« Iesu Mesia : Te hau i rotopū i te mau vero », Nō te pūai o te feiā ’āpī Māti 2023.
Mai, pe’e mai
Iesu Mesia : Te hau i rotopū i te mau vero
I te tahi mau mahana, e riro paha ’outou i te fa’a’āueuehia e te mau vero o te orara’a. E mana rā tō Iesu Mesia nō te hōpoi mai i te hau ia ’outou, ’o tā ’outou e ’ore e ’ite i te tahi atu vāhi.
’A fa’aea, ’a mania, nā Yong Sung Kim
I te ’āfara’a o tā’u matahiti hōpe’a i te ha’api’ira’a tuarua, ’ua fāri’i au i te hō’ē ’ohipa māere rahi. ’Ua pi’ihia tō’u nā metua nō te peresideni i te misiōni nō Urutue Montevideo, te aura’a ra e haere atu rāua i te tahi atu hope’a o te ao ’e tō’u nā teina taea’e ’e tuahine e maha. ’Ua pe’ape’a a’ena vau nō ni’a i te noa’ara’a tā’u parau tū’ite nō te ha’api’ira’a tuarua, i teienei rā e haere au i te fare ha’api’ira’a tuatoru ’o vau ana’e, ’e tō’u ’utuāfare i ni’a i te tahi atu fenua ra’ituāta’a. E ri’ari’a rahi tō’u.
’Ua riro tā’u tauira’a i te ha’api’ira’a tuarua nō te ha’api’ira’a tuatoru, ’ei mea fifi roa nō’u. Noa atu ’ua hā’atihia vau e te mau hoa piha maita’i ’e te rahira’a tauatini pīahi, ’aita ā vau i mo’emo’e a’enei mai terā te huru. E mea teimaha roa te mau fa’ahepora’a o te ha’api’ira’a. ’Aita vau i ’ite e aha tā’u e hina’aro e tuatāpapa, ’e ’ua hi’o e mea fifi roa te mau ha’api’ira’a. ’Ua ’aro ato’a vau i te hō’ē autā’atira’a rāmā i te pae mānava, tei fa’atupu i te hō’ē fifi teimaha i ni’a i te ea o tō’u ferurira’a. ’Ua fa’ateimaha roa tō’u mata’u nō te ananahi iā’u.
’Aita i maoro roa, ’ua ha’afifi roa tō’u mau mana’o hepohepo, te mata’u ’e te mo’emo’e iā’u, ’ia ’ohipa maita’i. ’Oia ato’a te mau ’ohipa mātarohia, e au ra e’ita e nehenehe e rave. I te hō’ē po’ipo’i, tē ani ra vau i te Metua i te ao ra ’ia hōro’a mai iā’u i te pūai, ’ia hope terā mahana iā’u. « E’ita e ti’a iā’u ’ia tāmau noa i te rave i te reira, ’o vau ana’e », ’ua pure au. I roto i te hō’ē taime varavara o te māramarama i te pae ferurira’a ’e te mānava, ’ua tae mai te mau parau i roto i tō’u mana’o « ’aita e ti’a ia ’oe e rave i te reira ». ’Ua ’ī a’era tō’u ferurira’a i te hau. ’Ua marū te vero i roto i tō’u ferurira’a.
’Aita i fifi roa te mau ’āva’e (’e te mau matahiti) i muri mai. Aita tō’u mau mana’o hepohepo ’e te vai-’ōtahi-ra’a i mo’e tā’ue noa. Nō te taime mātāmua rā, ’ua māramarama a’era vau i te aura’a, ’ia vai te hō’ē Fa’aora. ’Ua ’ite au ē, ’ua ta’a iāna i tō’u mau tāmatara’a ’e tō’u māuiui. ’Ua ’ite au ē, ’o ’oia ana’e te ta’ata e nehenehe e tauturu iā’u, ’e ’ua nā reira ’oia.
E rave rahi matahiti i muri mai, e misiōnare au tei ho’i mai nā te misiōni, ’ua roa’a tā’u parau tū’ite nō te ha’api’ira’a tuatoru, ’e ’auae ’ua fa’aipoipohia. ’E ’ua ’ite au e’ita vau e rave fa’aoti i te hō’ē o teie mau fā, ’āhiri ē ’aita vau i ti’aturi i te Fatu.
Hōho’a nā Getty Images
’A fa’aea, ’a mania
’Ua taoto Iesu i ni’a i te poti ’e tāna mau ’āpōsetolo, ’a tupu ai te hō’ē vero rahi. ’Ua fa’aara te mau ’āpōsetolo ia Iesu i te na ’ōra’a ē, « e te ’orometua, e’ita ’oe e ha’apa’o mai i tō mātou nei pohe ? » (Mareko 4:38). I te taime mau ’a mana’o ai rātou ē, e pohe rātou i roto i te vero ’ū’ana, ’ua ti’a mai ra te Fatu ’e ’ua « ’avau atu ra i te mata’i, ’e ’ua na ’ō atu ra i te ’are, ’a fa’aea, ’a mania. Pohe iho ra te mata’i, mania roa atu ra » (Mareko 4:39).
