O le Autu ma A’u

Ua faasoa mai e le autalavou pe o faapefea ona latou ola i upu o Autu a Tamaitai Talavou ma le Korama a le Perisitua Arona

Faasoaina atu O La‘u Tapuaiga i La’u Fomai

Saunia e Ethan Trujillo

“O le a ou fesoasoani e saunia le lalolagi mo le toe afio mai o le Faaola e ala i le valaauliaina o tagata uma ia o mai ia Keriso ma maua faamanuiaga o Lana Togiola.”

Ata mai faaaloaloga o Ethan Trujillo

E i ai o‘u atuatuvalega, o lea ou te alu ai i togafitiga i vaiaso taitasi. I ni nai faatalatalanoaga muamua, sa ou aloese mai le talanoa atu i la‘u fomai e uiga i o’u talitonuga. Sa sauaina a‘u i le ese mai isi, ma sa ou fefe i le toe osofaia o a’u.

E ui i lea, ia Ianuari talu ai, sa malaga ai lo‘u tama mai Kalefonia, ISA, i Niu Mekisiko, ISA, e faauu a’u i le tofi o se aoao. Ua tetea ou matua, o lea sa mafaufau ai la‘u fomai pe aisea o le a sau ai lo’u tama i le 1,000 maila e vaai a‘u ma o’u uso mo na o ni nai aso.

Sa ou mafaufau, “Ua lelei, o lea la!” Sa ou faamalamalama atu i ai sa faauuina au e lo‘u tama i le perisitua ma le taua tele o lena mea.

O lena mea na matala ai avanoa e tau atu ai ou talitonuga! Sa amata ona ma talanoa le taofiofia e uiga i Le Ekalesia a Iesu Keriso o le Au Paia o Aso e Gata Ai. Sa ou iloa ai e i ai ona aiga o ni tagata o le Ekalesia. Sa ia tau mai ia te au o le faalogo i o‘u talitonuga ma aafiaga ua fesoasoani ia te ia e malamalama atili ai i le Ekalesia.

E leai se tala ofoofogia o le liuaina e tupu mai i lenei mea. E le fia auai la‘u fomai i le Ekalesia. Ae e telē mo a‘u—o le talanoa ma la’u fomai ua tuuina mai ai ia te a‘u le talitonuga mautinoa ia aua nei ou filemu e uiga i mea ou te talitonu i ai.

Sa masani ona ou fefe e talanoa e uiga i mataupu faalelotu, ae faatasi ai ma le tele o faataitaiga, ua mafai ai ona ou talanoa sao lava i se avanoa e maua. E leai sou masalosalo o loo i ai se galuega a le Tama Faalelagi mo a‘u e fai. Atonu e ese la‘u galuega mai mea o loo faia e isi tagata, ae o ai isi e mafai ona faasoa atu le talalelei i tagata ou te iloa, e pei o la’u foma‘i? O la’u galuega lena.

Sa tuuina i tatou uma i lenei lalolagi e aoao ma tuputupu ae ai. E mafai ona avea i tatou ma aao o le Tama Faalelagi pe a tatou alolofa i isi tagata ma toto ni fatu laiti o le talalelei i o latou loto. O lea la, soo se taimi lava e oo mai ai se avanoa faafaifeautalai, ou te faaaogaina aua ou te lagonaina le Agaga ua faatasi ma a‘u—ma ou te fiafia i minute uma.

E alala le tusitala i Niu Mekisiko, ISA.