“Kabebetea ao Kakorakora Buokaia Aomata Bwa a na Roko nakon Kristo,” Ibukin Kakorakoraia Kairake, Turai 2024.
Kabebetea ao Kakorakora Buokaia Aomata Bwa a na Roko nakon Kristo
E mwaiti aanga ni kaota am tangira, tibwaua am koaua, ao ni kaoia aomata bwa a na roko nakon Iesu Kristo.
N te tai teuana i nanon au moan ririki n te kauarinan, e titirakinai raoraou ae Nedra, “Russ, e aera koaki nanakon te tieminari?”
N te tai anne, a aki nanakon te taromauri. I nanakon te taromauri n tabetai ma raoraou, ma I aki iriira buakon te tieminari. N te bong are i mwiina, I a roko ni kaea te tieminari are 6.30 n te ingabong. I mwiin anne, I a roroko iai ni katoa bong—e ngae naba ngkana e mwaitoro man bwaka te tinoo n te ingabong.
A riinga nanou bwaai ake I reiakinii n te tieminari. Au kakoaua e rikirake ngke I reiakina ae bati riki ibukin Iesu Kristo ao Ana euangkerio are e a tia ni kaokaki. E katauraoai aio nakon au mwakuri ni mitinare i Engiran ao n reitinako i nanon te maiu n beku ibukin te Uea ao Ana Ekaretia.
E buokai ana kakao Nedra nakoiu ni kaean te tieminari n nooria, n te anga ae onoti irou, bwa iai aanga aika bati ibukim n buokiia tabeman bwa a na roko nakon te Uea ae Iesu Kristo. N aanga aika bebete ma a korakora, ko kona n kaota am tangira, tibwauai am kakoaua, ao ni kaoia ake irarikim bwa a na rinanon te kimwareirei ao te rau are e uotia te Tia Kamaiu ao Ana euangkerio.
Karekea Kinaakin te Tia Kamaiu
N buokaia aomata ni koaua bwa a na rokoi nakon Kristo, ko riai moa n ataia bwa antai Ngaia. Iesu Kristo bon Natin te Atua ao bon ti ngaia are e kona n riki bwa ana Tia Kamaiu ao te Tia Kabooa te aonaaba.
Bon ti Ngaia ae kona n maiuakina te maiu ae kororaoi, e mate ibukin ara bure, korakai ibukin ni kabane “marakimi ma karawawataakimi ao kaririakimi ” (Aramwa 7:11), ao ni kawenea Maiuna ao ni manga tabekia rake riki. Ibukin ana mwakuri Iesu Kristo, ni kabane natin te Atua a na manga bane n teirake riki ao n karekea kabanean tabun ao mimitongin Ana kakabwaia.
Ngkai ko ataia bwa antai te Tia Kamaiu—ao tera tein kawaim ae akea tokina mai Irouna—ko na tangiria n maiuakina maium n te aro ae kakukurei i matana. Ao e na bon Kakukureia ngkana ko taetaekina Ana euangkerio, n am taetae ao n am mwakuri, nakoia ake ko rereitaki mangaia ni katoa bong.
Arora Baim ma te Tangira
Ngkai ko a tabe ni kiina ao n tangira am Tia Kamaiu, ko na tangiria n Iriria ao Ana reirei ni kaaniaki, n ikotaki ma Ana tua bwa kam na “itangitangiri” (Ioane 13:34).
Ngke e nako Amon ibuakoia Reimwanaite bwa e na tibwauaa te euangkerio nakoia, e anga nanona bwa e na riki bwa ana toro Te Uea ae Ramonaai. E kaota te tangira ni koaua ao te kakaonimaki Amon ngke e kamanoi ana tiibu te uea. Ana mwakuri Amon a kamaraua nanon te Uea ae Ramonaai. Ngke e reiakina te euangkerio Amon nakoia, e kaona te Uea ae Ramonaai te Tamnei, ao e rairaki (taraa Aramwa 17-19).
Te riki bwa ana reirei Iesu Kristo ni koaua e nanonaki n tangirakiia kaain rarikim n ai aron tangiram i bon iroum (taraa Mataio 22:36-40). Ngkana a kona n namakinna bwa ko tangiriia ao n tabe ibukiia, a na kona riki n butimwaiko bwa ko na tibwauai bwaai ake ko kakoauai nakoia.
