Stap Wokbaot long Kavenan Rilesensip Wetem Kraes
Samfala Pat
Lod bae i ansa long wanwan long yumi long trabol taem blong yumi sapos yumi jusum blong fasem laef blong yumi wetem Hem. Hem i bin promes blong wokbaot wetem yumi long rod.
Yumi singaotem hemia, blong stap wokbaot long rod blong kavenan—wan rod we i stat wetem kavenan blong baptaes mo i lidim yumi i go long ol kavenan we oli moa dip we yumi mekem insaed long tempol. … Wan kavenan i no abaot wan kontrak nomo, nomata se hemia tu i impoten. Hem i abaot wan rilesensip. …
Misin blong Hem i blong helpem yumi. Jisas Kraes bae i kam long yumi long ples we yumi stap long hem mo olsem we yumi stap. Hemia i risen blong garen, blong kros, mo ston blong gref. Hem i sendem Sevya i kam blong helpem yumi win. Be blong stap long ples we yumi stap long hem nomo, bae i no karem fridom we yumi stap lukaotem i kam. … Misin blong Hem i blong leftemap yumi. Bae Hem i wok insaed long yumi blong leftemap yumi i go long ples we Hem i stap long hem, mo long rod ia, bae Hem i letem yumi blong kam olsem Hem. Jisas Kraes i kam blong leftemap yumi. Hem i wantem helpem yumi blong kam olsem Hem. Hemia i risen blong tempol. Yumi mas tingbaot, i no ol hadtaem long rod ia hemwan we bae i mekem yumi kam olsem god, hem i kompanion—Sevya blong yumi. Mo hemia i risen blong kavenan rilesensip. …
… Stat long ples we yu stap long hem. No letem situesen blong yu i stopem yu. Tingbaot, spid o ples we yu stap long hem long rod i no impoten olsem fasin blong stap gro. …
Tangkyu bigwan se yumi wokabaot long rod ia tugeta, mo stap leftemap tingting blong ol narawan folem rod. Taem yumi serem ol eksperiens blong yumiwan wetem Kraes, bae yumi stap givim yumiwan moa.