O a’u o se So’o o Iesu Keriso

Saunia e Au Peresitene Aoao o Tamaitai Talavou ma Alii Talavou

E mafai ona e mulimuli i le Faaola ma faasalalau atu Lana afioga i isi.

Pe na e mafaufau ea pe aisea, ina ua uma ona faamaloloina tagata, sa ta’u atu e Iesu i nisi o i latou e aua nei ta’uina atu i se tasi (tagai i le Mareko 7:36)? O se tasi o mafuaaga atonu e mafua ona o ituaiga tagata sa Ia manaomia e mulimuli ia te Ia. Atonu e te manatu afai e talanoa tagata e uiga i o latou faamalologa o le a avea o se auala lelei mo Iesu e faatosina mai ai tagata e mulimulitai ia te Ia. Peitai, sa le na ona manaomia e Iesu ni tagata e mulimuli mai ia te Ia. Sa ia manaomia ni so’o.

Na fetalai atu Iesu ia Peteru ma Aneterea, “Mulimuli mai ia te a’u” (Mataio 4:19). O le Faaliliuga a Iosefa Samita o ia fuaiupu e faitauina faapea, “O A’u o lē ua tusia i ai e perofeta; mulimuli mai ia te a’u” (Faaliliuga a Iosefa Samita, Mataio 4:18 [i le Mataio 4:19, vaefaamatalaga a]). O le valaaulia e le tau na ona i ai faatasi ma Ia mo sina taimi. Na Ia manao ia i latou e avea ma Ona so’o e faavavau.

E lei na ona Ia manao ia i latou e matamata ia te Ia o a’oa’o tagata, alofa i tagata, ma faia vavega. Sa manao o Ia ia latou faia foi faapea. Sa finagalo o Ia ia avea Lana galuega ma a latou galuega. O le filifilia o Keriso o lona uiga o le a latou a’oa’o e auauna atu e pei ona Ia auauna atu ma mafaufau e pei ona Ia mafaufau. O le a latou faataitai ona ola e pei ona sa Ia soifua ai, ma o le a Ia aoaoina i latou ma tuu atu ia i latou le fesoasoani latou te manaomia ia avea atili ai e faapei o Ia.

O le upu Eleni mo le “so’o” o le mathetes. O lona uiga e sili atu nai lo le na o le mulimuli po o le tagata aoga. E masani ona faaliliuina o se tagata faataitai. I ona po o Keriso, e masani lava ona filifili e so’o le matai latou te mananao e aoao ma se vaaiga mamao agai i le avea o i latou lava ma matai. E lei mulimuli Keriso i le faiga masani. Sa Ia liliuina ma saili atu i Ona lava so’o. I le taimi nei, ua valaau mai Keriso mo i tatou ia o mai ia te Ia. Ua Ia valaauina i tatou e avea ma Ona so’o ma folafola atu Lana afioga i Lona nuu ina ia mafai ona latou maua le ola e faavavau (tagai i le 3 Nifae 5:13).

Sa faaalia e se tasi o tamaitai talavou mai Haiti i le atu Keripiane lona manao e avea o se so’o o Keriso e ala i le valaauliaina o lana uo e le o se tagata o le Ekalesia la te o i se konafesi a le MMA. I le taimi muamua sa lei manao le tamā o lana uo e tuu atu i lona afafine se faatagaga e alu ai. Sa faamalamalama atu e taitai o le Ekalesia e uiga i ni aafiaga lelei o loo faatalitali mai mo ia ma faufautua talavou matutua lelei o e o le a vaaia o ia. Na tuuina mai e le tamā le faatagaga mo lona afafine e auai ai, ma ina ua uma ona ia vaaia le eseesega na faia ai i lona olaga, sa ia tuuina atu foi ia te ia le faatagaga e auai ai i sauniga Lotu ma—i le ono masina mulimuli ane—ia papatisoina.

Sa faaalia e se tasi alii talavou mai Atenitina i Amerika i Saute lona manao e avea ma se so’o o Keriso e ala i le faasoaina atu o nisi o ana lole i se uo a o latou tietie atu i le pasi i le aoga. Ina ua o’o lana faasolo i le lole e fai i le kofe, sa ia faamatalaina e na te lei atiina ae lava se tofo mo lena ituaiga talu ai e leai se tasi i lona aiga e taumafa i le kofe. O lena mea na tata’i atu ai i se talanoaga e uiga i le Ekalesia, lea na o’o atu ai i se valaaulia e o mai i fonotaga, lea na iu ina o’o atu i le auai o lana uo i le Ekalesia ma auauna atu i se misiona i Chile.

E le o tagata uma e te talanoa i ai e uiga i le Ekalesia pe valaaulia i se gaoioiga a le Ekalesia o le a mananao e auai. E le afaina lena. E le o tagata uma na fetalai i ai Keriso i le taimi o Lana galuega i le lalolagi na auai mai foi. Ae, a o tatou filifili e avea ma so’o o Iesu Keriso ma folafola atu Lana afioga, o le a Ia tuuina mai ia i tatou le lototele ma le fesoasoani faalelagi. O le a tatou aoao pe faapefea ona avea atili e faapei o Ia, ma o mea na e faia e so’o.