Karekean te Ninikoria N Tibwatibwa
Rinanon te Burabeti Iotebwa Timiti, e kaoka te nakoanibonga te Tia Kamaiu nakon te aba ma otenati ao berita aika tabu aika a tau ibukin rikirakera ae akea tokina. N te tai are e riinga nanom mimitongin rongorongon Kaokan bwaai, ko na tangiria n takaruaia mai taubukin auti! Ko na ingainga n kan tibwauaa te atatai ae kakawaki i aon te euangkerio ae e a tia ni kaokaki nakoia te koraki ni kabane. I rangi n tangiria ni karaoa anne!
Tabeman ana raraoma irouia ake a aki nano iai ke n ribaa te bwai are a tibwauaia. Eng, e na bon bae n riki anne. I mwiin biribirin Abiti man te auti teuana nakon te auti teuana n tuangiia aomata mwakan te Atua are e a kaonrakea te Uea ae Ramonaai ao kaain ana auti, tabeman a kakoauaa, ma e mwaiti aika a rineia bwa ana aki ongo (taraa Aramwa 19:17-31).
Ngkana a butimwaia ke aki, te kabanea ni korakora ni bwaintangira ae ko kona n angan raoraom ke kain am utu—ke bon am kairiribai—bon ana euangkerio Iesu Kristo. Tataro bwa ko na karekea te ninikoria, ao ngkanne, ngkana e riai, tibwauai ake ko atai bwa a koaua.
Kanakoa am Kakao ae Nako Raoi Mai Nanom
Ngke I beku bwa te beretitenti n te Canada Toronto Mition, I ibuobuoki n raoniia au mitinare tabeman n reiakina temanna te tia karikirake ae rangi ni kinaaki. I mwiin ara anga reirei, I kaoia bwa e na tataro ao n butiia Tamara are i Karawa ngkana e koaua ara rongorongo.
“I babanga n tataro,” e taku.
I tuangnga ae te bwai ae e na ti karaoia bon te katorobubua n bubutia Tamara are i Karawa bwa e na kamatoa te koaua nakoina.
“Ko kona ni karaoa anne!” I kaungaa nanona.
Ti katorobubua ao e a moana ana tataro. Ngke e tia, ao e taku, “Tera ae e a riki? I tuai man nanamakina te aekaki aio mai mwaina.”
I taku “Anne ana anga Tamara are i Karawa ni kaekaii tataro”. “Ko a tia n bubuti, ao E a tia ni kaekako.”
I aki toki n reiakiniia mitinare ao membwa ni kabutaa te aonaaba bwa te rairaki e moa man are e namakinnate aomata. Ngkana ko kaoia aomata bwa a na ongoraeakina te euangkerio, kaoia naba bwa a na tataro ao n bubuti bwa a na namakina te koaua i nanoia. Ao ngkana arona bwa kam bubutia te Atua (taraa Iakobo 1:5) ma te nano ae koaua ma nanomi raoi, ao te onimaki iroun Kristo, e na bon kaota te koaua nakoimi ni mwaakan te Tamnei ae Raoiroi (taraa Moronaai 10:4–5). E nang kaunga man kakukurei buokakiia aomata bwa a na karekea te koaua i bon ibukiia.
Uringnga Bwa A Kakawaki Aomata Ni Kabane
Ko aki kona n ataia bwa tera ae e na riki nakoim ngkana ko buokiia aomata bwa a na roko nakon Kristo rinanon te tatangira, te tibwatibwa, ao kaoakiia. Te katooto, taian Reimwanaite,, a taraa n tei bwa kanga aomata aika a na aki kona n butimwaea te euangkerio, ma a rairaki ao a bon “aki manga tannako” (Aramwa 23:6-7).
Ko riai n aki kaantaninga te aekaki aio ni katoa tai are ko tibwaua iai te euangkerio. Ma n aanga aika bebete man korakora, ko kona ni kakoauaa te koaua ao ni buokiia ni kairiia natin Tamara are i Karawa nakon ana euangkerio are e a tia ni kaokaki.
Ngkana ko noora kakawakin temanna natin Tamara are i Karawa Nakoina, ko na tangiria n kan karaoi bwaai ni kabane n buokiia aomata bwa a na roko nakon Kristo ao n rinnakoa ootan Ana euangkerio ao kawain te maiu ae aki mamate ao te maiu ae akea tokina.
Tera riki te taneiai ae korakora ae ko kona ni karekea i nanon maium?