“Olaga faatasi ma le KOVITI-19 ma Tua Atu,” Mo le Malosi o le Autalavou, Fep. 2022.

Olaga faatasi ma le KOVITI-19 ma Tua Atu

Saunia e David Dickson ma Eric B. Murdock

Mekasini a le Ekalesia

Ua suia mea—ae ua faapena foi ma oe.

tamaitai talavou o loo ofuina se ufi fofoga mo le puipuiga

O tausaga e lua ua mavae atu ua fai si matautia. Sa tatou feagai ma se faama‘i pipisi lea na aumaia ai pea lava pea le i ai o ufi fofoga, nonofo vavamamao faaletino, ma fonotaga faaeletonika i o tatou olaga. Ae o lenei ua iu ina mafai ona toe foi mea uma i le ala tonu lava lea sa i ai muamua!

E sao?!

Ia … atonu e sa’o, ae atonu e le faigofie lena mea. E toatele tagata sa lagonaina le vavaeeseina ma le le mautinoa. Ma o le feagai ai ma se faama‘i oti e le na o le pau lea o le taimi o le a tatou maua ai nei ituaiga lagona. E le faigofie i taimi uma lenei olaga, ma sa lei fuafuaina lava e faapena. O le a feagai uma i tatou ma luitau. O ni nai manatu nei i le auala e toe sologa lelei ai le toe foi i le olaga pe a mavae le KOVITI-19. O nei fautuaga e mafai foi ona fesoasoani ia te oe e feagai ai ma luitau i le lumanai.

Ia E Auai.

O le ola ai i o tatou olaga i vasega i luga o le initoneti, faanofoesea, ma tapu e mafai ona faigofie ai ona tatou maua le toafimalie e nonofo ai i le fale ma i tatou lava. Ae e lei fuafuaina lava i tatou e ola i se olaga faanofoesea. O le faatasitasi i le lotu, aoga, po o gaoioiga e manaomia i le taimi nei e sili atu nai lo se isi lava taimi. Ua valaaulia i tatou e Peresitene Nelson e fesoasoani e faapotopoto Isaraelu,¹ ma e aofia ai le faapotopotoina o oe lava ina ia faatasi ma isi.

Toe fesootai ma Uo Tuai, Amata Ona Fesootai ma e Fou

I nisi o faigauo, e mafai ona e alu mo ni masina, po o ni tausaga, e aunoa ma le vaai o le tasi i le isi, ae o le taimi lava e toe fesootai ai o le a lagona pei lava sa leai se mea na suia. Peitai, e le o faigauo uma e faapenei. O nisi taimi pe a mavae se taimi umi o valavala (e pei o le taimi o se faama‘i pipisi) e mafai ona lagonaina ai sina lagona e pei e le masani pe a iu ina toe fesootai uo. O ni nai fautuaga nei i le auala e toe fesootai ai ma uo ua leva pe faia ai ni uo fou:

Faalogo totoa i lau uo. E faamalosia faigauo pe a e faaalia le fiafia i mea o loo tutupu moni lava i le lalolagi o lau uo. Taumafai e faalogo atu ia i latou ma maitau mea latou te faia.
Manatua mea latou te fiafia i ai. Ia matau a latou meaai e fiafia i ai, pese, lanu, au taaalo, ma isi mea faapena. E te le iloa lava po o afea e mafai ai e lena faamatalaga ona faafiafiaina le aso o lau uo!!
Faatauaina eseesega. Na saunoa Elder Dieter F. Uchtdorf o le Korama a Aposetolo e Toasefululua, “E ola le Ekalesia pe a tatou faaaogaina … eseesega ma uunaia e le tasi le isi e atiina ae ma faaaoga a tatou taleni e siitia ma faamalosia ai o tatou uso a soo.”²
Faaavanoa se taimi e auauna atu ai. Auina atu se feau tusitusia faauo. Fesoasoani ia latou feau. Faasoa atu se tomai. Ia avea ma se lagolago i aso lelei ma aso leaga. Aapa atu ma fesoasoani i le mea e te mafaia. Manatua mea na aoao mai ai le Faaola e uiga i le tuuina atu o ia auaunaga, “Aua na faia e outou i le tasi o e aupito itiiti o o’u uso nei … o a’u lea na outou faia i ai” (Mataio 25:40).

