“Vaai i talaatu o le Supo,” Mo Le Malosi o le Autalavou, Fep. 2022.
Sau, Mulimuli Mai ia te A’u
Vaai i talaatu o le Supo
Aua le fiu i mea e sili ona taua mo mea e te manao ai i lena taimi.
Ata na tusia e Dean Macadam
Afai na e anapogi, ua e iloa le faigata e mafai ona i ai i nisi taimi. Atonu na faaosoosoina oe e faamuta vave lau anapogi. Ae o i latou o e tatala vave le anapogi e tele lava ina le iloa faamanuiaga semanu e oo mai pe ana faapea latou te tumau e oo i le iuga.
Supo ma le Taulaga
O lenei tauiviga—o le faia vave o osigataulaga mo faamanuiaga o loo mamao—e le o se mea fou. E mafai ona maua i le tala o le Feagaiga Tuai e uiga ia Iakopo ma Esau, ina ua lafoai e Esau le faamanuiaga aupito sili ona taua i lona olaga mo se “fasi meaai,” o se pesini supo (tagai Kenese 25).
Ioe, e sao lau faitau. O se pesini supo. O le mea lea na tupu:
O Esau ma Iakopo o se masaga. Ae sa i ai se eseesega tele e tasi: O Esau o le ulumatua, o lea sa agavaa ai o ia i le tofi ulumatua. Tou te silafia, i na vaitaimi a maliu le tama o le aiga, e tuuina atu i atalii uma lana vaega o mea uma sa i ai i le tama—o ana meatotino, manu, ma fanua mo se amataga mo i latou. Ae o le tamaitiiti e i ai le tofi ulumatua (e masani lava o le atalii ulumatua) na mauaina se vaega e faaluaina o mea uma ma le tiutetauave mo le taitaiina o le aiga.
Ae o Esau na “faaleaogaina … le tofi o le ulumatua” (Kenese 25:34). O le aiga ma mea a le Alii sa le taua ia te ia (tagai Kenese 26:34–35). O Iakopo, i le isi itu, sa usiusitai i le Alii ma ona matua.
I se tasi aso, ina ua mavae se aso umi o tulimanu, na sau ai Esau i le fale ua lagonaina le fiaai tele sa ia manatu e ono oti ai o ia. Pe sa faateleina ana tala pe na ia matuai fiaai moni lava, ina ua vaai atu Esau o saunia e Iakopo se supo manogi, sa tasi lava le mea na ia taulai atu i ai: meaai!
O Iakopo, o le sa faatauaina le tofi ulumatua, na talosagaina le tofi ulumatua o Esau e faafesuiai ma le supo. I lena taimi, sa sili atu le popole o Esau i mea sa ia manao ai i lena lava taimi. O faamanuiaga silisili na avanoa mo ia i lona lumanai sa le lava le taua e fai atu ai “Leai” i le ofo a Iakopo.
Ia, o le alu atu e tulimanu ma le manao i supo paleni e le o ni mea leaga lava. Ae, e pei ona aoao mai Peresitene Dallin H. Oaks: “Ona o se mea e lelei e lē lava lea mafuaaga e fai ai. … O isi filifiliga e lelei tele, ae o isi e silisili ona lelei.”1
O lea la, e mautinoa lava o loo i ai se lesona taua e faavavau e mafai ona aoao mai e Esau ia i tatou. Ua otooto mai e le Tama Faalelagi mea e sili ona taua. O nisi o faamanuiaga mo le mulimuli i Lana fuafuaga e vave ona oo mai, ae e tele e mulimuli mai. O la tatou lu‘i, o la tatou suega, o le aua nei lafoaia mea e sili ona tatou mananao i ai mo mea tatou te mananao ai i le taimi nei.
Taimi o Supo Meaai
Tatou te feagai ma le tele o faaiuga lea e mafai ona tatou pauu atu ai i ni mafaufauga e pei o Esau:
“Pe ou te taalo i se isi taaloga ao lei moe? Pe ou te faitauina a‘u tusitusiga paia?”
“E tatau ona ou alu i lena gaoioiga auauna atu, ae na valaaulia au e au uo e tafafao ma i latou.”
“E mafai ona ou moe i se isi itula pe afai ou te le alu i le seminare i le aso.”
O faaiuga laiti faapenei e faaopoopo i luga. E tusa lava pe le leaga a tatou filifiliga, atonu e le o ni filifiliga sili ona lelei e taitai atu ai i le filemu ma le fiafia e faavavau.
Na tuuina mai e Elder Neil L. Andersen o le Korama a Aposetolo e Toasefululua se fesili atonu tatou te mafaufau uma i ai: “E faapefea ona tatou maua lo tatou ala i le tele o mea e taua?” O lana tali: “Tatou te faafaigofie ma faamamaina a tatou vaaiga. O nisi mea e leaga ma e tatau ona aloese ai; o nisi mea e mananaia; o nisi mea e taua; ma o nisi mea e matuai taua lava.”2
Avea ma se Iakopo
Talu ai na tuulafoai pea lava pea e Esau mea sa sili ona taua, sa ia tuuesea ai lona tofi ulumatua. O le amiotonu o Iakopo na mafai ai ona ia maua faamanuiaga a Esau. Sa oo ina avea o ia ma Isaraelu, e pei o ituaiga e sefululua o Isaraelu. Ua faamanuiaina i tatou uma i lo tatou lava tofi e faavavau—o le avanoa e avea ai e faapei o lo tatou Tama Faalelagi ma mautofi ai i mea uma ua ia te Ia. O loo avanoa mo tagata uma o e o mai ia Keriso ma tausi Ana poloaiga.
E masani lava o le filifiliga e sili ona lelei e le o le filifiliga aupito faigofie lea. “Ioe e faigata,” na aoao mai ai Peresitene Russell M. Nelson. “O mea uma e faatatau i le avea atili ma Faaola e faigata.” Ae, ua ia faamanatu mai ia i tatou, “e fiafia le Alii i taumafaiga, aua o taumafaiga e aumaia ai taui ia e le mafai ona oo mai e aunoa [ma taumafaiga].”3
Atonu e le lagonaina i taimi uma le pei o le ositaulaga i le tausia o poloaiga e aoga. Ae o le mea ofoofogia, o le a faamanuiaina pea oe e le Alii pe a e “vaai i tala atu o le supo” i mea e sili ona taua.