« Te huru o te Fa’aora i ni’a i te mau vahine », Nō te pūai o te feiā ’āpī, Māti 2023.
Te huru o te Fa’aora i ni’a i te mau vahine
E nehenehe tātou e pe’e i te hi’ora’a o Iesu Mesia i te fa’a’itera’a i te maita’i ’e te fa’atura i te mau vahine i roto i tō tātou orara’a.
Fa’ahōho’ara’a nā Rose Datoc Dall
I roto i te Faufa’a ’Āpī, pinepine Iesu Mesia i te ha’api’i i te mau mea mana’o-’ore-hia. (Mai teie : ’ua tītauhia ia tātou ’ia here i tō tātou mau ’enemi ’e ’ia pure nō te feiā e hāmani ’ino mai ia tātou ?1)
’Ua pāto’i te tahi o teie mau ha’api’ira’a i te ta’ere o taua tau ra. ’Aita rā te Fa’aora i tāmata i te fa’aō i roto. ’Ua tāmata ’oia i te ha’api’i i te hō’ē ture teitei a’e ’e ’ia fa’a’ite ia tātou e nāhea ’ia rave i te tahi ’e te tahi. Tē fa’a’ite ra ’oia i te hō’ē hi’ora’a nō te here tei ’ore i tā’ōti’ahia i te hō’ē fāito matahiti, i te ’āpeni, ’aore rā i te ti’ara’a pātireia.
I te tau o Iesu, ’ua matauhia i te fa’ariro i te vahine ’ei mea ha’eha’a roa. ’E i roto i te tahi mau ta’ere i teie mahana, ’aita te mau vahine e fa’aturahia nei. Penei a’e tē ora nei ’outou i roto i te hō’ē vāhi mai te reira te huru. Mai te mea ’o te reira iho ā, e nehenehe ’outou e fa’a’ite i te hō’ē hi’ora’a mai te huru Mesia i tō ’outou ’oire, ma te fa’a’itera’a i te maita’i ’e i te fa’atura i te mau ta’ata ato’a—tae noa atu i te mau tamāhine ’e i te mau vahine i roto i tō ’outou orara’a.
’Ua aupuru Iesu i tōna metua vahine
’Ua tauturu te temeio mātāmua a Iesu Mesia i mua i te ta’ata i tōna metua vahine. Tei iāna te hōpoi’a i te tauturura’a e fa’a’amu i te ta’ata i roto i te hō’ē fa’aipoipora’a. I te paura’a tā rātou inu, ’ua fa’ariro Iesu i te pape ’ei uaina ’ia nava’i ho’i te reira nā te mau manihini.
E riro paha te huru parau o te pāhonora’a a Iesu i tōna metua vahine i roto i taua ’āparaura’a ra ’ei mea teimaha nō tō tātou tari’a i teie tau :« E aha tā ’oe iā’u nei, e teie nei vahine ? (Ioane 2:4). ’Ua ha’apāpū rā Iosepha Semita ē, tē ani ra Iesu i tōna metua vahine e aha tāna e hina’aro : « ’E aha tā ’oe iā’u nei, e teie nei vahine ? »2. ’E te pi’ira’a i te hō’ē ta’ata « vahine » i terā ra tau, e ti’ara’a fa’atura ïa te reira. Tē parau ra ïa ’oia ē, « Tā’u vahine, te mau mea ato’a tā ’oe e ani mai iā’u ma te fa’aro’o, e hōro’a atu vau i te reira ia ’oe ».3
E nu’u ’oi’oi atu tātou e toru matahiti. Hou ’oia ’a pohe ai i ni’a i te sātauro, te hō’ē o te mau mea hope’a tā Iesu i rave, ’o te ha’apāpūra’a ïa ē, e ha’apa’o-maita’i-hia tōna metua vahine.
« ’Ua parau iho ra ’oia i tāna metua vahine, e teie nei vahine, ’a hi’o na i tō tamaiti ! ’Ua parau iho ra ho’i ’oia i taua pipi here ra, ’a hi’o na i tō metua vahine ! ’E i reira ra ’oia i te arata’ira’ahia atu e taua pipi ra i tōna iho ’utuāfare ».(Ioane 19:26–27).
’Ua fa’a’ite Iesu i te fa’atura i te mau vahine i ti’avaruhia
E piti hi’ora’a tā tātou nō te Fa’aora i te fa’a’itera’a i te fa’atura i te mau vahine tei ti’avaruhia e te tōtaiete.
I te tau o te Fa’aora, e vahavaha te rahira’a o te mau ’āti Iuda i te nūna’a ta’ata nō Samaria. Terā rā, i te fārereira’a Iesu Mesia i te hō’ē vahine nō Samaria i te ’āpo’o pape, ’ua fa’a’ite ’oia iāna i te aroha ’e te fa’atura. Hau atu i te reira, ’a paraparau ai ’oia iāna i fa’a’ite ai ’oia iāna nā mua ’ei Fa’aora i fafauhia ra !4 (Hi’o Ioane 4.)
I te tahi atu tupura’a, ’ua topa te hō’ē vahine i roto i te hō’ē hara rahi. ’Ia au i te ture ’āti Iuda, e pehīhia ’oia i te ’ōfa’i e pohe roa atu ai. I tō te feiā fa’atere ’āfa’ira’a i teie vahine i mua i te Fa’aora, ’ua ui ’oia ia rātou i te hō’ē uira’a tei ha’aferuri ia rātou. ’Aita a’era rātou i hina’aro e pehī iāna i te ’ōfa’i. I muri iho, ’ua ani atu ra te Fa’aora iāna ’ia tātarahapa, ma te parau ē, « ’a haere, ’eiaha rā ’ia hara fa’ahou » (Ioane 8:11).
’Ua fā Iesu i te mau vahine i muri mai i tōna ti’afa’ahoura’a
I muri a’e i te ti’afa’ahoura’a o Iesu, ’ua fārerei mātāmua ’oia ia Maria Magadala, tē ’oto ra i tōna mēnema (hi’o Ioane 20:11–18). Te tahi atu mau vahine—’o Jeanne ’e ’o Maria te metua vahine o Iakobo—’o rātou tei ’ite mātāmua i te Fatu tei ti’afa’ahou. ’Ua ani te mau melahi ia rātou ’ia fa’a’ite i tō rātou ’itera’a pāpū nō te mea tā rātou i ’ite. (Hi’o Luka 24:1–10.)
E nehenehe tātou e pe’e i tōna hi’ora’a
E aha tā tātou e nehenehe e rave nō te pe’e i te hi’ora’a fa’atura o te Fa’aora nō te mau vahine ?
E rave rahi mau ravera’a tā tō tātou peropheta, te peresideni Russell M. Nelson, i roto i teie tuha’a. ’Ua fa’a’amu ’oia ’e tāna vahine ’o Dantzel e iva tamāhine ’e hō’ē tamaiti. I muri iho ’ua pohe Dantzel, ’ua fa’aipoipo ’oia ia Wendy Nelson.
’Ua ha’api’i ’oia, « e fa’atura tātou i te mau tuahine—’eiaha i roto noa i tō tātou mau fēti’i fātata, i te mau tuahine fa’ahiahia ato’a rā i roto i tō tātou orara’a ».5
E rave ana’e i teie ’āva’e ’ei ’āva’e nō te itoito, te here huru Mesia ’e te hāmani maita’i i te mau vahine i roto i tō tātou orara’a. ’Ua nava’i tō ’outou pūai nō te taui i te ao nei, hō’ē auta’atira’a i te taime hō’ē !