E ti’a iā’u te mau mea ato’a nei i te Mesia

Tē fa’a’ite nei te feiā ’āpī e nāhea te Mesia i te ha’apūaira’a ia rātou ’ia rave i te mau ’ohipa teimaha (hi’o Philipi 4:13).

’Ua ’ite te Fa’aora e nāhea i te tauturu iā’u i roto i te ma’i māriri ’aita’ata

feiā ’āpī tamāhine

E mea pāpū maita’i tō’u orara’a ē tae roa i te tau to’eto’e nō 2020. ’Ua ma’ihia vau i te mea tā mātou i mana’o ē, e ma’i ha’apē, nō reira ’ua rave au i te mau rā’au ’aro ma’i i hōro’ahia mai e te taote. I muri iho, ’ua ha’amata vau i te fāri’i i te māuiui upo’o, te rohirohi ’e te paruparu. Tau taime ri’i i muri mai, ’ua ti’a mai au i ni’a i te hora 10 i te pō, ma te mana’o ē ’ua po’ipo’i ’e ’ua ha’amata i te fa’aineine iā’u nō te haere i te ha’api’ira’a.

’A parau mai ai tō’u tuahine ē te pō noa ra, ’ua horo atu vau i roto i te piha o tō’u nā metua ma te ma’ama’a. ’Ua tāpe’a mai tō’u māmā i tō’u upo’o, ’e ’ua ’ite ’oia e fīva rahi tō’u. ’Ua haere atu mātou i te taote i te mahana i muri iho, ’e ’ua rave e rave rahi mau hi’opo’ara’a.

I taua pō ra, ’ua tomo mai tō’u nā metua i roto i tō’u piha ma te ta’i. ’Ua parau mai rāua iā’u e māriri ’aitoto tō’u ’e ’ua tītauhia ia mātou ’ia haere i te fare ma’i nō te fāri’i i te tahi atu ā mau pāhonora’a. Tei roto vau i te piha rū i te pō tā’āto’a ’e ’ua ha’amata vau i tō’u rapa’aura’a tau mahana i muri mai.

’Ua tāmau noa tō’u rapa’aura’a hō’ē ’aore rā e piti matahiti fa’ahou, ’ua nehenehe rā te reira e fa’a’oroma’ihia. ’Ua maita’i ri’i mai nei au ’aita i maoro a’e nei ’e tē mana’o nei au e haere fa’ahou i te ha’api’ira’a. E ’ere rā i te mea ’ōhie. E rave rahi fifi e tupu mai o te rapa’aura’a chimio, mai te ha’apēra’a o te ivi ’e te uaua ’o tē ha’afifi iā’u nō te haere.

feiā ’āpī tamāhine i roto te fare ma’i

Noa atu te tā’āto’ara’a o te reira—penei a’e nō te reira—’ua ha’afātata roa atu vau i tō’u Metua i te ao ra. I teienei, e hāro’aro’ara’a hōhonu a’e tō’u nō ni’a i te tāra’ehara a Iesu Mesia. ’Ua mātau vau i te feruri i tāna tāra’ehara mai te hō’ē mea tā ’oe i hina’aro i te taime noa ’a rave ai ’oe i te hō’ē hape. E tuha’a ïa nō te reira, te ti’aturira’a rā i ni’a i te Fa’aora ’o te hō’ē ato’a ïa mea tei tauturu iā’u ’ia iti mai tō’u mana’o ’ōtahi.

’Ua rave Iesu Mesia i ni’a iāna iho i tō tātou mau ’ati ato’a ’e tā tātou mau hara ato’a, te aura’a ’ua ’ite pāpū ’oia e nāhea i te tauturu iā’u ’a fa’aruru ai au i te ma’i māriri ’aitoto. Te fa’arurura’a i te tāmatara’a e nehenehe e riro ’ei ’ōmo’era’a, nā roto rā i te tāra’ehara a te Mesia, e nehenehe tātou e pāpū maita’i ē, ’ua māramarama mau ’oia i te mea tā tātou e fa’aruru nei.

Rudy H., Utah, fenua Marite