« Te mau parau tumu rarahi, te mau mā’itira’a ta’a ’ē », Nō te pūai o te feiā ’āpī, Māti 2023.
Te mau parau tumu rarahi, te mau mā’itira’a ta’a ’ē
Nāhea ’outou i te fa’a’ohipa i te mau parau tumu rarahi i roto i te mau tupura’a ta’a ’ē i roto i tō ’outou orara’a ?
Faʼahōhoʼaraʼa nā Josh Talbot
Teie e toru fa’ahitira’a parau nō roto mai e toru peropheta ta’a ’ē. ’A hi’o na e ’itehia ānei ia ’outou te hō’ē parau tumu ’aifāito :
« ’Ei pa’ari ho’i tō ’outou na ; e aha atu ā te ti’a iā’u ’ia parau atu ? »
« ’Aita e ti’a iā’u ’ia fa’a’ite atu ia ’outou i te mau mea ato’a ē hope roa a’e e hara ai ’outou ».
« E ha’api’i au ia rātou i te mau parau tumu ti’a, ’e e fa’atere rātou ia rātou iho ».
Mai te huru ra ē, tē hōro’a mai nei te mau peropheta ia tātou i te mau parau tumu o te ’evanelia a te Fatu ’e ’a vaiiho mai ai i te reira ia tātou ra nō te ora i te reira. ’Aita rātou e hōro’a mai nei i te mau ha’apāpūra’a hope’a ato’a. Nō reira, nāhea tātou ’ia rave i tā rātou mau ha’api’ira’a ’e ’ia fa’a’ohipa i te reira ?
Nāhea ’outou i te fa’a’ohipa i te mau ha’api’ira’a a te mau peropheta ?
E hōro’a mai te mau peropheta ia tātou i te mau fa’auera’a nō ’ō mai i te Fatu ra. E ha’api’i ato’a mai rātou ia tātou i te mau parau tumu ’e te mau arata’ira’a ’o tē tauturu ia tātou ’ia fa’a’ohipa i te mau parau mau ’e te mau fa’auera’a mure ’ore—’ei hi’ora’a, i roto i te buka arata’i Nō te pūai o te feiā ’āpī.
I te tahi taime rā, e uiui te mau melo o Te ’Ēkalesia a Iesu Mesia i te Feiā Mo’a i te mau Mahana Hope’a nei nō ni’a i te mau ha’apāpūra’a—te mau mea ta’a ’ē e ti’a ia tātou ’ia rave nō te ora maita’i a’e i te mau parau tumu ’e te mau fa’auera’a o te ’evanelia. ’Ei hi’ora’a, e uiui pāpū paha te ta’ata e aha te huru ’ahu e fa’a’ite nei i te fa’atura tano nō tō rātou tino. ’Aore rā e uiui paha rātou ē, e aha tē ti’a mau ia rātou ’ia rave i te mahana sābati nō te ha’amo’a i te reira.
E nehenehe te mau parau tumu rarahi e fa’a’ohipahia nā roto i te mau huru ta’a ’ē nā terā ’e terā ta’ata, e nehenehe rā tātou e ’imi i te arata’ira’a a te Fatu ’ia rave ana’e tātou i tā tātou iho mau mā’itira’a, ’ia ti’a ia tātou ’ia ha’afātata atu ā i te Atua.
E hōho’a tauturu
I te hō’ē taime, ’ua fa’ata’a mai te peresideni Russell M. Nelson e mea nāhea tōna ravera’a i te mau mā’itira’a nō ni’a i te ha’amo’ara’a i te mahana sabati :
« ’Ua ha’api’i mai au nā roto i te mau pāpa’ira’a mo’a ē, tā’u peu ’e tō’u huru i te mahana sābati ’ua riro ïa ’ei hō’ē tāpa’o i rotopū iā’u ’e tō’u Metua i te ao ra. Ma taua ’itera’a ra, ’aita vau i hina’aro fa’ahou i te mau tāpura nō te mau mea e rave ’e ’eiaha e rave. ’Ia tītau-ana’e-hia iā’u ’ia rave i te hō’ē fa’aotira’a e mea tano ānei te hō’ē ’ātivite nō te sābati ’aore rā ’aita, e ui noa vau iā’u iho, ‘E aha te tāpa’o tā’u e hina’aro e hōro’a i te Atua ?’ Nā taua uira’a ra i fa’ariro i tā’u mau mā’itira’a nō ni’a i te mahana sābati ’ei mau mā’itira’a māramarama maita’i » (’Amuira’a rahi nō ’Ēperēra 2015 [Ensign ’aore rā Liahona, Mē 2015, 130]).
