“Toilalo Faamanuiaina,” Mo Le Malosi o le Autalavou, Fep. 2022.
Fesoasoani o le Olaga
Toilalo Faamanuiaina
Atonu e te toilalo i nisi taimi, ae e mafai moni lava ona fesoasoani lena mea ia te oe e agai ai i luma.
Ata na tusia e Alyana Cazalet
Afai e te tusia se tusi e uiga i lou olaga, o le a le ulutala o le a i ai? Mata o le O Lo‘u Olaga Atoatoa ma Faamanuiaina po o le O Lo’u Olaga Ofoofogia, e Aunoa ma se Toilalo?
E matea, o le a e lagonaina le le mautonu i na faalagiga aua o le a le moni. O lou olaga e le atoatoa pe saoloto mai le toilalo. E faapena foi a‘u. O le mea moni, e leai se olaga o se tasi e atoatoa. O le faia o mea sese ma le le atoatoa o se vaega o le olaga, ae e i ai se eseesega tele i le va o le toilalo ma le avea ma sē toilalo. E le o oe o se toilalo, ma o le toilalo e le o se mea leaga i taimi uma. O ni fautuaga nei se tolu e fesoasoani ia te oe e liliu ai ou toilalo i ni tulaga manuia.
O Se Avanoa mo le Manuia i le Lumanai
O nisi taimi o le le atoatoa e mafai ona lagona ai e pei o le iuga o le lalolagi. Ae o le toilalo e masani lava o se auala sili lea mo oe e aoao ai. E mafai ona avea o se avanoa e “mafaufau i o outou ala” (Hakai 1:5), sui le itu e agai i ai, ma toe taumafai. O le a fesoasoani lenei mea e faatulaga ai oe ina ia faamanuiaina atili i le isi taimi.
Aloese mai le Mailei o le Faatusatusa
E faigofie ona faatusatusa i tatou lava i isi. O loo osofaia pea i tatou i taimi uma i mea mananaia ma matagofie e foliga mai o loo faia e isi tagata uma—aemaise lava i luga o ala o faasalalauga faaagafesootai. E mafai ona tatou lagona ai e le lava i tatou.
Nai lo le taulai atu i mea o loo i ai i isi tagata e te le o maua, tape ia faatusatusaga ma ki le faitauga o ou faamanuiaga. Sa fautuaina foi i tatou e Elder Gary E. Stevenson o le Korama a Aposetolo e Toasefululua ina ia “[fesootai] lelei ma isi ma [faaopoopo] le malamalama i o latou olaga.”1 Faamanatu mea na ausia e isi ma amata ona faia fuafuaga o auala e mafai ona e faaleleia atili ai. E sili atu ona aoga lenei mea nai lo le taulai atu i le auala e faatusatusa ai lou olaga i se isi tagata.
E Mafai Ona Galulue Faatasi Mea Uma mo lo Outou Lelei
O le a tatou feagai uma lava ma le toilalo. Nai lo le sasaina o i tatou lava ma mafaufau ua tatou faatauvaa pe le agavaa, o loo i ai se auala e mafai ai ona tatou tutu i tatou lava i luga, tafitafi i tatou lava, ma agai i luma.
Ua aoaoina i tatou e tusitusiga paia e “saili ma le filiga, tatalo e lē aunoa, ma ia talitonu, ma o le a galulue faatasi mea uma mo lo outou lelei” (Mataupu Faavae ma Feagaiga 90:24). Na saunoa mai Elder Gerrit W. Gong o le Korama a Aposetolo e Toasefululua e moni lenei mea ona o le Tama Faalelagi ma lo tatou Faaola, o Iesu Keriso, “ua silafia le ala e mafai ona galulue faatasi ai mea uma, ma La te silafia le mea e lelei mo i tatou.”2 La te silafia ma alolofa atoatoa ia i tatou. Afai o le a tatou faatuatuaina i Laua, e mafai e lo tatou faatuatua ona uunaia i tatou e faaauau pea i soo se taimi tatou te toilalo ai.
E le mafai ona tatou atoatoa na o i tatou lava. O le atoatoa e ia Keriso ma e oo mai pe a tatou faatinoina le faatuatua ia te Ia ma mulimuli ia te Ia. Pe a e manatu ua e toilalo ma e le mafai ona e faasa‘oina, liliu atu i le Tama Faalelagi ma le Faaola ma vaai pe faapefea ona La fesoasoani ia te oe i le aso e tasi i le taimi.