“O Se Pailate i le Autau a le Alii,” Mo Le Malosi o le Autalavou, Ian. 2024.
O Se Pailate i le Autau a le Alii
O Lamar F. mai Midlands Sasae o Egelani, sa i ai ni sini tetele e faatumauina ai lona siitia maualuga, e tusa lava pe faigata.
Ata na saunia e Satomi Folkett
“Sa ou manao e lele i vaalele mo se taimi umi lava lea ou te manatua,” o le tala lea a Lamar F. e 17 tausaga le matua. Ina ua tau atu ia te ia e se uo mai ona aso a’o ia taututuu i le nofoa faataavalevale, e uiga i se faalapotopotoga alofa mai i Peretania lea e fesoasoani i tagata e i ai manaoga faapitoa e aoao e aveina vaalele, sa naunau Lamar e taumafai.
Moemitiga Maualuluga Pei o le Lagi
Sa ia saini e alu i totonu mo polokalama e lua a le faalapotopotoga alofa. O se tasi o i latou, o le Polokalama a le Junior Aspiring Pilots (JAPP), na fatuina faapitoa mo le autalavou i le va o le 12 ma le 18 tausaga. O nei polokalama ma isi lesona taitasi, na uunaia ai o ia ia latalata atili atu i lana sini tele—mauaina o lona Laisene Pailate Tumaoti.
O se vaega o ana musumusuga e sau mai lona aiga. O le tama tausi a Lamar o le tagata muamua lea na faamasaniina o ia i vaalele, na te aveina o ia i faaaliga vaalele i le ‘ea i tausaga taitasi. Mulimuli ane, ina ua uma ona vaetamaina o ia e se isi aiga i le fa o ona tausaga, sa faaauau pea ona olaola le fiafia o Lamar i vaalele a o ia vaavaai atu i lona tama na vaetamaina o ia, o aoga mo lona laisene pailate. “O ia o lo’u faamalosiauga mo le manao e avea ma se pailate,” o le tala lea a Lamar. O lea la ua mafai e le tama a Lamar ona tietie faatasi ma ia i vaalele e lima nofoa ae tasi le pe’ape’a, lea e aoga ai Lamar ina ia mafai ona ia aveina.
O matua o Lamar (o loo i ona itu e lua i le ata lea) o nisi ia o ana lagolago sili ona maoa’e.
I le malaga muamua a Lamar i se vaalele moni, sa ia lagonaina le popole i le manatuaina o mea uma. “Sa ou faia se tatalo vave lē leoa ae ou te lei alu i luga, ma sa ou manuia,” o lana tala lea. O lea la, pe a ia tauivi e manatua se mea ao i luga i le ea, o na tatalo laiti, ma le leoa e fesoasoani ia te ia e faia ai le mea e tatau ona ia faia. E tusa lava pe le o i ai lona tama i le nofoa pito i tua, e iloa lava e Lamar o loo i ai pea lona Tama oi le Lagi faatasi ma ia.
O Le Autau a le Alii
O le lele e le na o le pau lea o le mea e faatumauina ai le faagaeetia o le agaga o Lamar. “Sa avea lava au ma sē e fiafia tele i le militeli a Peretania, o mea uma mai lava i se faauuga tautupu e oo atu i se falelauasiga,” o lana tala lea.
“Ona o ou manaoga faapitoa, ua le mafai ai ona ou auai i le militeli,” o le tala lea a Lamar. Ae o se tasi o ona taitai sa i ai muamua o Alii Talavou o le sa avea foi ma fitafita na faamalosiauina Lamar. “Sa ia faamanatu mai pea ia te au e le tatau ona ou i ai i se militeli faalelalolagi, aua ua ou i ai i le autau a le Alii,” o le tala lea a Lamar. “O le i ai i le autau a le Alii ou te lagona ai e tusa lava po o a mea e tauai mai e le olaga ia te au, e tusa lava po o a mea e fai e soo se tasi ia te au, o loo i ai Iesu Keriso i o’u autafa.”
O Uso Bayliss, le taitai o Alii Talavou a Lamar, na musuia o ia e auai i le “Autau a le Alii.”
