Uiraʼa ’e Pāhonoraʼa

« Nāhea vau i te tauturu i tō’u mau hoa e ’ere i te mea itoito i roto i te ’Ēkālesia, ’ia ha’apūai i tō rātou ’itera’a pāpū ? »

« E ’ere i te mea ’ōhie nō te feiā fa’afāriu ’āpī, te mau hoa e ho’i mai nei, ’e ’o rātou e orara’a huru ta’a ’ē nō te fa’aō-’oi’oi-ra’a mai i roto. ’Ua ’ite te Fatu i te mau tāmatara’a tā rātou e fa’aruru nei, ’e tē ’imi nei ’oia… i te mau ta’ata tei ineine nō te riro ’ei mau mēlahi i roto i te orara’a o vetahi ’ē ».

Elder Carlos A. Godoy nō te Hitu ’Ahuru, ’āmuira’a rahi nō ’Ātopa 2020 (Ensign ’aore rā Liahona, Novema 2020, 87).

’Ia riro ’ei ha’amaita’ira’a nō vetahi ’ē

« ’Ia tāmata ana’e au i te tauturu i te hō’ē hoa ’ia ha’apūai i tōna iho ’itera’a pāpū, e tāmata vau i te riro ’ei ha’amaita’ira’a ’e ’ei pāturura’a i roto i tōna orara’a. Tē tāmata nei au ’ia riro ’ei hi’ora’a ’e ’ia fa’a’ite iāna ē, e nehenehe te ’evanelia a te Mesia e ha’apūai i tōna auhoara’a ’e tōna mau aura’a ’utuāfare mai te mea e tūtava ’oia ’ia ha’apa’o ’e ’ia vai parauti’a. E mea au nā’u ’ia tauturu iāna ’ia ’ite ē ’ua herehia ’oia ».

Selina O., 19 matahiti, Pōrīvia

Tāmau noa i te ani manihini

« E nehenehe ’outou e ha’api’i i tō ’outou mau hoa nō ni’a i te here ’e te aroha o Iesu Mesia ’e nāhea ’oia i te tauturu ia rātou. ’A ani ia rātou ’ia haere mai i te purera’a ’e ’ia haere mai i te mau piha a te feiā ’āpī nā muri ia ’outou. E nehenehe te reira e tauturu ia rātou ’ia fa’atupu i te hō’ē ’itera’a pāpū pūai nō Iesu Mesia ».

Shara R., 12 matahiti, Toromepia

’Ia riro ’ei hoa nā mua roa nō rātou

« E tāmata noa vau i te fa’aō mai ’e ’ia ha’apāpū ē ’ua ’ite tō’u mau hoa ē, tē mana’o nei au ia rātou. ’Ua ’ite au ē, e nehenehe au e riro ’ei māramarama nō rātou ’a tāpe’a noa ai au i tō mātou auhoara’a ’e tō mātou here. E nehenehe tā’u e ani manihini i tō’u mau hoa ’ia haere mai i te mau ’ātivite a te ’Ēkālesia, ’o vau iho ā rā nā mua roa tō rātou hoa mau. E ha’apūai tō ’outou mau hoa i tō rātou ’itera’a pāpū ’ia ’ite ana’e rātou i tō ’outou hi’ora’a here ’e te auhoara’a pāturu ».

Mia D., 19 matahiti, Florida, Fenua Marite

E tauturu te Mesia ia ’outou

« E riro te roa’ara’a i te mau hoa paruparu ’ei mea fifi, terā rā, e mea au nā’u ’ia ani manihini i tō’u mau hoa ’ia haere mai i te hō’ē ’ātivite ’ārearea nā te feiā ’āpī ’aore rā i te purera’a ’ia hōro’a ana’e au i te hō’ē a’ora’a. Mai te mea e ’ana’anatae rātou, e hōro’a vau i te hō’ē Buka a Moromona nā rātou ma tō’u ’itera’a pāpū ’e e fa’a’ite au i te mau ’īrava tei ha’aputapū iā’u. ’A ha’amana’o ē, e tauturu te Mesia ia ’outou i roto i te mau huru tupura’a ato’a ».

Elizabeth B., 15 matahiti, Floride, Fenua Marite

’Ia hāmani maita’i noa

« ’Ua ui au i tō’u ’orometua seminaire i teie uira’a. Nā ’ō mai ra ’oia, ‘’ia hāmani maita’i noa ’oe, Jordan. ’Ua rave a’ena ’oe i te ’ohipa maita’i’. I te ha’amatara’a, ’ua mana’o vau ē, ‘’aita e nava’i te hāmani maita’i’. ’Ua feruri rā vau i muri iho i tō’u hoa tei hina’aro i tō’u auhoara’a ’e tō’u hi’ora’a maita’i. ’Ua tauturu mai te Vārua iā’u ’ia hāmani maita’i ’e ’ia ’ite i te mea e parau. I teienei, tē hina’aro nei ’oia ’ia bāpetizohia ’oia i te hō’ē mahana ! »

Jordan S., 17 matahiti, Utaha, Fenua Marite

’Ua hōro’ahia atu te mau pāhonoraʼa ’ei tauturu ’e ’ei hi’oraʼa, e ʼere rā i te fa’a’iteraʼa mana nō te haʼapiʼiraʼa tumu a te ʼĒkālesia.

E aha tō ’outou manaʼo ?

« Tē tātama’i rahi nei tō’u nā metua. E aha tā’u e nehenehe e rave nō te tāmata ’e nō te tāpe’a mai i te Vārua i roto i tō mātou fare ? »

’A hāpono mai i tā ’oe pāhonora’a ’e te hōho’a nā mua a’e i te 15 nō ’Ēperēra 2023.

’A rata uira mai ia mātou i te [e-mail]. ’Aore rā ’a haere i ni’a ftsoy.ChurchofJesusChrist.org ’e ’a tāumi « Submit Your Work [Hāpono i tā ’outou ’ohipa] ». ’A fa’a’ohipa i tā ’outou tomora’a nō te ’Ēkālesia ’e ’a mā’iti i muri iho « For the Strength of Youth [Nō te pūai o te feiā ’āpī] » i raro a’e « Choose Magazine [Mā’iti i te ve’a] ». ’A tāumi i ni’a « Add File [mau putu’ite] » nō te mā’iti i tā ’outou mau putu’ite ’e te mau hōho’a, ’e i muri iho, ’a tāumi « Submit [Hāpono] » nō te fa’auta uira atu ’e nō te hāpono atu i tā ’outou putu’ite.

E riro te mau pāhonoraʼa i te taui-ri’i-hia nō te roa ’aore rā nō te māramarama ’ore.