“Tauave i Luga Mea Uma,” Mo Le Malosi o le Autalavou, Iulai 2024.
Tauave i Luga Mea Uma
O faigata o se vaega o le fuafuaga a le Tama Faalelagi. Ae o le a lau mea e fai pe a tolotolo faafuasei atu ia te oe?
Ata na tusia e Paulina Wyrt
E sili atu ma le faatasi i lena taeao matautia, sa ou mautinoa o le a ou oti. O le tuufaatasiga o le vaaia o lena toto tele—lo’u toto—na tafe atu i le auala ma le lagonaina o le taufeai o le urosa matautia na matamataita mai ia te au mai itu uma ma ona nifo ma matiu’u lea na tuua ai au ua lagona le lofituina ma le leai o se faamoemoe.
O Se Taeao Atoatoa
Oka se eseesega maoae i le na o le lua itula na muamua atu. Sa ou alu ese atu ma le fiafia e momo’e i se auala nuutua i se tasi o aso aupito sili ona manaia sa ou vaaia i lena taumafanafana i le atunuu maualuga o Wyoming i sisifo, ISA. O le lagi sa lanumoana manino, o fugalaau vao na ufitia ai tafāmauga, ma o le ea i le taeao sa maatiati ae sa manaia. Sa o se aso lelei tele mo se tamoega e 15 maila (24 km) i atumauga.
Sa o se tamoega koleni manaia tele lenei. Sa ou taumafai e atiae lo’u malosi ma le tumau mo se malafoni sa na o le lua masina le mamao. E faateleina e tagata tamomoe le malosi e ala i le faia soo o ni tamoega e le mamao. O lenei mea e fausia ai le tumau, lea e faamalosia ai le maufetuuna’i.
E leai ma so’u iloaina o le a vave ona ou manaomia mataua uma o le maufetuunai ma le mana sa ia te au, ona o le a ou i ai i le taufetuliga o lo’u olaga.
O Se Osofaiga Faafuasei
O le toe tepa i tua, sa tatau ai ona ou vaaia ia faailoga. O le mea moni lava, ua ta’u mai e le Alii ia i tatou o le a Ia “faailoa mai ia te [i tatou] mea e oo mai” e ala i le mana o le Agaga Paia (Ioane 16:13). E pei ona aoao mai Elder Gary E. Stevenson o le Korama a Aposetolo e Toasefululua, “E mafai ona fesoasoani le Agaga Paia ia te oe e ala i le lapataia o oe a o lei taitai oo i tulaga matautia faaletino ma faaleagaga.” Sa Ia faia.
I ni nai minute i la’u tamoega, sa ou tilotilo ifo i lalo ma iloa atu se mea. Sa sē lo’u fatu ina ua ou vaai i le auivi e le mafaaseseina o se auala o se urosa i le palapala i o’u luma. Sa o se lapataiga manino. O le faavalevalea, sa ou faapea ai na pasi moni atu se urosa i le auala lenei ae o le taimi nei o le a ou saogalemu. E le tatau ona popole, a ea? Ma o lea sa ou tamoe ai pea.
I le itiiti ifo ma se itula mulimuli ane, sa ou oo ai i le pito i luga o si aega laitiiti ma toe tamoe ifo ai i lalo agai i se avanoa sa tatuu ai laau. A o ou oo atu i se pioga i lalo o le mauga, sa ou faalogoina se pa’o malosi tele, sa matuai taugā lava, lea sa faapea ona tutū ai mone o lo’u tuāua. Sa ou tu i le taimi lava lea ma tilotilo lemu atu i lo’u itu agavale. Ona ou tu faamalō ai lea i le fefe tele. O le pa’o, lea na vave ona ou iloaina o le gauia o lala laau, sa matuai saoasaoa mai. Ona ou vaai ai lea i se vaaiga o le a le galo lava ia te au—o se urosa lapoa ua faasasao mai lava ia te au!
O le osofaiga matautia na sosoo ai sa tatau ona ou oti ai. E mautinoa lava o lenei urosa sa ita tele, lea sa ou faate’ia i lou oo atu i lena avanoa i la’u tamoega saoasaoa. Ae o lena taimi lea na ou manatu ai sa mautinoa lava le oo mai o le oti, sa sosoo ai ma le tatalo aupito faamaoni o lo’u olaga. Ona oo mai ai lea o le faasalaveiga alofa mutimutivale o le lagi.
