“Alu mo le Malamalama!,” Mo le Malosi o le Autalavou, Ian. 2024.
Sau, Mulimuli Mai ia te A’u
Itulau autu o le Tusi a Mamona; Faatomuaga o le Tusi a Mamona
Alu mo le Malamalama!
O le Tusi a Mamona e aumaia le malamalama ma le mana i lou olaga e taiala ai oe i aso faigata ma fiafia o i luma atu.
Ata na tusia e Gabriele Cracolici
A o o’u tamaitiiti, sa ou fiafia i le tala i le uso o Iareto i le Tusi a Mamona. Sa mafai ona ou vaaia lona aafiaga o se ata tifaga i lo’u mafaufau. Sa toetoe lava a foliga mai o lo o tupu a o ou faitau i ai.
Sa poloaiina le uso o Iareto e le Alii e fausia ni vaa ina ia mafai ai e ia ma lona aiga ona sopoia le vasa i “se laueleele o le folafolaga” (Eteru 2:9). Ae sa pogisa nei vaa. I lona le manao ai e malaga i le pogisa, sa saili ai e le uso o Iareto le fesoasoani a le Alii. Ma sa fetalai mai le Alii ia te ia, “O le a se mea tou te mananao ia ou faia?” (Eteru 2:23)
Faatasi ai ma le faatuatua tele, na ave ai e le uso o Iareto ni maa se 16 i le tumutumu o se mauga ma tatalo ai. Sa ia ole atu i le Alii e pai atu i maa “ina ia susulu atu i le pogisa” (Eteru 3:4). Ona aapa atu lea o le Alii i Lona aao ma pa’i atu Lona tamatamailima i maa taitasi, ma tuuina atu ia i latou le malamalama. I lo’u olaga atoa, sa ou vaai i lou mafaufau i le pa’i atu o le Alii i na maa.
E pei lava ona tuuina atu i le uso o Iareto le malamalama, o le a aumaia foi e le Alii o Iesu Keriso le malamalama ia te oe. O Ia “o le malamalama ma le ola o le lalolagi” (3 Nifae 11:11). Ou te valaaulia outou ia o atu mo le Malamalama! O le suesueina o le Tusi a Mamona o le a faamalosia ai lou faatuatua ia Iesu Keriso ma fesoasoani ai ia te oe ia tumau le fesootai atu i Lona Malamalama.
O Se Taiala ma se Malamalama
Ua ou faitauina le Tusi a Mamona ma lagonaina se molimau i le tele o taimi e moni. Ou te lei masalosalo lava i ai. Pe a ou lē lagonaina le Agaga, pe ua ou gaogao faaleagaga, ou te lagonaina se lagona o le pogisa. Ae a ou faitauina le Tusi a Mamona, e toe foi mai le malamalama. O nisi taimi e na o le tasi lava le fuaiupu e faitau, ou te toe lagonaina ai le malamalama, ae ou te lagonaina pea le malamalama pe a ou faitau i ai.
O le malamalama e faatoilaloina le pogisa e moni ia te au. Ua folafola mai e Peresitene Russell M. Nelson, “A o outou suesueina ma le agaga tatalo le Tusi a Mamona i aso uma, o le a outou faia ni faaiuga lelei atu i—aso uma..”1 Ona e faateleina e le Tusi a Mamona lou faatuatua ia Iesu Keriso. Na te aumaia le malamalama ma le mana. O ona aoaoga o le a taialaina ai oe i aso faigata ma fiafia o i luma atu.
Lagonaina o le Malamalama
Ua ou maua le faamanuiaga o le auauna atu i autafa o Peresitene Nelson. A savali mai le perofeta i totonu o se potu, e faafuase’i lava ona lagona le fiafia ma le mamasagia. Na te tauaveina le Malamalama o Keriso faatasi ma ia.
O nisi taimi o se tauiviga le mautinoa o loo e lagonaina le Malamalama o Keriso. E te le vaai i ai i ou mata faaletino. E oo mai o ni lagona faaleagaga. O le lagona o le mea sa’o ma le sese ma mea e moni ma sese (tagai i le Moronae 7:13–19).
