“Keiakinan Bwaai ni Kabane,” Ibukin Kakorakoraia Kairake, Turai 2024.
Keiakinan Bwaai ni Kabane
Te kakaitara bon mwakoron ana babaire Tamara are i Karawa. Ma tera ae ti na karaoia ngkana e a bon kuba ni kaoti man taabo aika aki kaantaningaaki?
Kamataata n te tamnei iroun Paulina Wyrt
E bati te tai n te ingabong ae kauringaaba arei, ae I a taku bwa nang bon mate. Taraakin ni kabane te raraa—rarau —are e a rotoroto iai te tabo n nakonako ao namakinan unin te bea nakoiu man iterau nako ma wiina ao ukin baina e uota te namakin ae taonainako ao te bwarannano.
Te Ingabong ae Tamaroa
Bon te kaitara ae korakora ni kabotauaki ma uoua te aoa n nako. I unga n rianna n taabo n rianna are e buakonikai n te bong ae rangi n tamaroa riki nakon boong ake I a tia n nonoria n taain te tiamwa ngke I kauarinan i maeaon Wyoming, USA. Karan karawa bon te buruu maii, ueen te buakonika a kaonii iteran taian tabuki, ao e kamwaitoro angin te ingabong anne ma e kamaiu. Bon te bong ae tamaroa ibukin te biri 15 te maire (24 km) n te mauga.
Bon te biri ni kataneiai. I kataia ni karikirakea korakorau ao ikemwakau ibukin te kaboo n te biri ae abwabwaki i nanon uoua riki te namwakaina. A kakorakoraia taan biri man kaokiokan te biribiri n te anau-ae uarereke. Aio e karikirakea ikemwaakam, are e na kamatoaa nanomatoam i nanon taina.
E uarereke au atatai bwa ngaia n te tai ae aki maan ao e na roko kainanoan ni kabane te nanomatoa ao te korakora are irou bwa ngaia N nang rinnakoa te kaboobirimwaaka ibukin maiu.
Te Tiribooaki ae Karina
Ngkana I ururing rikaaki, ao N na bon riai n kaman noori kanikinaa. Bwa, e tuangiira bwaai ni kabane te Uea are E na “kaoti [nakoira] bwaai aika a na roko” rinanon mwaakan te Tamnei ae Raoiroi (Ioane 16:13). N aron ae e a tia n reireiniira Unimwaane Gary E. Stevenson man te Kooram n te Tengaun ma Uoman,“E na buokiko te Tamnei ae Raoiroi n kauringko n moantaai taekan kangaanga n rabwata ao n tamnei.” Ao E karaoa raoi anne.
Tabeua te miniti i mwain biriu, ao I baraaki ao iai te bwai ae I nooria. E ueerake nanou ngke I noria bwa ngaia bon mwanekan te bea are tane iaon tano i moau. Bon te kauring ae mataata. Ma nanobabau, I taareia bwa e a tia te bea n rikai n te kawai aio ao ngkanne ngkai I aki kona n kaitiboo ma ngaia. Akea te raraoma kee, eti? Ao ngaia are I a biri.
E aki reke te aoa i mwiina, ao I noora te tabuki ae uarereke ao I a biri rikaakia te tabuki anne nakon te tabo ae a bati aroka n kaitiakaki iai. Ngke I a roko n te kabwao n mwanokan te tabuki, I a ongo naba tangin te bwai ae kurati ae rangi n kanakonano, ao man korakora, ao n uti kuniu mai bukin atuu. I a bon tei naba ao ni karaurau n taraa maingiu. Ao I tiaoki ma te maaku. Te rongoaa, are I waekoa n ataia bon mwaoton mwaangan kaai, e roko n rangi n tawe. Ao I nora te bwai ae I bon aki kona n manga mwaninga—te bea ae ikawai ae e a kainetai!
Tiriboakiu ae kamamate aio e na bon riai n anaa maiu. Aio bon te bea ae e rangi n un, are I kakubanako iai ngke I a roko n te tabo ane e itiaki anne n biri nakon te mate. Ma ngke I iangoia bwa N nang bon mate n te tai anne e rimwiiaki anne ma te tataro ae korakora ibukin maiu. E ruo ana nanoanga karawa n taobaraa te bwai are e riki.
