“Fiafia e Aoao, Fiafia e Faasoa Atu,” Mo Le Malosi o le Autalavou, Iulai 2024.
Fiafia e Aoao, Fiafia e Faasoa Atu
Mo Liam N. mai Tenimaka, o le talalelei o se vaega o se olaga malie ma le faamalieina.
O ata na pueina e Ashlee Larsen
O le auauna atu i isi e mafai ona foliga i le tele o mea eseese. O se tasi auala e fiafia ai Liam e auauna atu o le taina lea o musika mo isi.
Aoga po o mea e fiafia i ai? Galue po o le tafao? Atonu e i ai se fesili e sili atu: Aisea e faamautu ai mo na o le tasi? Pe a mafaia, e Liam N. e 14 tausaga mai Tenimaka ona taumafai ia maua se paleni lelei.
“Ou te fiafia e tata musika,“ o lana tala lea. “Ou te taina le kitara, tigipalau, kitara malū, piano, ma le ukulele. Ou te manatu o le taina o musika o se auala manaia lea e faaali atu ai o’u lagona. Ou te fiafia foi e tata mo isi e faafiafia ai i latou.”
A le o fiafia o ia i musika, e mafai ona e maua Liam o taalo soka, pasiketipolo, po o le mu ma ana uo. “Ou te fiafia foi i le saienisi ma le suesuega o le vanimonimo,” o lana tala lea. “E manaia le vaaia o le auala e fesootai ai mea uma. Ua foafoaina e le Atua mea uma, ma e matagofie.”
E le gata i ana mea e fiafia i ai, e maua foi e Liam le taimi e galue malosi ai, pe o le tilivaina o nusipepa i lona pitonuu po o le suesue mo le aoga.
O loo aoao Liam e faapaleni mea na te manaomia ma manao e fai. Atonu e pisi o ia, ae e tasi le mea na te faaavanoaina ai le taimi mo aso uma—o le talalelei a Iesu Keriso.
E nofo Liam i le penisula autu o Tenimaka faatasi ma ona matua ma ona tei laiti e toalua, o Filippa ma Max.
O Se Sini e Lima-Minute
“Talu ai nei sa ou filifili ai o le a ou faitauina ia le itiiti ifo ma le tasi se mataupu o le Tusi a Mamona—na o le tasi lava le mataupu—i aso taitasi uma,” o le tala lea a Liam. “E alu ai le lima minute. Ae ou te maua ai se malosiaga faaopoopo, o lea ua ou naunau ai e talia lena luitau.”
O le faitauina o tusitusiga paia i aso uma ua fesoasoani ia Liam e sili atu nai lo le mea sa ia manatu o le a i ai. “O nisi taimi pe a i ai so’u aso leaga, o le faitauina o se mea faamafanafana e mafai ona toe maua ai le fiafia. Ae afai o se aso lelei, e mafai foi ona faamanatu mai ai ia te au ia ou faafetai ua lelei mea uma. Ua ou fiafia ua mafai ona ou pipiimau i lau sini.”
E pisi Liam i le tele o mea e fiafia i ai ma tiutetauave. Ae o le faia o se taimi i aso uma e faitau ai le Tusi a Mamona ua faamanuiaina ai lona olaga.
“O Ai E Le Manao i le Olioli?”
E faafetai Liam mo le lagolagosua a o ia taumafai e faaavanoa se taimi mo le talalelei. “Ua na o i matou ma nai o’u tei ia tagata o Le Ekalesia a Iesu Keriso o le Au Paia o Aso e Gata Ai i la matou aoga, o le toatele o a’u uo mamae e le o ni tagata o le Ekalesia. Ae ou te manatu o loo i ai se faapotopotoga lelei tele i le Ekalesia i Tenimaka. E iloa e tagata uma le tasi ma le isi, tusa lava pe itiiti foi, ma e manaia pe a matou potopoto faatasi uma.”
O le i ai o ni uo e eseese tulaga faatonuina e mafai ona faigata i nisi taimi. “O Tenimaka o se atunuu e inu avamalosi ai le toatele o le autalavou mai le laiti,” o le faamalamalama mai lea a Liam. ”E mafai ona faigata i se talavou le fai atu leai i mea faapena.” Ae ua taumafai Liam e talanoa atu i mea ua ia talitonu i ai ina ia mafai ai e isi ona malamalama atili i ana filifiliga.
O le auauna atu i isi e mafai ona foliga o ni mea eseese e tele. O se tasi auala e fiafia ai Liam e auauna atu o le taina lea o musika mo isi.
“O nisi taimi i le aoga pe a i ai a matou vasega e uiga i le faaKerisiano, e fesili mai faiaoga po o uo ia te au e uiga i lo’u faatuatuaga. Sa ou taumafai e faamalamalama lelei atu i le mea ou te mafaia,” o le tala lea a Liam. “Sa ou valaauliaina foi se tasi o a’u uo mamae i lo’u papatisoga. Sa ou tuuina atu ia te ia ma lona tina se Tusi a Mamona ma talanoa ma i laua e uiga i nisi o mea ou te talitonu i ai. E tuu atu ia i laua e filifili po o le a le mea la te faia i ai. Sa ou lagonaina sa ou faia le mea sa’o e valaaulia isi ia lagonaina le olioli lava lea e tasi ou te lagonaina, aua o ai e le manao i le olioli?”
O Liam ma ona tei ua na o latou tagata o le Ekalesia i le latou aoga. E tele o latou avanoa e avea ai ma faataitaiga lelei o soo o Keriso.
Amata i le Faauooga
Ua iloa e Liam o le faamatalaina o mea e talitonu i ai po o le tuuina atu i se uo o se Tusi a Mamona e le na o le pau lea o le ala e avea ai ma soo o Iesu Keriso. O nisi taimi o le valaauliaina o isi ia lagona le olioli o le talalelei, e tau lava i le amata i se faauoga moni ma le alofa.
“Ou te fiafia lava i le tala ia Amona i le Tusi a Mamona,” o le tala lea a Liam. “Ou te manatu e matagofie le le alu sao o ia i le Tupu o Lamonae ma faapea atu, ‘O le a e faalogo i le mea ou te talitonu i ai,’ ae na avea filemu o ia ma uo ia te ia i le tulaga lea na iu ina fesili ai le tupu ia Amona, ‘E mafai faapefea ona avea oe ma se tagata lelei?’”
“E mafai foi ona tatou fausia ni sootaga ma isi,” o le tala lea a Liam. “Atonu o le a latou o mai ia i tatou ma fesili mai po o le a lena mea e aumaia ai ia i tatou lo tatou malosi faaopoopo.”
O Se Faamanuiaga mo le Olaga
E lagona moni lava e Liam le pei ua tuu atu ia te ia e le ola ai i le talalelei se malosi faaopoopo. Ua faamanuiaina ai lona olaga e sili atu nai lo le mu, musika, taaloga, po o soo se isi lava mea lelei na te faaaluina ai le taimi.
“Ou te faafetai i le i ai o le talalelei i lou olaga aua ou te manatu ou te le pei o le tagata ua ou i ai nei e aunoa ma lea,” o lana tala lea. “Ou te lagona e sili atu le silafia o au e le Alii nai lo lo’u iloaina o a’u lava. Ou te iloa o loo soifua le Atua ma Keriso. La te faaali mai ia i tatou le ala e tatau ona tatou o ai ma fesoasoani ia tatou lelei atili.”