Faasaolotoina o i Tatou Lava

O se tasi o lagona e tele ona i ai i le toatele i le taimi nei ma le mavae ai foi o le faama‘i pipisi o le lagona taotaomia. Atonu e te lei lagonaina le fiafia atoatoa ma le faamalieina i le auala o loo agai ai i luma mea mo oe. Atonu o lou olaga e le o i le tulaga e te manao ia i ai.

Atonu e tele ni mafuaaga mo lena mea. Atonu o ni mausa leaga, miti nutimomoia, misia o avanoa i le taimi o le faanofoesea, pe na o mea lava e le mafai ona e suia. Po o le a lava, ia manatua e le o taotaomia oe ma le leai o se faamoemoe. E i ai mea e mafai ona e faia ina ia faasaoloto ai oe.

Ia manatua pea o Iesu Keriso, e ala i Lana Togiola e le iu, e mafai ona tuuina atu ia te oe le malosi e te saoloto ai. E mafai ona Ia fesoasoani ia te oe a o e liliu atu ia te Ia. E mafai e le Faaola ona faaali atu ia te oe le auala sili e agai ai i luma.

Ma le isi, ia manatua o le lagona o le taotaomia e tele lava o taimi o lona uiga e le o aoga se mea mo oe ma ua oo i le taimi e faia ai se suiga. E le faapea e tatau ona faia se suiga tele. O suiga laiti e mafai ona faia se eseesega tele . Mafaufau e tusi i lalo mea e mafai ona e suia, ona filifili lea o se tasi ma amata ona galue agai i ai i le vave e mafai ai.

Agai i Luma faatasi ma se “Taeao Fou”

O le fautuaga sili mo le taulimaina o se faama‘i pipisi po o soo se luitau e maua mai i le perofeta. Sa saunoa mai Peresitene Russell M. Nelson:

“O aso nei ua tele ina tatou faalogo e uiga i ‘se taeao fou.’ Afai e te manao moni lava e opogi se taeao fou, ou te valaaulia oe ia faateleina le liliu atu o lou loto, mafaufau, ma le agaga i lo tatou Tama Faalelagi ma Lona Alo, o Iesu Keriso. Ia avea lena mea ma ou taeao fou.

Opogi lou taeao fou e ala i le salamo i aso taitasi. Saili ia faateleina le mamā i mafaufauga, upu, ma amioga. Auauna atu i isi. Ia tausisia se vaaiga e faavavau. Faalautele ou valaauga. Ma po o a lava ou luitau, … ola i aso taitasi ina ia e saunia atili e feiloai ma lou Foafoa.” ³

E mafai faapefea ona e sese pe a e mulimuli i aoaoga a le perofeta? Agai pea i luma ma le faatuatua ia Iesu Keriso e tusa lava pe le mafai ona e vaaia taunuuga o au taumafaiga. O le a oo mai le mea sili mo oe !

O Ai E Mafai Ona E Fesoasoani Atu i Ai?

A o e ola ai i le vaitiaimi o se faama‘i pipisi, po o soo se tulaga faigata, e tatau ona e vaai atu i isi mo se fesoasoani. Ae, ia manatua e mafai foi ona avea oe ma punavai o le malosiaga mo isi!

Atonu o loo i ai se tasi e fou i lau paranesi po o le uarota po o le aoga o loo manaomia lou aapa atu ia i latou. Po o fea lava e te alu i ai, o le a i ai lava se tasi e mafai ona manuia mai lou malamalama ma lau molimau. O au taleni ma uiga patino e mafai ona avea o se faamanuiaga ia i latou o loo siomia oe, o lea ia saili ma le agaga tatalo i na avanoa e auauna atu ai. A o e faia, atonu o le a e iloa ai le faigofie atu ona e onosaia ou luitau.

Ua tuuina mai e le Atua ia te oe se anoanoai o meaalofa faaleagaga, e tusa lava pe le o mafai ona e iloaina lelei i lenei taimi. O se tasi o auala sili e faamalosia ai na meaalofa o le faaaogaina lea ma faasusulu atu lou malamalama (tagai Mataio 5:16).

O lea ia susulu atu!