I le kolisi o manaoga faapitoa sa ia auai ai, sa taumafai ai Lamar e fesoasoani i isi tagata o lana tupulaga ia auai i le autau a le Alii a o ia faasoa atu le talalelei ia i latou. “O le tele lava o taimi, e le amanaiaina ai a’u,” na ia fai mai ai, “ae o nisi o taimi, e i ai nisi e fiafia mai. Ona o nisi o o’u manaoga i lenei taimi, o le auauna atu i se misiona talai i se taimi vave e le o se filifiliga (mo a’u). Ae ou te vaai i ai faapenei: Ou te le manaomia se pine o le igoa e avea ai ma se faifeautalai.”
Faatasi ai ma le toa laiti o talavou i lana uarota, o le toatele o uo a Lamar e le o ni tagata o O Le Ekalesia a Iesu Keriso o le Au Paia o Aso e Gata Ai. E le faigofie i taimi uma lena mea i le aoga, aemaise lava pe a i ai, e pei ona faaupu ai e Lamar, o “avega atoatoa” o faaosoosoga. “E toatele tamaiti aoga e talanoa e uiga i mea e le talafeagai ma faalogologo i musika e le talafeagai. O le mea moni, soo se taimi e tupu ai se mea faapena, ou te alu ese loa ma alu atu i se potu e le o tupu ai se na mea.”
Tumau ma le Malosi
Pe a oo mai faaosoosoga po o isi e le fiafia e faalogo e uiga i le talalelei, e faamaualugaina e Lamar lana mau e sili ona fiafia i ai: “Ae mo a’u ma lo’u aiga, matou te auauna ia Ieova” (Iosua 24:15).
“O lenei mau ua fesoasoani ia te au e tumau malosi ai i le faatuatua ia Iesu Keriso,” o lana tala lea. E faapitoa le taua o lenei mea ia Lamar i lona lava aiga. Ina ua 10 tausaga o Lamar, sa le toe sau lona tama i le lotu. “Sa ou laitiiti i lena taimi, o lea sa ou le malamalama atoatoa ai,” o lana tala lea. “Sa ou taumafai e faatalitonu o ia e toe foi mai. Ae ua ou aoaoina e le o faatatau i lena mea. E te tuuina atu ia i latou le taimi.”
O loo i ai pea se sootaga vavalalata a Lamar ma lona tama ma na te faaali atu ia te ia le alofa i auala o aso uma, e pei o le faamatala atu ia te ia o le mea na tupu i le lotu po o le faaaluina o le taimi faatasi ma ia. “E masani lava ona ia aoaoina a’u e tusa lava po o le a le mea e te oo i ai, e tatau lava ona e tumau malosi.” Mo soo se talavou o i ai tagata o aiga e le o toaaga mai i le Ekalesia, na ia faaopoopo mai, “Tumau ma le malosi. Taofi mau pea i lou faatuatua. Aua le fiu, e tusa lava po o le a.”
Sailia o Keriso Pe A Oo Ina Faigata Mea Uma
Ua maua foi e Lamar le lototele ia Keriso i isi auala patino. ”Ou te mafatia lava i le popolevale tele i nisi taimi,” o le tala lea a Lamar. “Ou te matea o le tagata silisili e tuuina mai ia te au le lototele e faaauau ai pea o Iesu Keriso lava Ia. Sa tele naua mea sa Ia mafatia ai, ae sa Ia faaauau pea i Lana misiona.”
A oo ina matua leaga lava le aso o Lamar, e masani ona ia vaai faalemafaufau i le faamalosiauina o ia e le Faaola, ma faapea atu, “E te mafai ona faia lenei mea. E mafai ona e sao mai i so’o se mea.”
Na te aumaia foi le malosi mai lona tina ma lona tama, ana uo, ma isi tagata e latalata ia te ia. “Sa i ai se taimi na taitaiina atu ai a’u i se ala sese,” o le tala lea a Lamar. Ae faafetai i se vaega lagolago lelei, sa mafai ai ona ia fetuunaia lona ala ma faamalosia ai lana molimau ia Keriso.
“O loo ou atiina ae pea lau molimau,” na ia fai mai ai, “ae e matagofie le avea ma se vaega o le autau a le Alii ma i Le Ekalesia a Iesu Keriso o le Au Paia o Aso e Gata Ai. O se mea ou te fiafia i ai.”
O lana malaga atonu sa lugā ma lalō, ae ua iloa e Lamar le mea o loo taofia ai o ia e lele maualuga. “Po o a lava tofotofoga po o faafitauli e te oo i ai, o le a i ai le Tama Faalelagi i ou autafa aua e popole o Ia ia te oe ma alofa ia te oe.”