“Taofi le Faatusatusa! Ua Lava Lelei Oe,” Mo le Malosi o le Autalavou, Ian. 2024.
Sau, Mulimuli Mai ia te A’u
Taofi le Faatusatusa! Ua Lava Oe
O mea nei e fa ua tatou aoaoina mai se tasi o uso matutua o Nifae.
O ata na tusia e Corey Egbert
E i ai lava le tamaititi aoga e toatasi i le vasega e iloaina lava i taimi uma le tali sa’o. Le tamaitiiti i le au pasiketipolo e masani lava ona sili atu lava togi nai lo oe. Le tagata lea e fia faauo i ai tagata uma lava . I le lalolagi o faatusatusaga, e foliga mai e i ai lava se tasi e sili atu i taimi uma.
O faatusatusaga e mafai ona sili ona faigata pe a oo mai i le ola ai i le talalelei. Atonu e te manatu e sili atu ona amiotonu isi, i ai se molimau malosi atu, pe lagonaina le Agaga e sili atu ona manino nai lo oe. Ae o le faatusatusaina o oe lava faapenei e lē aoga.
Mai le Tusi a Mamona, atonu ua e iloa o Nifae o se taitai maoae ma se perofeta. Ae o le a le tele o lou iloa e uiga i le uso matua faamaoni o Nifae, o Sama? Sa le o ia o se taitai po o se perofeta e pei o Nifae, ae sa le manaomia ona avea ia e pei o Nifae ina ia lava ai lona lelei.
1. Sa Talitonu Sama
Sa tatalo Nifae ma maua se tali mo ia lava faapea na poloaiina e le Alii lo latou aiga e o ese atu i le vao. Ma sa “talitonu Sama i upu a Nifae” (tagai i le 1 Nifae 2:16–17). Atonu e lei i ai se molimau atoatoa a Sama. Atonu na i ai ni ana fesili. Ae sa ia filifili e talitonu i upu a lona uso, ona ia faatino lea o ona talitonuga. Aua le faatusatusaina lou faatuatua po o lau molimau i isi tagata. A o e faatino i le faatuatua e pei ona sa faia e Sama, o le a tuputupu ae lemu lau molimau i le Faaola. (Tagai foi i le Mataupu Faavae ma Feagaiga 46:13-14; Alema 32.)
2. Sa Lotomaualalo Sama
Sa le’i fiafia Lamana ma Lemuelu i le avea ai o lo la uso laitiiti, o Nifae, ma se taitai ia i laua. Ae o Sama, o le uso matua foi o Nifae, atonu sa lotomaualalo o ia. Sa faalogo o ia iā Nifae ma mulimuli i lana fautuaga (tagai i le 2 Nifae 5:3–6). Afai e talosagaina isi o loo siomia oe e taitai ae le o oe, ia e lotomaualalo, ma aua le faatusatusa. Lagolago i latou, a’oa’o mai ia i latou, ma ia e faia le mea sili e filifili le mea sa’o.
3. Sa Onosai Sama
Atonu e foliga mai o tagata uma o siomia oe o loo ola i se olaga atoatoa, ae e oo uma tagata i taimi faigata. Sa le’i ese mai ai Sama. Sa faasagatau atu Lamana ma Lemuelu ia Sama, e pei lava ona la liliu faasagatau atu ia Nifae. Sa la taia foi Sama i se tootoo, e pei ona la taia ai Nifae! (Tagai i le 1 NIfae 3:28; 1 Nifae 7:6.) Ae sa onosaia e Sama ona tofotofoga. O le feagai ai ma taimi faigata e le faapea ai o lo’o e faia ai se mea sese. Aua le faatusatusaina ou tofotofoga i tofotofoga o isi tagata. Ia onosai, ma faalagolago i le Alii. O le a Ia fesoasoani ina ia e manumalo.
4. Sa Faamanuiaina Sama
Na tau atu e le tama o Sama, o Liae, ia Sama, “O le a faamanuiaina oe i ou aso uma” (2 Nifae 4:11). Atonu e lei avea Sama ma se taitai po o se perofeta, ae sa ia mulimuli pea ma le faamaoni ia Iesu Keriso, ma sa faamanuiaina o ia mo lena mea. Faatasi ai ma le fesoasoani a le Faaola, sa lava lona lelei. E mafai foi ona lava lou lelei.