Te rirora’a ’ei ’aito mau

Nā Priscilla Biehl Motta ’e Jessica Zoey Strong

Te mau ve’a a te ’Ēkālesia

’O Felipe te hō’ē ’o te mau ta’ata maita’i roa a’e nā te ao nei nō te taputō tama’i, mai te kārātē, te taputō tāpōne ’e te MMA. Te tāvinira’a rā i te hō’ē misiōni ’o tāna ïa tītaura’a mātāmua roa.

Mau hōho’a nā Shirley Brito

Felipe F. nō Pará Peretīria, ’aita tōna matahiti i tae’ahia 18. ’Ua tomo ’oia i roto i te mau tata’ura’a ’aravihi nō te tapurō tama’i ’āmui (MMA), te taputō tāpōne, ’e te kārātē. ’E e mea maita’i roa ’oia i roto i te ’ohipa tāna e rave ra. ’Ua manuia ’oia i roto te tata’ura’a MMA Iron Man nā te ao nei. E ’aito ’oia e 2 taime nō te tuha’a fenua Pará, e ’aito nūmera piti nō Peretīria, ’e e ’aito nūmera piti nō te ao nei nō te taputō tāpōne. E ’aito ’oia e 10 taime nō te tuha’a fenua Pará, e ’aito ’oia e 10 taime nō Peretīria, e ’aito nō Amerika apato’a, e ’aito nō Pan-American, ’e e ’aito e 3 taime nō te ao nei nō te kārātē. Waouh !

Te mau tumu nō tōna manuiara’a

’Ua ha’api’ipi’i noa Felipe mai te hitura’a o tōna matahiti. Tē ti’aturi nei rā ’oia ē, te tumu rahi mau o tōna manuiara’a ’o te Atua ïa. « E pure au i te mau taime ato’a nō te tauturu a te Fatu », tē parau ra ’oia.

I roto i tāna tata’ura’a hope’a o te kārātē nō te Pan-American, ’aita Felipe i ti’aturi roa. I muri iho rā, ’ua hōro’a tōna pāpā i te hō’ē ha’amaita’ira’a autahu’ara’a. « I muri a’e te reira, ’ua maita’i a’e tō’u ferurira’a, ’e ’ua tauturu te reira iā’u ’ia upo’oti’a i te tata’ura’a i taua mahana ra. Hō’ē ana’e tetoni e toe ra, nō nā ’arora’a hope’a e piti i rē ai au. ’Ua mana’o te ta’ata ē, e’ita e roa’a. ’Ua rave au i te hō’ē ’ohipa mana’o-’ore-hia tei tauturu iā’u ’ia upo’oti’a, ’e nō’u nei, maoti ïa te ha’amaita’ira’a a tō’u pāpā.

’Ua hōro’a tōna pāpā iāna e rave rahi ha’amaita’ira’a i te roara’a o te mau matahiti. ’Ua ’ite Felipe ē, te fāri’ira’a i te hō’ē ha’amaita’ira’a e ’ere ïa te aura’a ē, e upo’oti’a noa ’oia, tē ti’aturi nei rā ’oia ē, e tauturu te Fatu iāna ’ia vai rōtahi noa ’e ’ia ha’amaita’i i tōna mau tārēni. « E tauturu te reira iā’u ’ia ti’aturi rahi a’e », ’ua parau Felipe. « ’Ua ’ite au ē, noa atu te huru o te hope’ara’a, tei reira te rima o te Fatu ».

’Ua riro ato’a te toe’a o tōna ’utuāfare ’ei pāturura’a rahi. I te hō’ē tata’ura’a MMA, ’ua ’ite Felipe i tōna ’utuāfare i ni’a i te mau vāhi pārahira’a. « Tei reira rātou pā’āto’a nō te pōpō i tō’u i’oa. ’Ua vai māmū noa vau ». ’Ua parau fa’ahou ’oia, « tē māuruuru rahi nei au i tō’u metua tāne ’e tō’u metua vahine, tei fa’a’ite iā’u i te ’ē’a ti’a ».

’Ua fa’a’ite Felipe ē, ’ua tauturu te pe’era’a i taua ’ē’a ra iāna i roto i tāna tū’aro. Pinepine tōna mau hoa i te fa’ao’ō’o iāna ’ia ’ore ana’e ’oia e rave i te mau mea tā rātou e rave ra. ’Aita rā Felipe e tātarahapa nei nō te reira. « Mai tā te ’evanelia e hōro’a mai i te mau ha’amaita’ira’a, i roto i te tū’aro, e hōro’a ato’a mai te reira i te mau manuiara’a ! Te ’orera’a e haere e ’ārearea ’e tō’u mau hoa ’e te ’amura’a i te mau mea maita’i, e fa’auru mai i te fa’ahope’ara’a ».

