“Valaauina e Auauna Atu i Ona Tuaa,” Mo le Malosi o le Autalavou, Fep. 2022.
Valaauina e Auauna Atu i Ona Tuaa
O le a auauna mamao atu Elder Morris mai lona aiga. Peitai ane, na suia mea uma.
Ata na pueina e Kaui Wihongi
“Atalii, aua e te faia lenei mea,” o le tala lea a ona matua. “Ua e lafoai ese lou olaga.”
E le o upu na e faamoemoe le toatele o faifeautalai e faalogo i ai—i le malaevaalele tonu lava—i le taimi tonu lava o le a latou tuua ai ae lipoti atu i le nofoaga autu e aoao ai faifeautalai (NAF).
Ua silafia e Elder Morris, mai Niu Sila le tele o le alofa o ona matua ia te ia. Sa la i ai iina mo ia i taimi lelei ma taimi leaga. Sa la faamalosiau atu ia te ia i ana taaloga lakapi. Sa la patipatia lana faaiuga e auai i le aoga faaloia. Sa la tausia o ia ma le alofa ma le faamoemoe o le a ia maua se olaga fiafia i ona luma.
O a la upu faatauanau na oo mai i se nofoaga o le alofa. Ia i laua, o le manatu o lo la atalii faapelepele o le a auauna atu i se misiona e lua tausaga mo lana faatuatuaga fou sa foliga mai e le gata ina fenumiai, ae o se faamata‘u foi i sini sa ia galue malosi ia ausia.
Tou te iloa, o Elder Morris o se tagata taalo talenia i lona ala e avea ma se tagata taalo lakapi faapolofesa. I lana aoga, ua faatoa amata ona manuia mea uma i lana matata faaloia.
Oi, ma sa mafaufau o ia e faaipoipo!
Ua uma ona faia e Elder Morris lenei talanoaga ma i laua i le tele o taimi muamua. Sa ia tali atu i le ala e tasi na ia iloa e tali atu ai. “Sa ou tau atu ia i laua ou te alofa ia i laua. Sa ou fusi maia i laua. Ma sa ou faasoa atu la‘u molimau sa ou iloaina o le mea lenei sa tatau ona ou faia.
Ona ia faatofa atu lea ia i laua ma oso i luga o le vaalele mo le NAF i Provo, Iuta, ISA, e sauni mo lana misiona i Filipaina.
O le taimi lea na tula‘i mai ai le KOVITI-19 ma suia ai le lalolagi.
Suiga i le Tafailagi
O le KOVITI-19 sa avea ma talatomua i le lalolagi atoa mo le tele o vaiaso a o lei oo atu Elder Morris i le NAF. O le mea moni, o lana vaega o le vaega mulimuli lea o faifeautalai e lipoti atu i le NAF mo le isi 16 masina. Sa ta‘u atu i vaega na mulimuli atu ia te ia e nonofo i le fale ma faatalitali mo nisi faatonuga.
O le fai atu faapea na le mautonu mea i le NAF o le a avea ma se faamatalaga le atoatoa. “E toatele tagata sa popole i le mea o le a tupu,” o le tala lea a Elder Morris. “Mo au, sa ou lagona le toafimalie. Sa ou lei iloa lava pe o le a faapefea le lumanai. Pau le mea na ou iloa o le a galulue mea uma mo le mea sili.”
Ina ua oo mai le tala o le a toe tofia Elder Morris i lona atunuu moni o Niu Sila, o lana tali atonu e le o le mea lea e te faamoemoeina.
Sa sili atu lona fiafia nai lo se isi lava taimi!
“Ua ou iloa e toatele faifeautalai ua faamoemoe e auauna atu i se nofoaga mamao ese,” o le saunoaga lea a Elder Morris. “Mo a‘u, e ui i lea, sa ou manatu lava o se avanoa le aoaoina o o’u lava tagata i lo‘u lava atunuu. Sa ou manao e faasoa atu le talalelei i Niu Sila.”
