“Erom̧ juon M̧oolin Ribōk Tūb eo,” N̄an Kōkajoorļo̧k Jodikdik ro, M̧aaj 2023.
Erom̧ juon M̧oolin Ribōk Tūb eo
Felipe ej juon iaan ro rem̧ōkadetata ilo laļ in ilo martial art ko āinwōt karate, judo, im MMA. Ak jerbale juon mijen ekar juon men eo ekar kaorōke.
Pija ko jān Shirley Brito
Felipe F. jān Pará, Brazil, ej juon 18 iiō eo oktak. Em̧ōj an kampiit ilo elōn̄ kain artial arts ko (MMA) ko an ritiejm̧ļo̧k, judo, im karate. Im elukkuun jeļā ilo men ko ej kōm̧mani. Ekar bōk tūp eo ilo International Iron Man MMA. 2 kattōn an bōk state champion eo, juon Brazilian vice-champion, im juon international vice-champion n̄an judo. Im ej 10-kattōn Pará state champion, jūo̧ņ 10-kattōn Brazilian champion, juon South American champion, juon Pan-American champion, im juon 3-kattōn world champion n̄an karate. Waao!
Un ko n̄an An Tōprak
Felipe ekar jinoe katak jān ke ekar jiljilimjuon an iiō. Ak ekar tōmak bwe un eo eļaptata n̄an an tōprak ej Anij. “Aolep iien ij jar kōn jipan̄ an Irooj,” ej ba.
Ilo Pan-American karate championship eo an āliktata, Felipe ekar jab lukkun ļap peran ippān. Ak jemen ekar leļo̧k n̄an e juon kōjeram̧m̧an an priesthood. “Ālkin men eo kōļmenļo̧kijen eo aō ekar em̧m̧anļo̧k, im ekar jipan̄ n̄an bōk tūp eo ilo championship eo raan eo. Match ko aō ruo āliktata ikar wini, ekar wōr wōt aō jejjo jekōn. Aolep rekar ļōmņak eban kar tōprak. Ikar kōm̧m̧ane juon kōl eo me kar jab kōtmene me ekar jipan̄ n̄an bōk tūp eo, im n̄an eo, ekar tōprak kōnke kōn kōjeram̧m̧an eo an jema.
Jemen ekar lelo̧k n̄an e elōn̄ kōjeram̧m̧an ko ium̧win iiō ko. Felipe ejeļā bwe bōk juon kōjeram̧m̧an eban meļeļein bwe aolep iien enaaj bōk tūb eo, bōtaab ekar tōmak bwe Irooj emaron̄ jipan̄ e ļōmņak im kōkkm̧anm̧anļo̧k taļōņ ko an. “Menin ekar jipan̄ n̄a bōk eļapļo̧k peran,” Felipe ej ba. “Ijelā bwe jekdoon ta eo enaaj waļo̧k, pein Irooj ekar ped ijo.”
Aolepen baam̧le eo an rekar juon jipan̄ eļap n̄an e barāinwōt. Ilo juon iien jie eo an MMA, Felipe ekar loe baam̧le eo an ilo jea ko. “Aolepeer rekar kūr eta. Ikar jaje in ba ta.” Ej kobaik, “Eļap aō kam̧m̧oolol kōn jema im jinō, ro rekar kwaļo̧k n̄an eō iaļ eo ejim̧we.”
Felipe ej en̄jake bwe kōnke ekar ļoor iaļ eo ekar jipan̄ e ilo ikkure ko an. Ro m̧ōttan ekkā aer ettōn̄ im kajirere kake n̄e ejjab maron̄ kōm̧m̧ani men ko rej kōm̧m̧ani. Ak Felipe ejjab ajļo̧k. “Ejjelo̧k oktak jān an gospel in bōktok kōjeram̧m̧an ko, ilo ikkure ko emaron̄ boktok tōprak! Jab etal n̄an pade ko ippen ro m̧ōtta im m̧ōn̄a men ko rejim̧we rekar jim̧ōr kwaļo̧k tōprak eo.”
Kālet n̄an Jerbale juon Mijen
Kiiō ke 18 an iiō, Felipe rellōn̄ iien ko rem̧m̧an n̄an e. Ej kab kar m̧ōj kūri n̄an juon kaminene n̄an juon jikuuļ in MMA eļap, im elōn̄ bar kūr ko jān mānija ro ipeļaakin laļ in. Ak ekar kōņaan etal im mijen m̧okta.
“N̄an n̄a, ej juon kālet eo epidodo,” ej ba. “Irooj ej ped m̧oktata. Men ko tok jet remaron̄ kōttar, kōnke E ej kōjeram̧m̧an eō aolep iien kōn aō pokake.”
Ļaddik eo jein Felipe Júnior, eo ej kab jepļaaktok jān mijen, ekar m̧ōttan an kar ikdeelel. Ekar ba n̄an Felipe bwe ejjelo̧k juon men em̧m̧anļo̧k jān jerbale juon mijen im bwe ej aikuj etal men̄e armej renaaj kajjeon̄ jiron̄ e bwe en jab.
Ekar wōr armej rej ba n̄an Felipe bwe en pād wōt. Elōn̄ ro nukun rekar jab membōr in Kabun̄ in. “Rekar jab meļeļe bwe jerbale juon mijen eļapļo̧k an aorōkin jān erom̧ m̧weie im bun̄bun̄. Ikar wōt kajjeon̄ katakin gospel eo n̄e iien rōt in rej bōk jikin,” Felipe ej ba. Im juon iaan iien ko rekar tōl n̄an juon iien em̧m̧an ekajoor n̄an mijinede.
