Te hau nō te fa’aruru i te mau vero o te orara’a

E parau poro’i nō roto mai ia Elder Dieter F. Uchtdorf

Nō te pupu nō te Tino ’Ahuru ma Piti ’āpōsetolo

Tē parau nei te Fatu Iesu Mesia ia ’outou i roto i te mau vero o tō ’outou orara’a : « ’A fa’aea, ’a mania ».

Elder Uchtdorf ’e te feiā ’āpī i te fa’aarara’a nō te BYU–Pathway nā te ao nei i te 7 nō Fepuare 2017.

I muri a’e i te hō’ē mahana tā’āto’a i te ha’api’ira’a i te pae tahatai, ’ua parau te Fatu Iesu Mesia i tāna mau pipi ’ia tere rātou i te tahi atu pae o te miti nō Galilea. I muri a’e i tō rātou revara’a, ’ua ’ite mai Iesu i te hō’ē vāhi i ni’a i te poti nō te fa’afa’aea ’e ’ua ta’oto atu ra.

’Aita i maoro, ’ua ha’apōiri a’era te ra’i, « ’ua tupu mai ra te hō’ē ma’a mata’i rahi, fati mai ra te ’are i ni’a i te poti, ’e ’ī roa a’era » (hi’o Mareko 4:37).

E rave rahi mau pipi a Iesu e feiā rava’ai ’aravihi ’e ’ua ’ite rātou e nāhea ’ia fano nā ni’a i te hō’ē poti. Terā rā, ’ua pūai roa te vero, ’e ’ua ha’amata rātou i te mata’u. Mai te huru ra ē, tē fātata ra te poti i te tomo.

Noa atu rā te reira, ’ua ta’oto noa Iesu.

’Aita tātou i ’ite e aha te maorora’a tō te mau pipi fa’arurura’a i roto i te vero, i te pae hope’a rā e’ita tā rātou e nehenehe fa’ahou e tīa’i. ’Ua fa’aara rātou ia Iesu ’e ’ua tuō, « e te ’orometua, e’ita ’oe e ha’apa’o mai i tō mātou nei pohe ? (Mareko 4:38).

Fa’ahōho’ara’a nā Adam Howling

Te mau vero o te orara’a

Tē fa’aruru pā’āto’a nei tātou i te mau vero tupu tā’ue i roto i te orara’a. E nehenehe ’outou e hi’o i te mau fifi nā te ao nei ’aore rā i tō ’outou iho vaira’a, ’e ’ia fāri’i i te hepohepo, te paruparu ’e te ’ino’ino. E nehenehe tō ’outou ’ā’au e ’oto nō ’outou iho ’aore rā nō te hō’ē ta’ata tā ’outou i here. E pe’ape’a paha ’outou ’aore rā e ri’ari’a ’e e mana’o ē, ’ua fa’aru’e mai te tīa’ira’a ia ’outou e a muri noa atu.

I roto i te reira mau taime, e riro paha ’outou i te tuō mai te mau pipi a Iesu, « e te ’orometua, e’ita ’oe e ha’apa’o mai i tō’u nei pohe ? »

I terā fāito matahiti tō ’outou, hō’ē ’o tā’u hīmene purera’a au roa, ’oia ho’i, « E mea pūai te vero ».¹ E nehenehe iā’u ’ia feruri iā’u iho i roto i te poti ’a « pūai ai te mau ’are ! » Teie i muri nei te tuha’a faufa’a roa ’e te nehenehe roa a’e o te hīmene : « E ha’apa’ohia tō reo : Fa’aea ». I muri iho e tae mai te parau poro’i faufa’a rahi : « E’ita e tomo tō tātou pahī tei reira te Fatu mana rahi ».

I muri a’e i tō tāna mau pipi tuōra’a i te tauturu, « ’ua ti’a a’era ’oia i ni’a, ’avau atu ra i te mata’i, ’e ’ua nā ’ō atu ra i te ’are, ’A fa’aea, ’a mania. Pohe iho ra te mata’i, mania roa atu ra » (Mareko 4:39).

