“O Lo’u Te’i Tele i le FSY,” Mo le Malosi o le Autalavou, Fep. 2022.
O Lo’u Te’i Tele i le FSY
E mafai faapefea e aso e lima o siva, taaloga, ma isi gaoioiga ona faamalosia lau molimau?
Matou te auai i le tele o fonotaga i le Ekalesia, ma o se tasi o fonotaga sa ou auai i ni nai tausaga ua mavae sa i ai se aafiaga mamana ia te au. Sa o se sauniga molimau i se uarota i Barcelona, Sepania.
I lo‘u te‘i, pe tusa ma le 10 talavou na faasoa a latou molimau ina ua maea se konafesi a le FSY sa latou auai ai. O le mea na sili ona faagaeetia ai au o lo latou tuuina mai o ni molimau mama ma mamana e uiga i le Faaola, o Iesu Keriso, Lana taulaga togiola, ma Lona alofa mo i tatou uma. Sa ou maofa i le mavae ai o aso e lima o gaoioiga malie faatasi ma isi talavou, meaai, taaloga, ma siva, o le olioli na latou maua i le Faaola sa tumau moni lava ia i latou. Sa tuua ai a‘u e mafaufau pe aisea.
Mulimuli ane sa ou siitia atu i Pasila. Sa ou iloa o loo sauniuni taitai i le eria mo se konafesi a le FSY. I le avea ai ma se Fitugafulu o le Eria, sa valaaulia au e fesoasoani e faatulaga le konafesi ma auai faatasi ma le autalavou i aso uma e lima.
Ae ou te lei tuua, sa talosaga mai le Au Peresitene o le Eria ia ou saunia e tuuina atu se lipoti e uiga i lo‘u aafiaga i le FSY pe a ou toe foi atu. Sa ma auai ma lou toalua i le konafesi, ma mo aso muamua e tolu sa ma fiafia ai i gaoioiga fuafuaina, e aofia ai suesuega o tusitusiga paia i le taeao, faigalotu, vasega, gaoioiga i fafo, meaai lelei, afiafi faaleaiga, ma siva. Sa agai i luma mea uma e pei ona fuafuaina, ma sa ou lagona ua lava mea na ou vaaia e faamaea ai la‘u lipoti.
O le afiafi na sosoo ai, sa matou faia ai se polokalama faamusika matagofie ma faagaeetia. Sa matua faapitoa lava le Agaga lea na oo ina fai mai ai le pule o le nofoaga o le konafesi, e le o se tagata o le Ekalesia, ia te au, o le a fiafia o ia e faaaoga lona nofoaga e o atu i ai le matou vaega FSY i tausaga uma.
Ina ua maea le polokalama faamusika, sa faapotopoto le autalavou i a latou vaega mo se sauniga molimau. Sa ma o atu ma lou toalua mai lea vaega i lea vaega ma faalogo i molimau faagaeetia. Sa mafai ona ma iloa o tagata auai i le konafesi sa i ai ni aafiaga malolosi faaleagaga. Sa ma fiafia e faalogologo atu i le autalavou o faaali e aunoa ma le popole o latou lagona o le fiafia. Sa matou lagona faapei o se vaega o se aiga tele faaleagaga. Sa matou lagonaina le alofa o le Faaola mo i matou taitoatasi.
Sa ou tilotilo atu i lo‘u toalua ma fesili atu, “O le a le mea o loo tupu iinei?” Sa lei mafai ona ia fai maia se upu. Ae sa ma iloaina o le toatele sa mauaina ni aafiaga faaleagaga ma maua ai se molimau e le mafaagaloina e uiga i le Alii, o Iesu Keriso.
Sa ou alu i lo‘u potu i lena po ma tusia se lipoti e matuai ese lava! O le tausaga na sosoo ai, sa ma toe o ai ma lo‘u toalua i le MMA ma fiafia ai i lea lava aafiaga e tasi. Lea la ua ou malamalama nei i le mafuaaga na faasoa mai ai e le autalavou i lena sauniga molimau i Sepania lagona anoa mo le Faaola nai lo le faamatalaina o gaoioiga malie sa latou faia.
O lo‘u manao ia tele ni aafiaga faapena i o outou olaga, po o le FSY, i autafa o lou moega a o e tatalo, pe a e faitau i tusitusiga paia, pe o le faasoa atu o lau molimau i au uo.
Ou te molimau atu o i tatou o atalii ma afafine o se Tama Faalelagi alofa. Na tatou o mai iinei i le lalolagi mai Lona afioaga, ma o i tatou uma o tagata o Lona aiga maoae faaleagaga. O lo tatou Uso matua o le Alii, o Iesu Keriso. O Ia o lo tatou Matai, ma e mai ia te Ia e mafai ona tatou aoao ai ma tuputupu ae “i le poto ma le tino, ma alofagia e le Atua atoa ma tagata” (Luka 2:52), e pei ona Ia faia.
Faamatalaga mai le Keriso ma le Taitai Talavou Mauoa saunia e Heinrich Hofmann
O Iesu Keriso o lo tatou Faaola. O Lona mana e le iu, ma e tu saunia o Ia e laveai i tatou mai soo se tulaga puapuagatia tatou te ono oo i ai. O Ia o la tatou uo—o se uo e alofa ia i tatou, silafia i tatou, ma ua ofoina mai Lona soifua e laveai ai tatou. O Lana taulaga togiola mo i tatou ua mafai ai e Ia ona silafia le ala e fesoasoani ai ia i tatou, e faamalolosia ai i tatou, ma faaatoatoa ai i tatou. Ia tatou talia uma Lana valaaulia: “Sau, mulimuli mai ia te au” (Luka 18:22).