E ti’a iā’u te mau mea ato’a nei i te Mesia

Tē fa’a’ite nei te feiā ’āpī nāhea te Mesia i te ha’apūaira’a ia rātou ’ia rave i te mau ’ohipa teimaha (hi’o Philipi 4:13).

E nehenehe tātou e tātarahapa

Noa atu ē, ’ua bāpetizohia vau i te va’ura’a o tō’u matahiti, ’aita vau i rave noa i te mau ’ohipa ti’a. I tō’u taure’are’ara’a, ’ua ha’amata vau i te ’āmui atu i te hō’ē pupu taure’are’a, ’e ’ua ha’amata mātou i te rave i te mau mea tā’u i ’ite e ’ere i te mea maita’i.

I muri a’e i tō tō’u tuahine fa’aipoipora’a, ’ua tauturu mai ’oia iā’u ’ia ho’i mai i te ’Ēkālesia. ’Ua ha’api’i mai au nō ni’a i te faufa’a rahi o te Parau Pa’ari ’e te ha’apa’o-maita’i-ra’a i tō’u tino.

I te hō’ē rā mahana, ’ua rave au i te tahi atu hara rahi. ’Ua tae mai te mana’o ē, e’ita tā’u e nehenehe e fāri’i i te Vārua ’aore rā, i te mana o te autahu’ara’a iā’u nei. ’Ite a’e ra vau iā’u iho e mea faufa’a ’ore ’e ’aita vau i mana’o ē, e ti’a iā’u ’ia fa’aoti i tā’u mau hōpoi’a i te fare purera’a, mai te ha’amaita’ira’a ’e te ’ōperera’a i te ’ōro’a mo’a.

’Ua ha’api’i mai rā te ’evanelia iā’u ē, e nehenehe tā tātou e tātarahapa i te mau taime ato’a. E mea fifi roa ’ia haere e hi’o i tō’u ’episekōpo ’e ’ia fā’i i tā’u hara. E mea fifi ’ia ’ite ē e nehenehe te ta’ata e ’ite mai iā’u ’ia tomo i roto i te piha tōro’a a te ’episekōpo. ’Ua hina’aro rā vau i te hau o te Fatu, ’e ’ua hina’aro vau e tātarahapa.

’Ua pure tō’u ’episekōpo ’e ’o vau ’e ’ua parau mai iā’u e aroha rahi noa te Fatu i te feiā e ’imi i te tātarahapa ’e e nehenehe iā’u ’ia ora mai i tā’u hape. I teienei, ’ua ha’amata vau i te tai’o i te mau pāpa’ira’a mo’a ’e i te pure, ’e ’ua ’ite au ē, e tauturu te reira iā’u ’ia pāto’i i te fa’ahemara’a.

Mai te mea e mea fifi te fa’anahora’a nō te tātarahapara’a nō ’outou, e ti’a ia ’outou ’ia ha’amana’o noa i te hōro’a a Iesu Mesia ’e tāna tāra’ehara temeio. Tē hara nei tātou pā’āto’a ’e tē hape nei tātou, ’e e’ita tātou e fāri’i i te maita’i-roa-ra’a i roto i teie orara’a. Nā roto rā i te tāra’ehara a Iesu Mesia ’e te toto tāna i ha’amani’i nō tātou, e nehenehe tātou e tātarahapa i te mau taime ato’a. Nā roto i te tauturu a te Fatu, e nehenehe tātou e haere i mua e tae atu i te maita’i-roa-ra’a.

Kenneth B., Tona