So’o i le So’o

E faapefea ona avea oe ma so’o o Iesu Keriso? Ia, e faigofie lava nai lo ou manatu. Siaki faataitaiga nei na faasoa mai e le autalavou e uiga i le au so’o i o latou olaga.

Kyler C., 13 tausaga

Mai Guayas, Ekuatoa. E fiafia e taalo pasiketipolo ma le vaiolini.

O a’u uo e toalua mai le lotu, o Arick ma Mika, na aoaoina au i le taua o le avea ma se so’o o Iesu Keriso. O a la faataitaiga ua fesoasoani ia te au e maua atili ai se naunautaiga e auauna atu i se misiona. Ua ou fiafia ai nei e faasoa atu e uiga ia Iesu Keriso ia i latou o manaomia.

O a’u uo foi o ni faataitaiga lelei o Keriso i le ala latou te tautatala ai. Ua latou faasoa mai ia te a’u le tele o aafiaga e uiga i le mulimuli ia Iesu Keriso, lea ua uunaia ai au e faalatalata atili atu ia te Ia. Mo se faataitaiga, ua aoaoina au e la’u uo afai e i ai sa tatou fesili, e mafai ona tatou ole atu i le Atua. Ma e faapefea ona tatou iloa pe a tali mai o Ia? O le a tatou iloa i o tatou loto. O le Agaga lena e fetalai mai o loo talanoa mai le Atua ia i tatou ma o loo tatou filifilia le ala sa’o.

Ayotunde Raphael A., 15 tausaga

Mai Oyo, Nigeria. E fiafia e siva, taaloga, ma le aoao atu faatasi ma faifeautalai.

O la’u uo o Ewa (faapuupuu mo Ewaoluwa) o se faataitaiga o se so’o o Keriso ia te au. Sa i ai se taimi na ia faatiga ai ia te au, ma sa ou ita ia te ia. Ona ia talosaga mai lea mo la’u faamagaloga. E ala i lena faagasologa, sa ou aoaoina ai le lotomaualalo ma le faamagaloga mai ia te ia. Sa matuai lotomaualalo o ia ina ua ia faatoese mai, ma sa ou faamagalo atu ia te ia.

Ia te au, o le avea ma se so’o o Iesu Keriso o le tausia lea o poloaiga a le Tama Faalelagi, ia alofa i le Atua ma Lona Alo, o Iesu Keriso, ma ia popole atili mo isi.

Kaperielu A., 12 tausaga

Mai Oyo, Nigeria. E fiafia e taalo soka.

Sa ou iloaina se tamaitiiti mai le lotu o ia o se tagata fasi tamaititi muamua, ae i se tasi aso sa faafuasei lava ona suia o ia. Sa ou filifili e fesili atu ia te ia, “Aisea na e suia ai?” Sa ia tau mai ia te au sa ia tatalo, faitau ana tusitusiga paia, sa i ai le faatuatua, ma sa galue malosi e sui lana amio. Sa fesoasoani ia te au aua o le taimi nei pe a ou manao e fai se faaiuga, faalea’oa’oga pe faaleagaga, e masani lava ona ou tatalo mo le Atua e taialaina au.

Atonu e le atoatoa la’u uo, ae o lana amio na ootia ai lo’u loto. O le taimi nei e masani lava ona ou faitau i tusitusiga paia ae ou te lei faia soo se laasaga i lo’u olaga. O le faataitaiga a la’u uo ua ou latalata atili ai ia Keriso auā soo se taimi lava ou te agasala ai, e mafai ona ou toe foi atu i le Alii i le tatalo ma le salamo. O le alu atu i le Alii ua fesoasoani ia te au e faataatia ese ai a’u avega.