N akea kaantaningakina, e toki unin te bea ao unna nakoiu ao n birinako n te buakonikai. Anne bon te rongorongo ae tamaroa! Te rongorongo ae kananokawaki bwa iai 16 ikoakiu aika kakaiaki man wiin ao bain te bea ao ti ngai n te Buakonikai, n onrake n te rara, ao 11 te maire (18 km) raroan te kawai ae kaan, ao akea te buoka ae kona n reke iai.
Te Tai n Rinerine
I kunea ni waekoa bwa I a roko n te tai are N nang karaoa te babaire ae korakora ibukin maiu. Ngkana e tuai n reke iroum te tai n aron aio, e na bon riki. Te kakaitara bon mwakoron ana babaire Tamara are i Karawa. Te katekeraoi, te tiriboaki iroun te bea tiaki—ibukira ni kabane! Ma n te tai teuana, ko kona namakina te kararawataaki man taian kangaanga ake ko aitara ma ngaia. Bon te namakin ae kabwaranano bwa e a tia te Uea n kabwarabwara raoi bwa kanga ai aron ae “mwangain moone e na “kaurea wiina n rimwiim” (Reirei ao Berita aika Tabu 122:7).
N kawain taian kangaanga i nanon maium, iai am rinerine ae ko riai n karaoia. Ko kona n kabwara nanom, n wene, ao ni mate; ke ko kona n keiaki ni boota ninikoriam ma korakoram ao n ninikoria n uun, ao n onimaki bwa ko na bon karaoa tabem, ao te Uea e na karaoa Tabena. E kabwarabwara te Uea bwa oin bukin taian kangaanga ni maiun Iotebwa Timiti ngke e korakai n te Karabuti ae Liberty: “Bwa ni kabane bwaai aikai a na anganiko te kataneiai, ao bon ibukin kabwaiam” (Reirei ao Berita aika Tabu 122:7).
Ao iai uaana nakoim. A na katamaroako man kanakoraoiko i nanon am tai n karikirakea korakoram ao karikirakean nanomatoam. Aio bukin e tuanga Iotebwa te Uea—ao e tuangko—bwa ko na “taua kawaim” i nanon aitaram ma kangaanga ao te kakaitara (Reirei ao Berita aika Tabu 122:9). Ao ngkana ko teimatoa i nanon maium—e ngae ngkana koa tautau man ti ukin baim—ko na kunea bwa korakoram are uarereke anne e na kakorakoraaki iroun te Uea. N aron are beritanaki, E korakora “mwaakana ni kamaiu” (2 Nibwaai 31:19).
Teimatoa
Bon anne te bwai ae e riki nakoiu. Ma te aki bwarannano, I rineia bwa N na tei rake. I motikia mai nanou bwa N na maiu, are nanona bwa Nna kakaea buokau. N rabinobinou rikaaki n te kawai n rianna ae riaaon teuana te maeire abwakina, I a kaitiboo ma aomata tabeman ake a mena raoi naba n te buakonikai n te bong anne n te maire ae abwabwaaki. Te kaitiboo ae kamimi anne e a karokoa te kamaiuaki ao I a tabekaki nako n te erekabuta, teniua te korokoro-ni kamaiu, ao te atatai ae mataata n te kakabwaia are reke man nanomatoau n“taua kawaiu.”
E reke buokan Unimwaane Dunn, e kamaiuaki, ao e korokoro teniua te tai.
Te taneiai aio e karikirakea korakorau, nanomwaakau, ao au onimaki. E kakorakorai man katauraoai naba bwa N na kanga ni kaitarai kangaangan te maiu aio. I kakoaua bwa ngkana ko “[keiakin] bwaai ni kabane, [kakoauai] bwaai ni kabane, [kaantaningai] bwaai ni kabane, [teimatoa] ni bwaai ni kabane” (1 I-Korinto 13:7) ao kona kabwebwerakea te nanomatoa ao te korakora are ko kainanoia n kaitarai kangaanga. Ko na noora bain te Uea n katitebooko ma ake kona kaitarai i nanon kawaim—e ngae ngkana “mwangain moone.”