“Mai le Leai o se Mea i le I Ai o se Mea,” Mo le Malosi o le Autalavou, Fep. 2022.
Lesona Faatinoo le Afiafi Faaleaiga
Mai le Leai o se Mea i le I Ai o se Mea
Pe a e lagona ua le lava au taumafaiga, vaai atu ia Iesu Keriso e liliu atu au taumafaiga i se mea e sili atu.
Toilalo. Le atoatoa. Faia se mea sese. E oo lava i le agasala. Po o le a lava, atonu na e oo i se lagona e pei e te le o ausia le faamoemoega. I le avea ai ma soo o Iesu Keriso, tatou te mananao i taimi uma ia faia le mea sili tatou te mafaia, ae o nisi taimi e mafai ona tatou o ifo i lalo i tatou lava mo le itiiti ifo nai lo le atoatoa.
O le mea moni e leai se auala e mafai ai ona tatou atoatoa na o i tatou lava. O le atoatoa e ia Iesu Keriso (tagai (Moronae 10:32–33). A o tatou o mai ia te Ia, e lotomaualalo, salamo, ma faatino lo tatou faatuatua, o le a Ia faia a tatou “mea vaivai ia avea ma mea malolosi” (Eteru 12:27). E pei ona aoao mai Peresitene Russell M. Nelson, “Faatasi ai ma le faatuatua ia te Ia, e mafai ai ona tatou aveesea mauga i o tatou olaga.”1
Faatasi ai ma lenei lesona faatino, e mafai e oe ma lou aiga ona talanoa e uiga i le ala e mafai ai e le Tama Faalelagi ma Iesu Keriso ona fesoasoani ia te outou taitoatasi e liliu o outou vaivaiga i se mea e sili atu nai lo le mea sa e manatu i ai.
O Mea e Fai
-
Fai atu i se tagata o le aiga e ‘osi’osi se mea faigofie i luga o le fasi pepa i le peni. Fai atu ia i latou e taumafai ma le faamoemoe e aua nei tusia se ata o se mea o le a iloa e se isi.
-
Tufa atu le pepa i se isi tagata o le aiga ma fai atu ia i latou e faaaoga maka po o peni vali e fai ai se mea fou mai le tusitusiga i le pepa—o se mea faitino, se tagata, o se galuega o faatufugaga. Atonu o soo se mea lava e mafai ona latou mafaufauina. Ia e fatufatuai se mea fou!
-
A uma ona latou faia, fai atu ia i latou e faasoa mai la latou fatufatuga fou i isi tagata uma o le aiga. Atonu e malie mo isi tagata o le aiga le taumafai.
1
2
3
Tuu Atu i le Atua e Fesoasoani
E pei o se osiosi i luga o se pepa, o nisi taimi o a tatou taumafaiga e faia mea lelei e le tele se aoga. Atonu tatou te latalata atu i le ausiaina o a tatou sini, ma o isi taimi o le taunuuga o a tatou taumafaiga atonu e le iloagofie lava.
Ae a tatou liliu atu a tatou taumafaiga i le Alii, e mafai ona Ia faia mea ofoofogia! Sa aoao mai Peresitene Ezra Taft Benson (1889–1994): “O alii ma tamaitai o e ua liliu atu o latou olaga i le Atua o le a iloa e Na te mafai ona faia mea sili atu i o latou olaga nai lo mea latou te mafaia. O le a Ia faateleina lo latou olioli, faalautele la latou vaai, faamatala o latou mafaufau, faamalosia o latou maso, siitia o latou agaga, faatele o latou faamanuiaga, faateleina o latou avanoa, faamafanafanaina o latou agaga, faatulai mai ni uo, ma liligi mai le filemu. O lē e faamaumauina lona ola ona o le auauna i le Atua o le a maua le ola faavavau.”2
Atonu tatou te le fiafia pe a le liliu atu a tatou taumafaiga e faia mea lelei i le ala sa tatou faamoemoe i ai, ae e le manaomia ona tatou lotovaivai. A o e “tatalo … atu i le Tama i le suafa o Keriso, ina ia faapaiaina e Ia lau galuega mo oe,” o au taumafaiga o le a “mo le manuia o lou agaga” (2 Nifae 32:9). E ui i o tatou vaivaiga, a o tatou lotomaualalo ma faatuatua i le Atua, o le a Ia fesoasoani ia i tatou ia avea atili e faapei o Ia!