E nehenehe te huru o tō te peresideni Nelson ravera’a i teie uira’a ta’a ’ē, e fa’a’ite ia tātou i te hō’ē hōho’a rahi nō te ravera’a i te mau mā’itira’a nō ni’a i te mau fa’auera’a ’e te mau arata’ira’a. Teie te hō’ē rāve’a nō te fa’a’ite i te reira :
E nehenehe ’outou e pe’e i teie hōho’a nō te mau fa’auera’a ato’a ’aore rā nō te mau arata’ira’a ato’a—te parau pa’ari, te mau rāve’a ha’apararera’a ’e te mau fa’a’ana’anataera’a, te pehe, te vi’ivi’i ’ore i te pae ’āpeni ,’e tae noa atu i te tuha’a ’ahuru. E tītau te reira i te tahi ’ohipa, e mea maita’i rā.
’A tuatāpapa ai ’outou i teie mau mea, e nehenehe ’outou e tai’o e aha tā te mau pāpa’ira’a mo’a ’e tā te mau peropheta nō teie ’anotau e parau nei nō ni’a i te reira, ’a feruri ’e ’a pure i te Metua i te ao ra. I reira te Vārua Maita’i e nehenehe ai e tauturu ia ’outou ’e e fa’auru ia ’outou ’ia rave i te mau mā’itira’a maita’i.
E aha te parau nō ni’a i te mau mā’itira’a a vetahi ’ē ?
’Ia ’ite mai ’outou, ’aita te peresideni Nelson i parau mai ia tātou e aha te mau mā’itira’a ta’a ’ē tāna i rave nō ni’a i te mahana sābati. ’Ua fa’a’ite mai ’oia ia tātou nāhea e ti’a ai ia tātou ’ia rave i tā tātou iho mau mā’itira’a. E riro paha ’outou i te rave hō’ē ā mau mā’itira’a e rave rahi tāna i rave. Te vāhi faufa’a rahi rā ’o te tāmatara’a ïa ’ia ha’afātata atu ā i te Metua i te ao ra ’e ia Iesu Mesia nā roto i tā tātou mau mā’itira’a.
Mai te mea e ’ite ’outou i te tahi atu ta’ata i roto i te ’Ēkālesia ’aita e rave ra i te mau mea ato’a mai tā ’outou e rave ra, ’eiaha ’outou e ha’ape’ape’a nō te fa’atītī’aifaro iāna. Mai tā Reyna I. Aburto, tauturu piti tahito i roto i te peresidenira’a rahi nō te Sōtaiete Tauturu, i parau i te hō’ē taime, « e pe’e ana’e i te haere’a o te Fa’aora ’e e fa’arahi ana’e i tō tātou aroha ta’ata, e fa’aiti i tō tātou mana’o ha’avā, ’e e fa’aea i te riro ’ei mau ta’ata hi’opo’a i te huru pae vārua o vetahi ’ē » (’Amuira’a rahi nō ’Ātopa 2019 [Ensign ’aore rā Liahona, Novema 2019, 58]).
E nehenehe ’outou e fāri’i i te mau parau tumu ti’a tei ha’api’ihia mai e te mau peropheta. E nehenehe ’outou e fāriu atu ia vetahi ’ē i ni’a i te Fa’aora, tōna here, tōna aumihi, ’e tāna mau fa’auera’a. E nehenehe ’outou e tai’o i te buka arata’i Nō te pūai o te feiā ’āpī. E nehenehe ’outou e tāmata i te ora i te hō’ē orara’a ha’apa’o maita’i ’ei pipi nā Iesu Mesia, ’ia riro ’ei hi’ora’a maita’i, ’e ’ia fa’a’ite i tō ’outou mau ’itera’a rau pae vārua.
Mai te mea e rōtahi ’outou i ni’a i te herera’a i te Atua ’e i te herera’a ia vetahi ’ē, e arata’ihia ’outou ’ia rave i te mau mā’itira’a ’o tē tauturu ’ia fa’a’oa’oa ia ’outou ’e ia vetahi ’ē.