Ma le le mafaamatalaina, na taofia e le urosa lana osofaiga le malolo ma tamoe ese atu i le togavao. O le tala lelei lena! O le tala le lelei e 16 ou manu’aga tuga mai nifo ma matiuu o le urosa, ma sa na o au i se togavao, na ufitia i le toto, ma le 11 maila (18 km) mai le auala o paka taavale aupito lata ane, e aunoa ma se fesoasoani na iloa atu.
O se Taimi o Faaiuga
Sa faafuasei ona ou oo i se tulaga o faaiuga loloto o lo’u olaga. Afai e te lei mauaina se taimi faapena, ia mautinoa o le a e maua. O faigata o se vaega lea o le fuafuaga a le Tama Faalelagi. O le mea e lelei ai, o le osofaia e se urosa e le o se fuafuaga lea—mo le toatele o i tatou! Ae i se isi itu, atonu e te lagonaina le lofituina i soo se faigata o feagai ma oe. O se lagona o le leai o se faamoemoe na faamatalaina manino mai e le Alii i se tasi o taimi “e tatala faamaga lautele mai e auvae lava o seoli le gutu ia te oe” (Mataupu Faavae ma Feagaiga 122:7).
I nei felavasaiga o faafitauli i lou olaga, ua ia te oe se faaiuga e fai. E mafai ona e fiu, taoto i lalo, ma oti; pe mafai foi ona e aoina uma mai lou lototele ma le malosi ma tau ma le lototoa, ma le faatuatua afai o le a e faia lau vaega, o le a faia e le Alii Lana vaega. Sa faamalamalama mai e le Alii le faamoemoega o mafatiaga o le olaga ia Iosefa Samita a o faafalepuipuiina o ia i le Falepuipui o Liperate: “O nei mea uma e te maua ai le poto masani, ma o le a avea mo ou lelei” (Mataupu Faavae ma Feagaiga 122:7).
Ma e aoga ia te oe. Latou te faama’aia ma faaleleia oe a o e tuputupu ae malosi ma fausia le maufetuunai. O le mafuaaga lea na ta’u atu ai e le Alii ia Iosefa—ma ta’u atu ia te oe—ia “piimau i lou ala” i le feagai ai ma tofotofoga ma faigata (Mataupu Faavae ma Feagaiga 122:9). A o e pipiimau i le ola—e tusa lava pe i ou atigilima—e te iloa ai e oo lava i si ou malosi itiiti e sili atu nai lo le mea e fetaui i ai e le Alii. E pei ona folafola mai, e “malosi aoao e laveai” (2 Nifae 31:19).
Pipiimau Pea
O le mea tonu lena sa tupu ia te au. Nai lo le fiu, sa ou filifili e tu i luga. Sa ou naunau e ola, o lona uiga sa manaomia ona ou sueina se fesoasoani. I le tautevateva ifo ai i le auala mo le silia ma se maila, sa iu ina ma fetaui ma le tagata e toatasi sa i le vaomatua i lena aso mo le tele o maila. O lena feiloaiga faavavega na iu ai i se laveaiga maotua a le helikopa, tolu ni taotoga e faasaoina ai le ola, ma se malamalama manino atu e uiga i le faamanuiaga o le naunau e “pipiimau i lou ala.”
Sa maua e Elder Dunn le fesoasoani, sa laveaiina, ma sa faia ni taotoga se tolu e faasaoina ai le ola.
O lenei aafiaga ua faateleina ai lo’u mana, naunautaiga, ma le faatuatua. Sa faamalosia ai foi ma saunia ai au e taulimaina isi luitau o le olaga. Ou te mautinoa a outou “[tauave] mea uma, [talitonu] i mea uma, [faamoemoe] i mea uma, [onosai] i mea uma” (1 Korinito 13:7), o le a e fausia le maufetuunai ma le malosi e te manaomia e faafetaiai ai luitau. O le a e vaai i le aao o le Alii o faia oe ia tutusa ma soo se mea e oo mai i lou ala—e tusa lava pe o le “auvae lava o seoli.”