Mai te mea e fāri’i poupou ’outou ia Iesu Mesia, « Te Ari’i nō te Hau » (Isaïa 9:6), i roto i tō ’outou poti, e ’itehia ia ’outou te hau i rotopū i te mau ’arepurepura’a ’e te mau vero ri’ari’a e ’ohu ra i roto ia ’outou ’e ’ati a’e ia ’outou.

Taua ā mau parau ra tā Iesu i parau i te miti nō Galilea i taua pō vero ra e rā ’ē te tau, tē parau nei ’oia ia ’outou i roto i te mau vero o tō ’outou orara’a : « ’A fa’aea, ’a mania ».

’A tūru’i i ni’a i tōna mana tāmarū

E nehenehe ānei ’outou e feruri i te mea tā te mau pipi i fāri’i i te taime ’a ’ite ai rātou i te mata’i, te ua ’e te miti i te fa’aro’ora’a i te fa’auera’a a tō rātou Fatu ? Te mea noa tā rātou e nehenehe e parau ’o teie ïa, « ’o vai ho’i teie ’o tei fa’aro’o te mata’i ’e te moana ato’a iāna ? » (Mareko 4:41).

’Aita Iesu Mesia i hōho’a i te hō’ē noa a’e ta’ata tei haere nā ni’a i teie fenua. ’Ua haere mai ’oia nō te fa’aora ia tātou. I roto i te ’ō nō Getesemane, ’ua ’aufau ’oia i te ho’o nō tā tātou mau hara ato’a. ’Ua fa’a’oroma’i ato’a ’oia i tō tātou mau māuiui ’e mau ’oto ato’a. Nā teie mamae rahi ’e te mure ’ore i fa’atahe i tōna toto nā te mau poa ato’a (hi’o Luka 22:44 ; Te Ha’api’ira’a Tumu ’e te mau Fafaura’a 19:18).

Te mea tā te Fatu i rave nā roto i te here maita’i roa, tei ni’a atu ïa i tō’u ’aravihi ’ia rave i te reira. ’Ua ’ite rā vau ē, ’ua rave ’oia i te reira nō’u, nō ’outou ’e nō te mau vārua ato’a tei ora na ’aore rā, ’o tē ora mai. ’Ua hōro’a mai ’oia i te mau mea ato’a ’ia ti’a ia tātou ’ia fāri’i i te mau mea ato’a.

E’ita roa te hō’ē ta’ata e ’ite i te mea tā Iesu i māuiui, e fa’aruru rā ’outou ’e ’o vau nei i tō tātou iho mau vero pōiri ’e te maramara. Mai te mea e fa’ateitei ’outou i tō ’outou ’ā’au i te Fatu, e tāmarū ’oia i tō ’outou mau vero, nō te mea ’ua fa’aruru ’oia i te tā’āto’ara’a o te reira. ’Ua mamae ’oia ma te mi’imi’i ’ore nō ’outou, ’e e mana tōna nō te ha’apūai, nō te fa’aitoito ’e nō te ha’amaita’i ia ’outou.

« E tāmarū ’oia i tō ’outou mau vero, nō te mea ’ua fa’aruru ’oia i te tā’āto’ara’a o te reira ».

’Ua fafau mai ’oia, « e hau tā’u e vaiiho ia ’outou nei, ’o tō’u nei hau tā’u e hō atu nō ’outou ; e ’ere mai tā tō te ao nei hōro’a tā’u e hōro’a ia ’outou. ’Eiaha e taiā tō ’outou ’ā’au, ’eiaha ho’i e mata’u » (Ioane 14:27).

Te mau rāve’a nō te fāri’i i te hau

’Ua hōro’a mai te Fatu Iesu Mesia ia ’outou i te mau rāve’a nō te fāri’i i tōna hau. ’Ua parau ’oia : « ’A ha’api’i i te mau mea nō’u nei, ’e ’a fa’aro’o mai na i tā’u mau parau ; ’a hāhaere ho’i i roto i te marū o tō’u nei Vārua, ’e e noa’a ïa ia ’oe te hau i roto iā’u nei » (Te Ha’api’ira’a Tumu ’e te mau Fafaura’a 19:23).

