Pusa o le Manuia Faalelagona

Saunia e Marissa Widdison

O Mekasini a le Ekalesia

O fautuaga nei e faatumauina ai lou soifua maloloina faalelagona.

Atonu e mafai ona e mafaufau i le tele o auala e tausia ai le maloloina o lou tino a o e faasolo ina matua. Ua e iloa e alolofa le Tama Faalelagi ma Iesu Keriso ia te oe ma e finagalo ia e tausia lou tino. Ma o le “tausiga o lou tino e aofia ai le tausiga o lou soifua maloloina faalemafaufau ma faalelagona” (Mo Le Malosi o le Autalavou: O Se Taiala mo le Faia o Filifiliga [2022], 29). O mea nei e mafai ona e faia e fesoasoani ai ia te oe lava ina ia e maloloina foi faalelagona!

Ata o aikona na tusia e Emily E. Jones

Fesootai ma isi. Aemaise lava pe a e lagona le faanoanoa, atonu e te manao e tuua na o oe. E le afaina lena mea mo nisi o taimi, ae e taua foi le faaalu o le taimi ma tagata faagaeetia. O le faaesea e toetoe lava o taimi uma e faafaigata atili ai luitau.
Faailoa ou lagona. Faataitai le faamaoni e uiga i ou lagona. Talanoa e uiga i ou lagona i se auala faapitoa. Ma mo le mea moni, e le afaina le tagi! Mafaufau i le taimi na tagi ai Iesu (tagai Ioane 11:32–35).
Ia iloa o lagona o ni faamatalaga ia. E ui lava e mafai ona le mataofiofia, o lagona lava ia e le mafai ona faatiga ia te oe. Taumafai e faailoa ou lagona ma iloa mea o loo latou ta’u atu ia te oe.
Faataitai ona taulima tomai. Pe a e faanoanoa pe le fiafia, aoao e pulea na lagona i se auala maloloina. Mo se faataitaiga, e toatele tagata e iloa e aoga le alu e savalivali, faalogologo i musika, tusi ata, tatalo, pe tusitusi i se api talaaga.
Ia tuu lagona le lelei e o mai ma o. Manava tele i totonu ma vaai faalemafaufau i ao o fegasoloai i le lagi, po o vai o tafe i se vaitafe. Faailoa atu ou mafaufauga ma lagona ma taumafai e faataga i latou e o ese atu.
Tausisia le faafaileleina o lou agaga. O tusitusiga paia, viiga, tatalo, lotu—o nei mea uma e fesoasoani e faamalosia ai lou agaga, lea o le a fesoasoani i lou tino atoa ia maloloina.
Taumafai e tumau i le soifua maloloina faaletino. O lo tatou soifua maloloina faalelagona ma le soifua maloloina faaletino e fesootai. O le taumafaina o meaai paleni, lava le moe, ma le faavaeina o se mausa o le faamalositino o le a fesoasoani e te ola maloloina atili ai faalelagona a o e tuputupu ae.
Fesili atu mo se fesoasoani pe a e manaomia. O nisi taimi e manaomia ai e o tatou tino se fesoasoani faapolofesa ina ia maloloina ma manuia. O nei punaoa o se faamanuiaga mai le Tama Faalelagi, o le e finagalo e fesoasoani ia i tatou. I se auala faapena, atonu tatou te manaomia ai le fesoasoani mai fomai ma faufautua ina ia manuia faalelagona ai i nisi o taimi. Afai e te lagona ua e faanoanoa mo ni vaitaimi uumi, pe o i ai ni ou mafaufauga o le faatiga ia te oe lava, faamolemole fesili i se tagata matua mo se fesoasoani. E te lē tau foia na o oe lenei mea! Aapa atu mo faamanuiaga uma ua faaavanoa mai e le Tama Faalelagi ia te oe.