Soo se taimi lava e te filifili ai ia avea atili e faapei o Iesu Keriso, ua e savali i le Malamalama o Keriso. O le faitauina o le Tusi a Mamona e faamalosia ai lena Malamalama.
“Ioe, E Moni!”
Ou te talitonu ma le faamaoni pe a faapea mai tusitusiga paia, “Manatua, ia manatua” (Helamana 5:12), o lona uiga e le tatau ona na ona tatou manatua o Iesu Keriso pe manatua sa tatou lagonaina i se tasi taimi Lona Malamalama. E tatau ona tatou lagonaina Lona Malamalama nei ma toe lagonaina pea lava pea. O le mea lena na iloa e se tasi o alii talavou, o Eric, ina ua ia faatoa faitauina le Tusi a Mamona.
Ina ua siitia atu i se nofoaga fou ma amata le aoga maualuga, sa feagai Eric ma tauiviga i ana vasega ma sa faigata ona ia maua se lagona o le avea o se tasi o i latou. Sa amata foi ona ia mafaufau pe i ai sana molimau.
“Sa amata ona ou faitauina ma le faamaoni le Tusi a Mamona mo le taimi muamua i lo’u olaga,” o le tala lea a Eric. “Sa ou faitau ma tatalo i aso uma.”
Ina ua tatalo Eric ma ole atu i le Tama Faalelagi pe moni le Tusi a Mamona, sa ia mautinoa o le a ia maua se tali, ae e leai se mea na tupu.
I se taimi mulimuli ane, a o ia savalivali i le togavao i tua atu o lona fale, sa toe fesili Eric. O le taimi lea, sa ia maua se uunaiga, e pei o lo o fesili atu le Tama Faalelagi ia te ia, “Eric, o le a se mea ua tupu i lou olaga talu ona e amata faitauina le Tusi a Mamona ma tatalo i aso uma?”
Sa mafaufau Eric i le auala na ia maua ai ni uo lelei ma i ai se tulaga lelei i ana taumafaiga i le aoga. E aunoa ma le iloaina, na aumaia e le Tusi a Mamona le malamalama ma le mana i lona olaga.
Ona tupu ai lea.
“Ou te lei faalogo i se leo,” o le tala lea a Eric, “ae sa faatumulia lo’u loto i le Agaga a o oo mai nei upu i lo’u mafaufau: ‘Ioe, e moni!’ Sa oo mai ia te au se lagona lofituina o le filemu, olioli ma le faamautinoaga. Sa ou iloaina ua iu lava ina ou mauaina la’u tali.”2
Agai i Luma i le Malamalama
Mai lona itulau muamua e oo atu i lona itulau mulimuli, o loo molimau mai ai le Tusi a Mamona e faapea “o Iesu o le Keriso”3 ma o loo aoao mai ai i tatou “i mea e tatau ona tatou faia e maua ai le filemu i lenei olaga ma le faaolataga e faavavau i le olaga a sau.”4
A o e suesue i le Tusi a Mamona, ou te faamoemoe o le a e lagonaina na tusia mo oe. O aoaoga faavae i le Tusi a Mamona ma faataitaiga lototoa a Nifae, Liae ma Sarai, Apinati, Alema, Amoleka, Apiso, atalii o Mosaea, ma le toatele o isi, o le a siitia, taiala, ma faamalosia ai oe ia avea o se so’o sili atu o Iesu Keriso ma taitai oe e savali ma le mautinoa i Lona Malamalama.
Ou te molimau atu o le Tusi a Mamona o se molimau taua ma le mautinoa o loo soifua Iesu Keriso ma o lo tatou punavai o le faamafanafanaga, faamoemoe, filemu, olioli, ma le malamalama. Ou te tatalo ma lo’u loto atoa o le a outou o atu mo le Malamalama o lo o maua i le Tusi a Mamona, faalatalata atili atu ia Iesu Keriso, ma lagonaina le mafanafana o Lona malamalama ma le alofa e sili atu nai lo se isi lava taimi muamua.