Fesili ma Tali

“Ou te manaomia se fautuaga i le fuafuaina o gaoioiga a le autalavou. O a nisi o manatu lelei?”

“Taulai atu i manaoga o lau vasega [po o le korama] ma fuafua ni auaunaga ma ni gaoioiga eseese e tuufaatasia ai ma faamalolosia tagata o le vasega, fausia molimau, faamanuia ai isi, ma maua ai le fiafia.”

“O Le A Se Mea e Tatau Ona Ou Taulai I Ai?,” O Lo‘u Valaauga o se Sui Auai o le Au Peresitene o Vasega a Tamaitai Talavou, Potutusi o le Talalelei.

Feauauai ma Fuafua Faatasi

“Matou te feauauai i vaiaso taitasi e fuafuaina gaoioiga. O lenei mea e aveesea ai le atuatuvale mai le tagata e toatasi, ma matou maua ai ni manatu eseese. O le faia o se gaoioiga tou te fuafua faatasi, e aoga foi. Matou te fiafia e taaalo i taaloga, taliē faatasi, ma faia auaunaga.”

Adelynne S., 17, Iuta, ISA

Aumaia o Isi i le Faaola

“Fesili atu i tagata o lau vasega po o le korama po o a mea latou te fiafia e fai. Filifili gaoioiga o le a aumaia faatasi ai le autalavou ma i le Faaola, ma tau lava o le fiafia faatasi! O gaoioiga auauna atu sa avea pea ma nisi o gaoioiga e sili ona ou fiafia i ai. Ou te maua ai lava ni uo fou!”

Katie G., 18, Uosigitone, ISA

Taumafai e Faaaofia Tagata Uma

“O gaoioiga lea e mafai e tagata uma ona auai ai, e mafai ona lagona ai e isi le taliaina atili. O le fesili atu i lau vaega po o a mea e masani ona latou faia i taimi paganoa po o isi mea latou te fiafia i ai, e aoga tele.”

Lily D., 13, Arisona, ISA

Fesili e Tolu

“E masani ona fuafua e lau vasega ia gaoioiga e faavae i fesili e tolu: O le a le mea e tatau ona tatou faaleleia? O ai e manaomia ona tatou lagolagoina? Pe o le taimi ea lenei mo se gaoioiga e faaalu ai se taimi ma le malosi itiiti ane nai lo isi gaoioiga? I le i ai o nei mea i le mafaufau - tatalo, mafaufau loloto, ma fefautuaai faatasi. E te mafaia!”

Isabella R., 14, Oregon, ISA

Faavaa Faaleagaga

“O le a e manaomia ni mekasini a le Ekalesia ina ia mafai ai ona e oti ese ata faaleagaga po o savali e musuia ai oe. Ona tuu lea o le vaega na e otiina i se faavaa i se faatulagaga tulaga ese. E mafai ona e tuu i se mea e mafai ona e tilotilo i ai.”

Florence M., 14, British Columbia, Kanata

O tali ua faamoemoe mo se fesoasoani ma se vaaiga, ae e lē o ni faalauiloaga aloaia o aoaoga faavae o le Ekalesia.

O Le A Sou Manatu?

“E faapefea ona ou iloa o mea o lo’o o’u faitauina i le Tusi a Mamona e moni?”

Auina mai lau tali ma lou ata ae le‘i oo i le aso 15 o Fepuari, 2024.

Imeli mai ia i matou i le [e-mail]. Pe alu i le ftsoy.ChurchofJesusChrist.org ma kiliki le “Auina Atu Lau Galuega.” Saini e alu i totonu i lau Faitotoa a le Ekalesia ona filifili lea o le “Mo Le Malosi o le Autalavou” i lalo o le “Filifili le Mekasini.” Kiliki le “Faaopoopo le Faila” e filifili ai lau faila ma ata, ona kiliki lea o le “Auina Atu” e utaina ai ma auina mai ai ia i matou lau faila.

E ono sui ia tali mo le uumi po o le manino.