’A ha’api’i mai nō ni’a iāna nā roto i te tuatāpapara’a i tōna orara’a ’e tāna mau ha’api’ira’a i roto i te mau pāpa’ira’a mo’a. ’A fa’ateitei i tō ’outou vārua nā roto i te pure. « ’A ti’a noa … i te mau vāhi mo’a », ’oia ato’a i te hiero (Te Ha’api’ira’a Tumu ’e te mau Fafaura’a 87:8 ; hi’o ato’a 45:32).

’A fa’aro’o i tāna mau parau nā roto mai i te mau peropheta ora. ’A pe’e i te arata’ira’a a te Vārua Maita’i. ’A fa’a’ohipa i te hōro’a hanahana o te tātarahapa. ’A haere mai i tāna ’Ēkālesia ’ia fa’ahoahia, ’ia ha’api’ihia, ’e ’ia fa’a’amuhia i te parau maita’i a te Atua.

’A haere nā roto i te marū o tōna Vārua ma te fa’arirora’a i tō ’outou fare ’ei vāhi i reira tōna Vārua e fāri’ihia ai. ’A tauturu ia vetahi ’ē ’e ’a tāvini iāna ma te ’oa’oa. ’A ha’amana’o, « e vai te hau i roto i te ’ohipa parauti’a ».² ’A tūtava ’ia vai ha’apa’o maita’i noa ’e ’ia riro ’ei « mau ta’ata i pe’e atu i te Mesia ma te hau » (Moroni 7:3).

Mai te mea e ha’api’i mai ’outou, e fa’aro’o, ’e e haere nā muri iho i te Fatu, ’ei reira e tae mai ai tāna fafaura’a rahi : E fāri’i ’outou i tōna hau.

Te fa’aro’o nō te fa’aea hau noa

Ma te fa’aro’o i te Fatu Iesu Mesia, e nehenehe ’outou e « fa’aea hau noa » ’ia tae mai te mau vero o te orara’a i ni’a ia ’outou. E’ita paha te hau e tae ’oi’oi mai, mai tei tupu nō te mau pipi i ni’a i te miti nō Galilea, e ha’apūai rā te Fatu ia ’outou nō te rātere nā roto i te mau vero tā ’outou e fa’aruru atu.

« E ha’apūai te Fatu ia ’outou nō te rātere nā roto i te mau vero tā ’outou e fa’aruru atu ».

E tō’u hoa here, tē fa’a’ite pāpū nei au ē, tē ’ora nei Iesu Mesia.

’Ua here ’oia ia ’outou.

’Ua ’ite ’oia ia ’outou.

Tē hāro’aro’a nei ’oia ia ’outou.

E’ita ’oia e vaiiho ’ōtare noa ia ’outou i roto i tō ’outou taime fifi.

E tae mai te hau mau i roto ’e nā roto ana’e iāna. Tōna hau, nō te mau ta’ata ato’a ïa e fāriu i ni’a iāna.

’A ha’amātau mai ia Elder Uchtdorf

’Ua tomo mai tōna ’utuāfare i roto i te ’Ēkālesia i te matahiti 1947 i Zwickau, Helemani.

I tōna tamari’iri’ira’a, ’ua ta’ahi ’oia i tōna pere’o’o ta’ata’ahi nō te fa’aho’i haere i te ’ahu, nō te tauturu i te ’ohipa ’imira’a faufa’a a tōna ’utuāfare.

I tōna tamari’iri’ira’a, e mau tītīhoria, ’oia ’e tōna ’utuāfare, tei horo ’ē i rāpae i te fenua Zekalovakia e haere atu i Heremani ’e i muri iho mai te fenua Heremani hiti’a o te rā haere atu i Heremani tō’o’a o te rā.

I te matahiti 1973, ’ua tauturu ’oia i te fa’aho’ira’a mai ma te hau i te hō’ē manureva 737 tei haruhia e te mau ta’ata tōtōā.

’Ua fa’aipoipo ’oia ia Harriet Reich. ’Ua tā’ati-pauroa-hia tō rāua fa’aipoipora’a ’e te fa’aipoipora’a o tā rāua mau tamari’i i roto i te hiero nō Bern Helevetia.

Fa’ata’ara’a

1. « E mea pūai te vero », Te mau Hīmene, n 52.

2. « Mā’iti i te maita’i », Te mau Hīmene,, n 144.