Te a’o nā ni’a i te a’o

Haere mai iāna ra

Tē ani manihini mai nei te Fa’aora ia tātou ’ia tu’u atu i tā tātou mau hōpoi’a i ni’a iāna.

Fa’ahōho’ara’a nā Annie Henrie Nader

Mataio 11:28-30

28 E haere mai ’outou iā’u nei, ’e te feiā ato’a i ha’a rahi ’e tei teiaha i te hōpoi’a, ’e nā’u ’outou e fa’aora.

29 ’A rave mai i tā’u zugo i ni’a ia ’outou, ’e ’ia ha’api’ihia ’outou e au, tē marū nei ho’i au ’e te ha’eha’a o te ’ā’au : ’e e noa’a ho’i te ora i tō ’outou vārua.

30 Tē marū, nei ho’i tā’u zugo, ’e tē māmā nei tā’u hōpoi’a.

Haere mai iā’u nei

E nehenehe tātou e haere i te Fa’aora ra nā roto i te ha’api’ira’a mai i tāna ’evanelia, te noa’ara’a te fa’aro’o iāna, ’ia tātarahapa tātou, te ravera’a ’e te ha’apa’ora’a i te mau fafaura’a ’e te pe’era’a i tōna hi’ora’a.

ha’a rahi … teiaha te hōpoi’a

E nehenehe te ’ohipa pae tino ’e te mau hōpoi’a pae tino e fa’arohirohi ia tātou, nā reira ato’a te mau tauto’ora’a i te pae ferurira’a, i te pae manava ’e i te pae vārua. ’Ua pūpū mai te Fa’aora i tōna hau ia tātou, noa atu te huru o te hōpoi’a tā tātou e amo nei.

zugo

E mauiha’a te zugo nō te tāvaha ’āmui e piti ’ānimara, ’ia nehenehe ia rāua ’ia huti ’āmui i te hō’ē ’ohipa, mai te hō’ē ’ārote ’aore rā, te hō’ē pereo’o. I te rahira’a taime, tē vai ra te rā’au tārava i ni’a i te tāpono o te ’ānimara tāta’itahi, nō te ’ōpere i te teiahara’a.

ha’api’i mai

E nehenehe tātou e ha’api’i mai nō ni’a ia Iesu Mesia nā roto i te tuatāpapara’a i tāna mau ha’api’ira’a ’e tōna hi’ora’a maita’i—’e nā roto i te tāmatara’a i te pe’e i te reira.

fa’afa’aeara’a

Te fa’afa’aeara’a o te Fa’aora ’o tōna ïa hau, ’o te tāmarū i tō tātou ferurira’a ’e tō tātou vaerua. E tauturu ’oia ia tātou ’ia fa’a’oroma’i i te mau ha’ape’ape’ara’a o teie nei ao ’e e hōro’a mai ia tātou i te pūai pae vārua ’ia ite ana’e tātou i te paruparu.

’ōhie … māmā

Te ravera’a i te zugo a te Fa’aora i ni’a ia tātou ’o te tā’amura’a ïa ia tātou iho i ni’a iāna nā roto i te mau fafaura’a. Te aura’a o te hōro’ara’a ïa i tō tātou ’ā’au iāna ’e i tāna ’ohipa. ’Ia nā reira ana’e tātou, e māmā a’e tā tātou mau hōpoi’a nō te mea tē tauturu mai nei ’oia ia tātou.