“O Lau Vaega i le Galuega Tele a le Alii,” Mo Le Malosi o le Autalavou, Iulai 2024.
O Lau Vaega i le Galuega Tele a le Alii
Pe a e alofa, faasoa atu, ma valaaulia, e te fesoasoani i le Alii i le fesoasoani atu i agaga faapelepele uma ia o mai ia te Ia.
O Keriso o loo Tatalo faatasi ma sa Nifae, saunia e Casey Childs
Ua aoao mai lo tatou perofeta, o Peresitene Russell M. Nelson, e faapea o le faapotopotoina sili o Isaraelu “o le galuega aupito sili lea ona taua o loo tupu i le lalolagi i le taimi nei.” Sa ia faapea mai, “E leai se isi mea e faatusalia i le maofa tele. E leai se isi mea e faatusalia i le taua. O faifeautalai a le Alii—Ona soo—o loo auai i le lu’i aupito silisili, le mafuaaga aupito silisili, ma le galuega aupito silisili i luga o le fogaeleele i le taimi nei.”
E le faapea e tatau ona vaetofiaina oe o se faifeautalai o aoaoga po o auaunaga e auai ai i lenei galuega. O loo i ai avanoa i soo se mea mo oe e te alofa ai, faasoa atu, ma valaaulia. E mafai ona e fesoasoani i isi e o mai ia Keriso—i le taimi nei—e ala i le faaali atu o lou alofa, faasoa atu ou talitonuga, ma valaaulia i latou e auai faatasi ma oe ia lagonaina le olioli o le talalelei.
E mafai ona e auai i le galuega tele a le Alii!
Amata i le Alofa
I le Faatoaga o Ketesemane ma luga o le satauro, na tauave ai e Iesu Keriso i Ona lava luga agasala a le lalolagi ma mafatia i faanoanoaga uma ma “tiga ma puapuaga ma faaosoosoga o ituaiga eseese uma” (Alema 7:11). O lenei mea “na oo [ai] ia te [Ia], … o lē ua silisili i tagata uma, le gatete ona o le tiga, ma tafe toto ai i pu afu ninii uma” (Mataupu Faavae ma Feagaiga 19:18.) E ala i Lana Togiola ma le Toetu, ua fai ai e Iesu Keriso le faaolataga ma le faaeaga ia maua e tagata uma.
O le liliu atu i le Faaola ma mafaufau loloto i mea uma ua Ia faia mo oe o le a faatumulia ai lou loto i le alofa mo Ia. Ona Ia liliu atu lea o lou loto i isi. Ua Ia fai mai e te alofa ia i latou (tagai Ioane 13:34–35) ma faasoa atu Lana talalelei ia i latou (tagai Mataio 28:19; Mareko 16:15). O le mea lenei sa Ia faia a’o soifua o Ia i le lalolagi. Sa Ia faasoa atu Lona soifua ma Lona alofa ma valaaulia tagata uma e o mai ia te Ia.
A e faasoa atu le talalelei, amata i le alofa. A o e aapa atu i isi i le alofa— a o manatuaina o i latou o ou uso ma tuafafine ma fanau faapelepele a lou Tama Faalelagi—o le a matala avanoa mo oe e faasoa atu ai mea ua e iloa e moni.
Ia Auai ma le Naunautai ma Faasoa Atu
E leai se tasi na sili atu ona tuuto i le faasoaina atu o le talalelei nai lo Peresitene M. Russell Ballard (1928–2023). I lona soifuaga atoa, sa auai ma le naunautai o ia e faasoa atu i tagata uma e faapea, o le atoaga o le talalelei a Iesu Keriso ua toefuataiina mai e ala i le perofeta o Iosefa Samita. Ua ia faamalosiau mai ia i tatou ia faia foi lea mea e tasi.
