“Pojak n̄an Erom̧ joun Mijinede,” N̄an Kōkajoorļo̧k Jodikdik ro, M̧aaj 2023.
Pojak n̄an Erom̧ juon Mijinede
Ekōjkan am̧ jeļā ke kopojak n̄an jerbale juon mijen?
Būreejtōn Russell M. Nelson ekar kakeememej kōj kōn aorōkin jerbal in mijinede im kar rojan̄ likao ro im jiron̄ ro n̄an kōpojak n̄an jerbal.1 Erom̧ juon mijinede eo ej jerbal aolep raan ebōk jerbal, barāinwōt erom̧ juon!
Kōpopo n̄an mijen emaron̄ ļap ilo en̄jake kōnke ilo lale elukkuun lōn̄ men n̄an kōm̧m̧ani.
“Ij aikuj kakkoņ jāān.”
“Ij aikuj katak jān Preach My Gospel.”
“Ekōjkan aō make kōmat ak kwaļkoļ nuknuk ?”
“Ij aikuj kōm̧m̧an aō iien loļo̧k bisop eo aō.”
“Ebwe ke peran eo ippa n̄an kwaļo̧k kōn gospel?”
Ļōmņak kein im inepata kein rijim̧we. Bōtaab, em̧m̧anļo̧k mijeļo̧k un eo ekilepļo̧k kōn unin am̧ mijen.
Un eo Am̧
Ejipan̄ n̄an kajjitōk ippam̧ make: “Etke ikōņaan mijen?”
Bōlen kwoj ļōmņak ej juon am̧ eddo. Bōlen kwoj kijooror in mour ilo juon jikin ekāāl ak ekkatak juon kajin. Bōlen kwokōņaan kwaļo̧k naan in kam̧ool eo am̧ kōn Pinmuur eo an Jisōs Kraist ak katak eo kōn baam̧le indeeo. Ak kwoj tōmak, āinwōt an kar Būreejtōn Nelson ba, ke “aolep armej rej aikuj juon iien em̧m̧an n̄an jeļā kōn jepļaaktok in gospel eo an Jisōs Kraist.”2
Jet un ko n̄an jerbale juon mijen rej em̧m̧anļo̧k jān ko jet, im elōn̄ļo̧k jān juon un em̧m̧an n̄an etal. Un ko am̧ rej aikuj āliktata ped ioļapļap in iakwe eo am̧ n̄an Irooj im gospel eo An em̧ōj an jepļaaktok. Ļōmņak kōn un ko am̧ im eļan̄n̄e renaaj jipan̄ eok jerbal n̄an Irooj ”kōn aolepān būruōmi, ami maron̄, ļōmņak im kajoor” (Katak im Bujen Ko 4:2). Im eļan̄n̄e ejjeļo̧k am̧ ikdeelel, kwomaron̄ jar n̄an Jemedwōj Ilan̄ n̄an jipan̄ eok bwe en wōr.
Naan in Kam̧ool eo Am̧
“Ewōr ke aō naan in kam̧ool kōn gospel eo an Jisōs Kraist? Im ij ke lukkuun tōmak ke E ekar kūr eō n̄an mijen?”
Kōttōpar eo an juon mijinede ej n̄an kūr ro jet n̄an itok n̄an Kraist. Eļan̄n̄e kwoj karūwawineneik armej n̄an ekkatak kōn Jisōs Kraist im gospel eo An, aorōk n̄an eok bwe en wōr am̧ make naan in kam̧ool.
Naan in kam̧ool eo am̧ ejjab aikuj wāppen; enaaj baj wōt wōr ruum̧ n̄an kōļapļo̧k. Men eo aorōk ej pedped eo: Jisōs Kraist. Kwomaron̄ itok n̄an jeļā kōn E kōn kwe make jān am̧ ekkatak naan ko An ilo jeje ko rekwojarjar, jar n̄an Jemedwōj Ilan̄ ilo Etan, im kajjeon̄ mour āinwōt E.
Erom̧ juon miinede ejjab meļeļein kwonaaj jeļā kilen ekōnono n̄an armej aolep iien ak kwonaaj keememej aolep eoon ko (bōtaab komaron̄ jerbal aolep iien n̄an kōkm̧anm̧anļo̧k kapeel ko am̧). Toon wōt am̧ lōke ilo Irooj, tōmak ilo E, im m̧ōņōņō in kōm̧m̧an jerbal eo An, E enaaj kōļapļo̧k kijejeto ko am̧ im jipan̄ eok kōm̧m̧an bwe kwon juon mijinede eo eļap tokjen.
Menin Letok Kwojarjar eo Am̧ Make ilo Tampeļ
“Ij ke ij en̄jake aō pojak n̄an etal n̄an tampeļ?”
M̧okta jān am̧ mijen, kwonaaj bōk menin letok kwojarjar eo ilo tampeļ eļan̄n̄e ejjan̄in m̧ōj am̧ bōke.
Kōjeram̧m̧an ko an tampeļ rej “juon ak ikutkut in ad etale wāween kōpopo n̄an juon kūr n̄an jerbal in.” Im “mour erreo an juon make ej make wōt aorōk n̄an maron̄ bōk priesthood eo eutiej tata.”3 Ilo am̧ kōpopo im erreo n̄an etal n̄an tampeļ im kōm̧m̧ani bujen ko rekwojarjar ippān Anij, kwonaaj barāinwōt kōpooj eok make n̄an erom̧ juon mijinede n̄an E (lale Katak im Bujen 105:33; 109:22).
Āliktata, kwomaron̄ bōk kūlaaj in m̧aanjabpopo eo n̄an tampeļ. Ak ilo kōtaan in, kwomaron̄ kōm̧m̧ane ekktak eo am̧ make im kōpopo. Būreejtōn Nelson ekar kālet jet eoon ko im unin kōnono ko an gospel ko komaron̄ ekkatak n̄an katak kōn tampeļ.4 Komaron̄ barāinwōt ekkatak eļapļo̧k ilo temples.ChurchofJesusChrist.org.
Erreo im Pojak
Bar juon alen, elōn̄ wāween ko n̄an kōpopo n̄an mijen Aet, kwoj aikuj kakkoņ jāān, dāpij am̧ ājmour ilo ānbwin, im ekkatak kapeel ko reddik āinwōt kōm̧m̧ani nuknuk ko ak kōmat. Kwoj wōt maron̄ likūt kōttōpar kein ippōm̧.
Ak jab kōtļo̧k bwe meļeļe kein ren kabbweer eok. Kōppopo eo eaorōktata komaron̄ kōm̧m̧an ej men eo me ej kōtļo̧k am̧ erreo im kein jerbal eo eļap tokjen ilo pein Irooj.
N̄e kwoj en̄jake am̧ mōjņo, inepata, im pere kōn mijen, endein in. Kemeemej wōt bwe Irooj ekōņaan bwe kwon tōprak! Ilo am̧ lōke E im ļoor tōl eo an Jetōb, E enaaj jipan̄ eok kōpopo n̄an erom̧ mijinede eo em̧m̧antata komaron̄ erom̧.