O le Autu ma A’u

Ua faasoa mai e le autalavou pe o faapefea ona latou ola i upu o Autu a Tamaitai Talavou ma le Korama a le Perisitua Arona

E Mafai Ona Ou Lagonaina Lona Alofa

Saunia e Olivia Roberts

“O a’u o se afafine faapelepele a ni matua faalelagi, e i ai se natura paia ma se taunuuga e faavavau.”

ata

I lo‘u tausaga muamua i le aoga maualuga, sa pulea ai lo’u olaga e se faaletonu o le taumafa. Sa ou ta‘u atu i tagata uma ou te le o afaina ina ia latou le faia ni fesili, ae sa ou maalili, vaivai, ma lelava i taimi uma mai le leai o se meaai. Ua leai so‘u fiafia i mea sa masani ona ou fiafia i ai. Sa oo foi ina ou le toe tatalo i le Tama Faalelagi. Sa ou lagona le tausalaina ona o le le avea ma tagata sa ou manatu e tatau ona avea ai au.

I le taimi muamua, sa ou musu e talitonu sa i ai so‘u faafitauli. Ae na iu lava ina ou maua se lagona malosi e tatau ona ou tau atu i lau uo mamae e uiga i ou tauiviga. Ou te lei iloaina o le talanoa atu i se tasi ou te faatuatuaina o le a faasaoina ai lou ola.

Sa ta‘u atu e la’u uo i o‘u matua le mea o loo tupu, ona o le popole mo a‘u. Ina ua iu ina ou ta‘u atu ia i laua le meamoni, sa ou lagonaina le malosi sili atu o le alofa o le Tama Faalelagi nai lo se isi lava taimi muamua. Sa susulu mai e ala i le alofa na faaali mai e o‘u matua ma isi a’u uo ma aiga ia te a‘u. O la latou lagolago faaKeriso na fesoasoani ou te talia ai sa i ai sou faaletonu o le taumafa—ma faatasi ai ma le fesoasoani a le Tama Faalelagi, o le a ou manuia ai.

O le amataina o lo‘u toe malosi o le malaga aupito sili lea ona faigata sa ou faia. Sa ou i ai i le falemai ina ua tuua le aoga i aso uma mo fautuaga ma togafitiga. Ina ua amata ona lagona le leai o se faamoemoe i le ala, sa ou maua le mafanafana e ala i le tatalo ma le faitauina o a‘u tusitusiga paia.

O loo ou tauivi pea ma o‘u faaletonu o le taumafa, ae ua le toe puleaina ai lo’u olaga. E malamalama lo‘u Tama Faalelagi i o’u tofotofoga, lo‘u lototiga, ma lo’u tausalaina, ma ua ou iloa nei ou te lei mafaia na o a‘u. Pe a ou vaai ia te au lava e ala i fofoga o le Tama Faalelagi, ou te lagonaina lou taunuuga e faavavau. E mafai ona ou lagonaina Lona alofa mo au—o se alofa e mafai ona fesoasoani ia te au e faatoilalo ai soo se mea.

E alala le tusitala i Alapama, ISA.