Sa lei iloa e ia pe faapefea ona suia e lenei mea lona olaga—ma le olaga o se tamaitai e taua tele ia te ia.
Faamoemoega Fou o Nana [Tinamatua]
O le tinamatua o Elder Morris (o lona nana) sa feagai ma ni luitau ogaoga o le soifua maloloina. “Sa matuai le manuia lava o ia ma sa ia fai mai ua oo i se tulaga lea ua saunia ai o ia e oti. Na te lei lagonaina sa i ai se mea na totoe e soifua ai.
A o lei alu lana misiona, sa maua e Elder Morris se avanoa e amata aoao atu ai le talalelei i lona nana. Ae o le taimi nei, o ia o se faifeautalai faamisiona na tofia i le eria tonu lava sa nofo ai lona nana.
“Ou te alofa tele i lo‘u nana,” o le saunoaga lea a Elder Morris. “Ma ua ou vaai i le talalelei o suia moni lava o ia.”
Na filifili lona nana e papatiso ma avea ma se tasi O Le Ekalesia a Iesu Keriso o le Au Paia o Aso e Gata Ai. O ia o le tagata muamua o le aiga moni o Elder Morris (e ese mai ia te ia lava) e auai i le Ekalesia.
O lona olaga, na saunoa ai Elder Morris, ua matua ese lava i le taimi nei. “Ina ua maua e lo‘u nana le talalelei, sa ia iloa ai le mafuaaga o loo ola ai pea o ia. O lea la ua fia ola o ia! O taeao uma lava e ala ai o ia i le 4 i le taeao po o le 5 i le taeao ma usuina viiga. E tatalo o ia ma faitau ana tusitusiga paia i aso taitasi. Na te faia ona ua faamanuiaina o ia e le talalelei i se faamoemoega.”
I lea taimi ma lea taimi, ua vaai Elder Morris i le malamalama e aumaia e le talalelei i olaga o i latou o loo ia aoaoina. Sa ia te ia le avanoa e aoao ai isi uo ma tagata o le aiga. Na ia vaai lelei i le auala na latou faaleleia ai i latou lava. “Ua tuuina mai e le talalelei a Iesu Keriso ia i tatou le faamoemoega,” o le tala lea a Elder Morris. “Ou te lagona le faanoanoa mo i latou e le o i ai le talalelei i o latou olaga. Latou te le iloa lo latou faasinomaga moni.
I se faamatalaga e faatatau i ai, e oo lava i ona matua ua amata ona matauina suiga i le nana o Elder Morris. Ua mafai nei ona latou iloa ua faamanuiaina lona olaga e le talalelei i le tele o auala.
O Elder Morris ma lona nana (tinamatua).
Valaaulia a Elder Morris i le Autalavou
E leai ma se masalosalo o Elder Morris o le auauna atu i se misiona o le filifiliga sa‘o lea. Sa ia iloaina foi i le amataga o lana misiona, ina ua amata ona sasao le KOVITI-19 i le lalolagi atoa, o le a taitaia pea e le Atua Lana galuega. “O le a le fiafia le galuega a le tagata, ae o le a le faapena lava le galuega a le Atua,” o lana tala lea.
O taimi uma lava e maua ai e ia se avanoa e faia ai, na te uunaia le autalavou ina ia ola agavaa e auauna atu i se misiona. Mo Elder Morris, e leai se isi faaiuga semanu e i ai se aafiaga sili atu i lona lumanai—aemaise lava lona lumanai e faavavau. “O le fautuaga sili lava o le a ou tuuina atu i le autalavou o le saunia lea e auauna atu i se misiona. O le a suia ai lou olaga.”
Na te silafia o le filifili e auauna atu e mafai ona oo mai ma le ositaulaga. Ae o lea foi, ua ia iloa se mea pe lua e uiga i le ositaulaga, ma faamanuiaga e maua mai ai.