E hia taime i roto i tō ’outou orara’a tō ’outou uiui-noa-ra’a ē, « e’ita ’oe e ha’apa’o mai i tō’u nei pohe ? » I te tahi taime, ’ia ora ana’e ’outou i te mau tāmatara’a fifi, e mea ōhie ’ia ’ite i te ’ōtahira’a ’e te ferurira’a ’o ’outou ana’e. E uiui paha ’outou nō te aha ’aita te Fatu e tāmarū i tō ’outou mau vero. E au ra te reira ē, e’ita roa atu tō ’outou orara’a e tae i taua « hau rahi ra » tā te ’īrava 39 e parau nei.
Terā rā, te tuha’a faufa’a roa o teie ’ā’amu ’o te parau tumu ïa tā te Fa’aora i ha’api’i i muri iho. ’Ua parau ’oia : « E aha ’outou i mata’u hua ai ? Nō te aha ’aita tō ’outou e fa’aro’o ? » (Mareko 4:40). I roto i tō rātou taime ri’ari’a ’e te pe’ape’a, ’ua mo’ehia i te mau ’āpōsetolo tei pīha’i iho rātou ’ia vai. Tē ta’oto ra te Tamaiti a te Atua, tei hāmani i te fenua i ni’a i tō rātou poti. Nō te aha rātou i mata’u ai ?
’Oia ato’a, e mana tō te Fa’aora nō te tāmarū i te mau huru vero ato’a i roto i tō ’outou orara’a. E nehenehe ’oia e fa’aora i tō ’outou māuiui, e ha’amāmā i tā ’outou mau hōpoi’a, ’e e hōro’a mai i te māramarama ’ia vai ana’e ’outou i roto i te pōiri. Tā ’outou tuha’a i roto i teie fa’anahora’a ’o te fa’a’ohipara’a ïa i te fa’aro’o rahi a’e ia Iesu Mesia.
Te ’imira’a mai i te pūai o te Fatu.
Te orara’a ma te fa’aro’o rahi atu ā, e nehenehe te reira e hōro’a mai i te mana pūai atu o te Mesia i roto i tō ’outou orara’a. ’A fa’aoti ai Razafimalaza, nō Matetāta, i te hō’ē matahiti ha’api’ira’a fifi mau, ’ua pohe tōna metua vahine fēti’i. ’Ua pe’ape’a roa ’oia. Fātata roa e’ita tāna e nehenehe e fa’atumu i ni’a i te ha’api’ira’a. Tē fa’aineine ra ’oia nō te mau hi’opo’ara’a hope’a o te matahiti. ’Ua pure ’oia, « ’a rave ’ē atu na i tō’u ’oto ’e ’a hōro’a mai iā’u i te pūai nō te haere i te hi’opo’ara’a ananahi ». I muri a’e i te pure, ’ua fāri’i Razafimalaza i te pūai. « Mai te huru ra ē, ’ua mo’ehia iā’u tō’u ’oto », tāna ïa i parau. « ’Ua hōro’a mai te Atua iā’u i te pūai nō te rave i te mau mea ato’a ».
E mea faufa’a roa ’ia ha’amana’o ē, i te tahi taime e tāmarū te Fatu i te mau vero i roto i tō ’outou orara’a, ’e i te tahi taime, e tāmarū ’e e tāmāhanahana ’oia ia ’outou, ’a ’ū’ana noa ai te vero. Mai te mea e fa’aro’o tō ’outou iāna, e ti’aturi ato’a ïa ’outou i tōna hina’aro ’e i tāna tārena. E ti’aturi ’outou ē, e tauturu ’oia ia ’outou, noa atu e aha te taime e tae mau mai ai tō ’outou hau ’e te tāmarūra’a.
Te ti’aturira’a i tāna tārena
’Ua mātaro roa te hō’ē tamāhine ’o Ann te i’oa i te mau mana’o taiā. « Tē fa’aruru nei au i te ahoaho rahi ’e te ADHD marū », tē nā reira ra ’oia. « I te tahi taime, e hōro’a ma te reira i te mana’o ē, ’aita vau e ta’ahia mai ra e vetahi ’ē, ’e e mea fifi ’ia tāpe’a noa i te hō’ē hi’ora’a ’ātea,mure ’ore. ’Aita i maoro a’enei, ’ua tai’o vau i roto i te Genese nō ni’a ia Sara, tei tīa’i e rave rahi matahiti hou ’a fāri’i ai i te hō’ē tamari’i. ’Ua ’ite a’era vau ē, e ti’a iā’u ’ia tīa’i maoro ato’a e ora ai au. ’Ua ’ite au ē, e’ita te Mesia e fa’aru’e iā’u, ’ia ’ite ana’e au i te pe’ape’a. Tei reira ’oia nō te tauturu iā’u i roto i te reira ».
Te mā’itira’a ’ia ti’aturi i te Fatu e ’ere te aura’a ē, e ti’a ia ’outou e tau’a ’ore i te mau tāmatara’a rahi o i tō ’outou orara’a. Maori rā, tōna aura’a ’oia ho’i e ti’a ia ’outou ’ia « rōtahi i ni’a i te rahi hope ’ore, te maita’i ’e te mana hope o [tō ’outou] Atua, e ti’aturi iāna … ma te ’ā’au ’oa’oa ».1 ’Ia vai ’ōtahi ana’e ’outou, tē ’oto ra, tē hepohepo ra, ’aore rā tē tīa’i ra i te mau ha’amaita’ira’a tei fafauhia mai, ’a ha’amana’o i teie uira’a : tē tīa’i ra ānei ’outou i te « hō’ē tāmarūra’a rahi » ma te ’ā’au taiā ’aore rā ma te ’ā’au ha’apa’o maita’i ?