Te fa’aotira’a e tāvini i te hō’ē misiōni

I teienei e 18 matahiti tōna, e mea rahi rāve’a tā Felipe. ’Aita i maoro a’enei, ’ua anihia ’oia ’ia ha’api’ipi’i i roto i te hō’ē fare ha’api’ira’a tuiro’o nō te MMA, ’e ’ua fāri’i ’oia e rave rahi mau anira’a nā te ao nei, nō te riro ’ei fa’atere. ’Ua hina’aro rā ’oia e tāvini nā mua i te hō’ē misiōni.

« Nō’u nei, e mā’itira’a ’ōhie te reira », tāna ïa i parau. « Tei te pārahira’a mātāmua te Fatu. E nehenehe te toe’a e tīa’i, nō te mea e ha’amaita’i noa ’oia ia ’outou nō tō ’outou ha’apa’o ».

’Ua riro te tua’ana pa’ari o Felipe, ’o Júnior, tei ho’i mai nā te misiōni ’aita i maoro a’enei, ’ei tuha’a nō tōna ’ana’anatae rahi. ’Ua parau ’oia ia Felipe ē, ’aita e mea maita’i a’e i te tāvinira’a i te hō’ē misiōni, ’e ’ia haere iho ā ’oia noa atu ē, e tāmata te ta’ata i te tāparu iāna ’eiaha e haere.

’E tē vai rā te ta’ata tei parau ia Felipe ’ia fa’aea mai. E rave rahi ta’ata i roto i tōna fēti’i e ’ere i te melo nō te ’Ēkālesia. « ’Aita rātou i ta’a nei ē, e mea faufa’a a’e te tāvinira’a i te hō’ē misiōni i te rirora’a ’ei ta’ata tao’a rahi ’e te tu’iro’o. E tāmata noa vau i te ha’api’i i te ’evanelia ’ia tae ana’e mai taua mau taime ra », tē parau ra Felipe. ’E ’ua arata’i te hō’ē o taua mau taime ra i te hō’ē ’itera’a misiōnare pūai mau.

Nō pohe noa atu nei te taea’e fēti’i o Felipe, ’e tē ’oto nei te metua tāne fēti’i nō te pohe o tāna tamaiti. ’Ua paraparau Felipe i tōna metua tāne fēti’i nō ni’a i te fa’anahora’a nō te fa’aorara’a. I muri iho, ’ua tauahi tōna metua tāne feti’i iāna ’e ’ua tātarahapa i te paraura’a iāna ’eiaha e haere i te misiōni. Tē ha’amana’o ra Felipe ē, « ’ua parau mai ’oia iā’u ē, ’ua fāri’i au i te hōro’a nō te ha’aputapū i te ’ā’au o te ta’ata ’e ’ua tītauhia iā’u ’ia tāvini ». « ’Ua riro taua taime ra ’ei taime ta’a ’ē mau nō’u, ’a hāro’aro’a ai te hō’ē ta’ata ’aita roa atu tōna hō’ē ’itera’a nō ni’a i te hō’ē misiōni ’e tōna fā mau ».

’Ua fāri’i Felipe i te tahi mau taime ē ’aita ’oia iho i pāpū maita’i nō te hō’ē misiōni. « E tai’o vau i tā’u mau pāpa’ira’a mo’a i te mau mahana ato’a, ’e i te hō’ē pō ’ua fē’a’a rahi au nō ni’a i tā’u mā’itira’a. ’Ua ha’amata a’era vau i te feruri ē, ‘’e fa’aea paha vau ’e e tata’u ā ma’a taime ri’i ā ?’ I muri iho rā, ’ua tai’o vau i roto i te Buka a Moromona nō ni’a i te ’ati Nephi i te ha’amatara’a ’ia riro ’ei mau ta’ata māuruuru ’ore ’e te te’ote’o. ’Ua ha’api’i Iakoba ia rātou ē, e tītauhia ia rātou ’ia tu’u i te Fatu nā mua roa. [Hi’o Iakoba 2:12–21.] I taua taime ra, ’aita vau i fē’a’a nō ni’a i tā’u mā’itira’a ».

« I teie mahana, ’ua ’ite au i te mea tā’u e hina’aro, ’e ’ua ’ite au ē e ho’i mai au nā tā’u misiōni ’e e ha’amaita’ihia vau noa atu te huru. I roto paha i te MMA ’aore rā i te tahi atu mea, ’ua ’ite rā vau e hōro’a mai te Atua ia tātou i te mea e hina’arohia nō tātou ».

