំធម្មនិដ្ឋានយុវវ័យទូទាំងពិភពលោកដ៏មានអានុភាពរបស់លោក ព្យាការីរបស់យើងបានសន្យា ៖

« ប្រសិនបើក្មួយនឹងប្រព្រឹត្តដោយស្មោះសរ និងដោយខ្ជាប់ខ្ជួននូវកិច្ចការខាងវិញ្ញាណ ដែលចាំបាច់ដើម្បីអភិវឌ្ឍជំនាញដ៏សំខាន់ខាងវិញ្ញាណ ដើម្បីរៀនពីរបៀបស្ដាប់តាមការខ្សឹបនៃព្រះវិញ្ញាណបរិសុទ្ធ នោះក្មួយៗនឹងមានការដឹកនាំ ទាំងអស់ ដែលក្មួយនឹងត្រូវការក្នុងជីវិតរបស់ក្មួយៗ ។ ក្មួយនឹងទទួលចម្លើយចំពោះសំណួររបស់ក្មួយ តាមរបៀប និងពេលវេលារបស់ព្រះអម្ចាស់ផ្ទាល់ » ។^៦

ខ្ញុំសូមសន្យាដូចលោកបានសន្យាដែរ ហើយខ្ញុំថ្លែងទីបន្ទាល់អំពីព្រះអង្គសង្គ្រោះព្រះយេស៊ូវគ្រីស្ទរបស់យើងថា ការបង្រៀន និងដង្វាយធួនរបស់ទ្រង់បានធ្វើឲ្យអ្វីៗទាំងអស់កើតឡើងបាន នៅក្នុងព្រះនាមនៃព្រះយេស៊ូវគ្រីស្ទ អាម៉ែន ៕