Eo rilikin Felipe ej kab m̧ōjj an jako, im uncle eo an Felipe ekar būrom̧ōj kōn mej eo an ļaddik eo nejin. Felipe ekar ba n̄an uncle eo an kōn karōk in lo̧mo̧o̧r. Ālikin uncle eo an ekar atabwo̧kuj e im jeorļo̧k an bōd kōn an kar ba en jab etal im mijen. “Ekar ba n̄an n̄a bwe ekar ped ippa menin letok eo n̄an un̄ur buruon armej im bwe ij aikuj kar etal im jerbal,” Felipe ej keememej. “Ekar juon iien eaorōk n̄an eō ke juon eo ekar jaje ta in mijen ekar meļeļe un eo em̧ool unin.”
Felipe ekar wōr iien ko me ekar jab lukkuun jeļā kōn mijen. “Ikar riiti jeje ko rekwojarjar aō kajjojo raan, im juon bon̄ ekar ļap pere ippa kōn kālet eo aō. Ikar jinoe ļōmņak, ‘Ij ke aikuj bar kaitokļo̧k jidik aō ped im kampiit?’ Ak ikar riit ilo Bok in Mormon kōn an ri Nipai ro kar jinoe jako aer kam̧m̧oolol im jino an utiej būruweer. Jekab ekar katakin er bwe rej aikuj likūt Irooj m̧oktata. [Lale Jekab 2:12–21.] Ilo iien eo ekar ejjeļo̧k aō pere kōn kālet eo aō.”
“Rainin ijeļā ta eo ikōņaan, im ijeļā bwe inaaj ro̧o̧ltok jān mijen eo aō im naaj jeram̧m̧an ilo bar jet wāween. Emaron̄ bōk koņaao ilo MMA ak bar juon men, ak ijeļā ke Anij enaaj letok n̄an kōj ta eo jej aikuji.”
Kajoor in Oktak eo Kajjojo Raan
Felipe ekar jab aolep iien en̄jake kijooror im peran kōn mijen—ak kōn Kabun̄ in. “Ekar wōr juon iien ilo mour e aō ke ikar jab lukkuun kajoor ilo gospel in, im ikar en̄jake aolep iien an jako juon men jān mour e aō,” ej ba. “Kwojeļā armej eņ me ej etal im jar im ejjab kōm̧m̧ane bar juon men? N̄a armej eo.” Ālkin an kar kōnono ippān ļāeo jein im bisop eo an kōn jerbale juon mijen, ekar kālet n̄an jinoe jar im riiti eoon ko kajjojo raan.
“Ij ļōmņak ta eo ekar jipan̄ eō ekar oktak aolep raan. Ikar rūttoļo̧k ilo Kabun̄ in, im ijjan̄in kar kappukot oktak kōnke ikar rūttoļo̧k ilo juon em̧ ewōr juon tōmak ie im ļōmņak bwe ekar bwe jon̄an eo. Ak kiiō ij kappukot juon naan in kam̧ool kajjojo raan.”
Juon Ribōk Tūb eo Kōn Irooj
Felipe ejeļā bwe kālet kālet eo ejim̧we ejjab meļeļein enaaj bōk tūp eo aolep iien ak tōprak men ko ilo kōņaan eo an. “Ij kemeemej etal n̄an juon iien kampiit im ļōmņak ke ikar pojak, im ikar luuj ilo raun eo kein kajuon. Bar juon iien ikar pād wōt m̧weo bwe ikar joreen. Ij keememej an m̧ōkaj aō rūj, kalimjōkeļo̧k ļo̧k lōn̄in m̧weeo, ļōmņak eļan̄n̄e ekar wōr tokjen. Jet iien ikar kōņaan oktak im bar kiki, ak ikar jutak im etal im kaminene. N̄an erom̧ juon champion eļļā ilōn̄inļo̧k iien bōk tūp eo. Ej juon eo ej anjo̧ aolep raan, anjo̧ jān likjab, im anjo̧ jān māllijon̄ ko.”
Rilo̧mo̧o̧r ekar kōkajoor eo an Felipe n̄an anjo̧ jān aolep men ilo mour eo an. “Eļan̄n̄e jekōņaan erom̧ āinwōt E, jej aikuj kōm̧m̧āne ta eo E ej kōm̧mane, kajjeon̄ iien otemjej n̄an jutak pen, kōkajoor kōj make, im ļōmņak kōn ta eo E enkar kōm̧m̧ane. Men eo ekar im̧we eō ilo m̧akūtkūt ko aō aolep raan, n̄an erom̧ āinwōt E. N̄e ij loe juon men me imaron̄ ukōte, ij jar im kajjitōk jeorļo̧k bwōd, kajjeon̄ n̄an em̧m̧anļo̧k aolep iien. Juon champion em̧ool ej armej eo ej wōtlo̧k elōn̄ kattōn im men̄e ej kūtōtō ej jutak im wōnm̧aanļo̧k wōt.”
“Ij juon Champion kōn Irooj,” Felipe ej ba. “Eļan̄n̄e enkar jab kōn E, ijaje inkar pād ia. Ak ijeļā bwe enkar jab wōr aolep men ko ewōr ippa rainin. Mour kōn gospel in ekar kōm̧man bwe in juon champion ilo mour in im ilo ikkure ko.”