Parau ’āfaro atu

Tē perē moni nei tō’u mau hoa. ’Ua ’ite au e mea ’ino te reira. Nāhea vau i te fa’ata’a atu i te reira ia rātou ?

niuniu ’āfa’ifa’i ma te rāve’a perēra’a moni tū’aro

Te aura’a o te perē moni ’o te fa’a’ohipa-ataata-ra’a ïa i te moni i ni’a i te mau ha’uti ha’amoemoeā ’aore rā i te pāriera’a i te hō’ē tino moni i ni’a i te tahi mau mea. « Tē pāto’i nei ’e tē a’o nei te ’Ēkālesia ’ia ’ape i te mau huru perēra’a moni ato’a. Tei roto i te reira te mau pāriera’a tū’aro ’e te mau perēra’a ato’a e turuhia e te fa’aterera’a hau » (Buka arata’i rahi : Tāvinira’a i roto i Te ’Ēkālesia a Iesu Mesia i te Feiā Mo’a i te Mau Mahana Hope’a Nei, 38.8.17, ChurchofJesusChrist.org).

Tē ’ape nei tātou i te perēra’a moni nō te tahi mau tumu rau. E ’ere noa te reira i te ha’amāu’ara’a taime ’e te moni, e nehenehe ato’a rā te reira e ha’afifi i te orara’a o te ta’ata. E nehenehe te reira e riro mai ’ei hia’ai, e tae roa atu ’ei fa’atītīra’a.

Hau atu, tē ha’api’i nei te perēra’a moni e nehenehe e roa’a mai te hō’ē mea ia ’outou ma te ’ohipa ’ore. E parau fifi ’e te ha’avare te reira. E ’ohipa pāpū ’ore ’e te ti’aturi ’ore te upo’oti’ara’a i ni’a i te perē moni. Te manuiara’a nō tā ’outou ’ohipa, ’ua hau atu ïa i te māuruuru, te pāpū ’e te vai maoro.

Mai te mea tē vai ra tō ’outou mau hoa e ha’uti ra i te perē moni, e nehenehe ’outou e tāmata i te tauturu ia rātou. E nehenehe ’outou e parau ia rātou—’e, hau atu i te faufa’a, e fa’a’ite ia rātou—ē tē vai ra te mau rāve’a maita’i a’e nō te fa’a’ohipa i tō ’outou taime ’e tā ’outou moni. E nehenehe ’outou e fa’a’ite ia rātou ē, e maita’i a’e te orara’a ’ia ’ore ana’e ’outou e ha’afifi i tā ’outou moni ’e tō ’outou au maita’i i ni’a i te hō’ē peu o te fa’atupu i te pāpū ’ore ’e te ’ati i ni’a i te mau ta’ata e rave rahi.

Nō te ’ite hau atu, ’a hi’o Gordon B. Hinckley (1910–2008), « Te perēra’a moni », ’āmuira’a rahi nō ’Ēperēra 2005.