Fesili ma Tali

O nisi taimi ou te lagona ai e leai se mea ou te faia e taua. E faapefea ona ou faia se eseesega?”

“Talitonu i le Atua ma oe lava ia. O loo e faia se lelei sili atu i lo le mea o loo e mafaufau o loo e i ai.”

Elder Jeffrey R. Holland o le Korama a Aposetolo e Toasefululua, konafesi aoao Oke. 2015 (Ensign po o le Liahona, Nov 2015, 50).

Manatua

“Soo se taimi lava ou te faia ai soo se auaunaga, ou te tusia i lalo i se fasi pepa laitiiti ma tuu i totonu o se fagu. Soo se taimi lava ou te lagona ai e pei ou te le taua, ou te tatalaina le fagu ma faitau i mea ofoofogia uma na ou faia. E fesoasoani lenei mea ou te manatua ai sa ou faia se eseesega i le olaga o se tasi, e tusa lava pe laitiiti.”

Alexandra M., 14, Kalefonia, ISA

Avea Atili faapei o Keriso

“I taimi o le masalosalo, ou te maua ai le sulufaiga i le faataitaiga a Iesu Keriso. Pe a tatou galulue ma auauna atu e pei o Keriso, e tusa lava po o le a le laitiiti, o loo tatou faaali atu lo tatou alolofa ia te Ia ma le Tama Faalelagi. O lenei mea o le a aumaia ia i tatou le filemu tumau ma le olioli.”

Laura V., 18, Chile

Auaunaga Faigofie

“Ia avea pea oe ma se faatosinaga lelei mo tagata o loo siomia oe. O le faasoaina atu o se savali faigofie o le talalelei pe na o le faalogologo foi i se tasi e mafai ona ootia ai o latou loto ma faafiafiaina ai i latou. O le a fiafia foi lo tatou Tama Faalelagi, ma faafetai ia i tatou mo le fesoasoani i Lana galuega.”

Daniela M., 15, Honduras

Meafaigaluega i Ona Aao

“E faigata ona vaai i o tatou aafiaga i nisi taimi. Ae a tatou faia se faataitaiga o ni soo o Iesu Keriso ma tauivi e tausia a tatou feagaiga, o le a faamanuiaina i tatou e le Alii. O le a avea i tatou ma meafaigaluega i Ona aao e aapa atu ai i loto o isi tagata. E mafai ona tatou faia se suiga i se isi tagata, e tusa lava pe tatou te le iloaina o loo tupu.

José C., 14, Egelani

E Taua Au Faatinoga

“O mea uma e te faia e taua. Ou te taumafai i le mea sili e fai mea uma ma le manatu lelei ma mulimuli i tulagaaao o Keriso. Pe o le faamalo atu i se tasi o le au, faamafanafanaina o se tei, pe faafeiloai atu foi i se tuaoi, o mea laiti uma tatou te faia i lenei lalolagi o le a fesoasoani e faia se eseesega mo le galuega tele a le Alii!”

Savannah K., 14, Tennessee, ISA

O tali ua faamoemoe e mo le fesoasoani ma ni manatu, ae e le o se faalauiloaga aloaia o aoaoga faavae o le Ekalesia.

O Le A Sou Manatu?

“E mafai faapefea ona ou lagonaina atili le Agaga pe a ou lagonaina foi le popole po o le atuatuvale?”

Auina mai lau tali ma le ata ae lei oo i le aso 15 o Mati, 2022.

Alu i le ftsoy.ChurchofJesusChrist.org ma kiliki le “Auina Atu Lau Galuega.” Saini e alu i totonu i lau Faitotoa a le Ekalesia ona filifili lea o le “Mo Le Malosi o le Autalavou” i lalo o le “Filifili le Mekasini.” Kiliki le “Faaopoopo le Faila” e filifili ai lau faila ma ata, ona kiliki lea o le “Auina Atu” e utaina ai ma auina mai ai ia i matou lau faila. Pe imeli mai ia i matou i le [e-mail].

E ono faapupuuina ia tali mo le uumi po o le manino.

Ua Lava Oe

“E mafai ona iloa e lou aiga vavalalata ma uo ua lava oe—ma e sili lo latou iloa o oe. E popole lo tatou Tama Faalelagi mo oe ma e alofa foi ia te oe. Ia e iloa o oe o Lona afafine/atalii ma o oe o se vaega o Lana fuafuaga. Na te silafia oe, ma e taua au taumafaiga i Ona fofoga.”

Matthew W., 14, Kalefonia, ISA

O Loo Silasila le Tama Faalelagi

“E silafia e le Tama Faalelagi au faatinoga, mafaufauga, ma faamoemoega. E tusa lava pe foliga mai e leai se tasi e matauina le lelei o loo e faia, o loo silafia e le Tama Faalelagi ma Iesu, ma o le a e maua faamanuiaga mo lena mea. A e taumafai a i le mea sili e filifili le mea sa‘o, e leai lava se mea e te popole pe fefe ai.”

Bella R., 14, Arisona, ISA

Toa Manumanu i Aso Taitasi

“E mafai ona e faia se eseesega i ni auala e sili ona laiti, pe o le nofonofo ma se tamaitiiti ua tuuatoatasi i le aoga, talanoa i se tasi, po o le auina atu o se imeli e faaali atu ai i se tasi e te alofa i ai. Atonu e te le o vaai i ai i le taimi lava lena, ae ou te faamautinoa atu o le a e vaai i ai i se taimi mulimuli ane. E mafai ona avea oe ma toa manumanu i le aso o se tasi pe faia foi se uo fou. Ou te iloa patino lena mea ona ua ou oo i ai au lava ia.”

Ashlyn F., 16, Iuta, ISA

O Mea Laiti ma Faatauvaa

“Ou te mauaina le mafanafana i upu a le perofeta o Alema: “O mea laiti ma faatauvaa e faataunuu ai mea tetele” (Alema 37:6). Pe a ou mafaufau po o a nei mea laiti ma faatauvaa, ou te tatalo ia iloa le finagalo o le Alii mo au, ma mo se fesoasoani i le faataunuuina o Lona finagalo. Ua ou iloa o le faia o mea iti ua ou latalata atili atu ai ia te Ia.

Kaelen R., 18, Niu Ioka, ISA

Faasoa atu se Ataata

“Ou te faia se eseesega e ala i le taumafai e fa’a’ata se tasi. E tusa lava pe na o se tagata e toatasi, o le faia ia latou talie, tuuina atu ia i latou se faamalo, pe oo lava i le asia o i latou e mafai ona faia ai se lalolagi o eseesega.”

Megan B., Kalefonia, ISA