Te mana o te fa’afāriura’a tāmahana

’Aita Felipe i ’ana’anatae rahi roa i te mau taime ato’a ’e i te ti’aturi rahi nō ni’a i te hō’ē misiōni—’aore rā, nō te ’Ēkālesia. « ’Ua tupu mai te hō’ē taime i roto i tō’u orara’a e ’ere au i te mea pūai roa i roto i te ’evanelia, e au ra iā’u tē vai ra hō’ē ’ohipa e ’erehia ra », tāna ïa parau. « Tē ’ite ra ’outou i terā huru ta’ata e haere noa i te purera’a ’e ’aita e rave ra i te tahi mea ? ’O vau ïa ». I muri a’e i te paraparaura’a i tōna taea’e ’e te ’episekōpo nō ni’a i te tāvinira’a i te hō’ē misiōni, ’ua fa’aoti ’oia e ha’amata i te pure ’e i te tai’o i te mau pāpa’ira’a mo’a i te mau mahana ato’a.

« Tē mana’o nei au te mea tei tauturu iā’u ’o te fa’afāriura’a tāmahana ïa. ’Ua pa’ari au i roto i te ’Ēkālesia, ’e i te tahi tau ’aita vau i ’imi i te fa’afāriura’a nō te mea ’ua pa’ari au i roto i te hō’ē ’utuāfare ma te hō’ē ti’aturira’a ’e te mana’o ē, ’ua nava’i te reira. I teienei rā, tē ’imi nei au i te hō’ē ’itera’a pāpū i te mau mahana ato’a ».

E ’aito maoti te Fatu

’Ua ’ite Felipe ē, e ’ere te mā’itira’a i te maita’i e fa’a’itera’a ē, e manuia ’oia i te mau taime ato’a ’aore rā e tere te mau mea ato’a mai tāna i mana’o. « Tē ha’amana’o nei au i te haerera’a vau i te hō’ē tata’ura’a ma te mana’o ē, ’ua ineine au, ’e ’ua pau vau i roto i te tuha’a mātāmua. I te tahi atu taime tei te fare au, ’ua pēpē. Tē ha’amana’o nei au i te arara’a mai i te po’ipo’i roa, te hi’ora’a i ni’a i te aroaro, ma te uiuira’a iā’u iho e ho’ona ānei te reira. I te tahi taime, ’ua hina’aro noa vau e fāriu ’ē atu ’e e ta’oto fa’ahou, terā rā ’ua ti’a mai au i ni’a ’e ’ua haere i te ha’api’ipi’ira’a. Te rirora’a ’ei ’aito e haere ïa i ni’a atu i te taime o te upo’oti’ara’a. ’O te hō’ē ïa ta’ata e fa’aoroma’i i te mau mahana ato’a, e fa’aoroma’i i te manuia-’ore-ra’a, e fa’aoroma’i i te mau tāmatara’a.

’Ua ’ite ’Felipe ē, te mā’itira’a i te maita’i e ’ere i te fa’a’itera’a ē, e upo’oti’a noa ’oia ’aore rā e tupu te mau mea mai tāna e hina’aro.

’O te Fa’aora te ’ana’anataera’a a Felipe nō te fa’aoroma’i i roto i te mau huru ato’a o te orara’a. « Mai te mea e hina’aro tātou ’ia riro mai iāna te huru, tītauhia ia tātou ’ia rave mai tāna e rave ra, ma te tāmatara’a ’ia vai pāpū noa, ’ia ha’apūai ia tātou iho ’e ’ia feruri i te mea tāna e rave. Nā te reira e fa’auru iā’u i roto i tā’u mau ’ohipa e rave i te mau mahana ato’a, ’ia riro mai iāna te huru. ’Ia ’ite ana’e au i te hō’ē mea ’o tā’u e nehenehe e taui, e pure au ’e e ani i te fa’a’orera’a hara, ma te tāmatara’a ’ia riro ’ei ta’ata maita’i a’e noa. Hō’ē ’aito mau ’o te ta’ata ïa e topa e rave rahi taime, ’e noa atu i roto i te ’ino’ino, e ti’a mai ’oia ’e e tāmau i te haere i mua ».

« E ’aito vau maoti te Fatu », ’ua parau Felipe. « ’Āhiri e ’ere nōna, ’aita ïa vau i ’ite i hea vau e vai ai. ’Ua pāpū rā iā’u ē, e’ita vau e fāri’i i te tā’āto’ara’a o te mau mea e mauhia nei e au i teie mahana. ’Ua fa’ariro te orara’a i te ’evanelia iā’u ’ei ’aito i roto i te orara’a ’e i roto i te tū’aro.

Nota : Mai te taime ’a pāpa’ihia ai teie parau, ’ua ha’amata Felipe i tāna tāvinira’a i roto i te misiōni nō São Paulo apato’a i Peretīria.