Taeting: Stap Openem Ol Windo blong Heven
Samfala Pat
Evri samting we yumi gat mo evri samting we i yumi, i kam long God. Olsem ol disaepol blong Kraes, yumi wantem blong serem samting wetem olgeta we oli stap raon long yumi.
Wetem evri samting we Lod i givim long yumi, Hem i bin askem yumi blong givimbak 10 pesen blong wanem yumi winim blong Hem mo kingdom blong Hem long wol. Hem i promesem yumi se taem yumi ones long ol taeting blong yumi, bae Hem i “openem skae, i letem olgeta gudgudfala samting i kam long yufala we i plante we i plante.”[Malakae 3:10] Hem i bin promesem yumi se bae Hem i protektem yumi long ivel. …
Ol windo blong heven oli open long plante wei. Sam oli blong wol ia, be plante oli long saed blong spirit. Sam oli smosmol mo oli isi blong yumi no luksave. Trastem taem blong Lod; oltaem ol blesing oli kam. …
… Wol i tokbaot taeting long fasin blong mane blong yumi, be tabu loa blong taeting hem i abaot prinsipol blong fet blong yumi. Blong stap ones long ol taeting blong yumi i wan wei we i soem hamas yumi wantem blong putum Lod i faswan long laef blong yumi, mo bifo long ol kea mo intres blong yumiwan. Mi promesem yu se taem yu trastem Lod, ol blesing blong heven bae i folem. …
Plante samting we Lod i ademap antap long wanem we yufala i givim tru long ol taeting blong yufala, i bin mekem ol risos blong Jos i kam moa strong, blong stap givim janis blong muvum wok blong Lod bitim eni samting we yumi stap tingting long hem. Lod i save evri samting, mo long taem blong Hem, bae yumi luk tabu stamba tingting blong Hem i kam tru.