Sau, Mulimuli Mai ia te A’u

Kenese 11–50

O Peteriaka

O Ai i Latou ma Pe Aisea e Taua Ai

Atonu na e faalogo ia Aperaamo, Isaako, ma Iakopo. Tatou te faitau soo i ai i le Tusi a Mamona ma o le a mautinoa lava lou faalogo atili e uiga ia i latou a o e suesue i le Feagaiga Tuai i lenei tausaga. Faatasi ai ma le tele o le gauai atu ia i latou, atonu e taua tele i latou, e sa’o? Ae atonu o loo e fesili ifo ia te oe lava, “Aisea e taua ai i aso nei ni alii se toatolu o e sa soifua i le fia afe o tausaga ua mavae?” Ia, o le ki i lena tali o loo taoto lea i feagaiga e faavavau ma faamanuiaga folafolaina na tuuina atu e le Atua ia i latou.

Aperaamo

Ata na tusia e Jarom Vogel

O Aperaamo o se perofeta maoae. Sa amiotonu o ia ma usiusitai i poloaiga a le Atua.

Sa papatisoina o ia, maua le perisitua, ma sa faamauina i lona faletua o Sara mo le faavavau.

Na osia e le Atua se feagaiga ma Aperaamo o le a toatele ana fanau ma o le a maua faamanuiaga lava e tasi na ia mauaina.

O le a latou aveina atu le atoatoaga o le talalelei a Iesu Keriso i atunuu o le lalolagi.

Isaako

O Isaako o le atalii o Aperaamo ma Sara.

Na ta‘u atu e le Atua ia Aperaamo e osi le taulaga ia Isaako. Sa alofa Aperaamo ia Isaako ae sa filifili e usitai i le Atua. A o lei alu Aperaamo e osi le taulaga ia Isaako, sa ta‘u atu e se agelu ia Aperaamo e taofi. O le naunau o Aperaamo ma Isaako e usitai i le Atua o se faatusa o le Togiola a le Alo e Toatasi na Fanaua e le Atua.

Sa folafola atu ia Isaako ia lava faamanuiaga e tasi e pei o Aperaamo.

Iakopo

E pei lava o lona tama ma lona tamamatua, sa faamaoni Iakopo i le Atua.

Ona o lona faamaoni, na suia ai e le Alii le igoa o Iakopo ia Isaraelu, o lona uiga “o se ua manumalo i le Atua” po o le “ia faamuamua le Atua” (tagai Bible Dictionary, “Israel”).

E 12 atalii o Iakopo. O nei atalii ma o latou aiga na lauiloa o ituaiga o Isaraelu.

O le feagaiga na osia e le Atua ma Aperaamo sa toefaafouina ma Iakopo ma lana fanau.

O le Peteriaka ma Oe

I le avea ai ma se tagata o le Ekalesia, o oe o se vaega o le fanau a Aperaamo, Isaako, ma Iakopo. O le feagaiga na latou osia ma le Atua e faatatau ia te oe!

Ua ia te oe le faamanuiaga ma le tiutetauave e tuuina atu lau molimau e uiga i le Faaola ma faasoa atu le talalelei.

Ua valaauina foi oe e valaaulia tagata uma e osia ma tausia feagaiga ma maua sauniga o le perisitua. Na saunoa mai Peresitene Russell M. Nelson e faapea, o se vaega uma lenei o le faapotopotoina o Isaraelu, lea “o le mea aupito sili ona taua ua tupu i le lalolagi i aso nei” (“Faamoemoe o Isaraelu,” [faigalotu a le autalavou i le lalolagi atoa, 3 Iuni, 2018], 8, ChurchofJesusChrist.org).