Na aoao mai Peresitene Ballard e mafai ona e faasoa atu le talalelei “e ala i le avea ma [se] [tuaoi] lelei ma e ala i le manatu i isi ma le faaalia o le alofa.” O le faia o lena mea, e mafai ai ona [e] “faasusulu atu le talalelei i lou lava [olaga], ma … ia susulu atu i [isi] faamanuiaga o loo ofoina mai e le talalelei.” E mafai foi “ona e molimau atu i mea ua e iloa ma talitonu i ai ma mea e te lagonaina.” Sa aoao mai Peresitene Ballard, “O se molimau mamā … e mafai ona momoliina e le mana o le Agaga Paia i totonu o loto o i latou o e ua naunau e taliaina.”
O le faasoaina atu o le talalelei toefuataiina a Iesu Keriso o le faanaunauga sili lea o le loto o Peresitene Ballard. E mafai ona e auai ma le naunautai—e pei ona sa i ai o ia—i le faasoaina atu o le talalelei i upu ma galuega. E te le iloa lava po o ai o loo saili mo le malamalama o le talalelei ae e le iloa le mea e maua ai (tagai Mataupu Faavae ma Feagaiga 123:12).
O Peresitene M. Russell Ballard ma Elder Quentin L. Cook i Liverpool, Egelani, i le aso 25 o Oketopa, 2021. Sa la auauna uma atu i ni misiona i Egelani.
Tuuina Atu se Valaaulia Mai le Loto
I le fesoasoani atu i isi ia o mai ia Keriso, e mafai ona e valaaulia i latou ia lagonaina le olioli e aumaia e le Faaola ma Lana talalelei. E mafai ona e valaaulia i latou e o mai i se gaoioiga, e faitau le Tusi a Mamona, pe faalogo i se lesona mai faifeautalai. E mafai foi ona e tuuina atu se valaaulia mai le loto mo i latou e auai faatasi ma oe i le sauniga faamanatuga.
Tatou te auai i sauniga faamanatuga i vaiaso taitasi e “tapuai i le Atua ma aai ma feinu i le faamanatuga e manatua ai Iesu Keriso ma Lana Togiola.” O se taimi faapitoa lenei mo tagata e lagona ai le Agaga, faalatalata atili atu ai i le Faaola, ma faamalosia ai lo latou faatuatua ia te Ia.
A o e vaavaai mo auala e alofa ai, faasoa atu, ma valaaulia, taumafai e valaaulia aiga ma uo e auai faatasi ma oe i le sauniga faamanatuga. Afai o le a latou taliaina lau valaaulia ma auai, o le a fesoasoani ia i latou e faaauau ai i luga o le ala i le papatisoga ma le liuaina. Ou te talitonu ma lo’u loto atoa o le a oo mai le manuia tele pe a outou valaauliaina isi ma fesoasoani ia latou iloa faamanuiaga e mafai ona latou maua mai le auai faatasi ma outou.
O Le a Taitai Oe e le Alii
E te le iloa lava po o a faamanuiaga ma luitau o le a e maua ao e alofa, faasoa, ma valaaulia. Sa faamanuiaina tele atalii o Mosaea i totonu o sa Lamana a o latou talai atu ma aoao atu le afioga a le Atua. E ala ia latou taumafaiga, “e faitau afe na aumaia i le malamalama o le Alii” ma le toatele “sa liua … [ma] e lei pauu ese lava” (Alema 23:5–6).
E ui o le a le avea lenei mea ma ou aafiaga i taimi uma, ae ua folafola mai e le Alii o le a Ia fesoasoani ia te oe aua e taua agaga uma ia te Ia. A o e tuu atu lou faalagolago i le Alii ma punouai i Lana auaunaga, o le a Ia taialaina oe i le auala e faasoa atu ai Lana talalelei i isi e ala i le alofa ia i latou, faasoa atu lou olaga ma lau molimau ia i latou, ma valaaulia i latou e auai faatasi ma oe i le mulimuli atu ia te Ia.
“O le a tele lava [lou] olioli” (Mataupu Faavae ma Feagaiga 18:15) pe a e faaaogaina avanoa o siomia ai oe e fesoasoani ai i le Alii o Iesu Keriso i Lana galuega sili o le aumaia o agaga ia te Ia.