“O Lo’u Aafiaga o le Loto-Tatala,” Mo Le Malosi o le Autalavou, Iulai 2024.
O Lo’u Aafiaga o le Loto-Tatala
Ata na tusia e Adam Nickle
E fai lava si ou finau i taaloga afeleti, ae maise lava i le pasiketipolo. Ou te fiafia e tauva. Ma o se vaega lena o le mafuaaga na ou feagai ai ma se taotoga e valu itula o le fatu i le 14 o ou tausaga.
Sa ou fanau mai ma se faaletonu i se tasi o alatoto o lo’u fatu. I le taimi muamua, sa fai mai fomai atonu o le a ou manaomia se taotoga pe a ou matua—atonu, pe a ou litaea. Ae i le aluga o taimi, sa faasolo ina sili atu le leaga o le faafitauli, ona o le malosi o la’u taalo i taaloga.
I se tasi o asiasiga i le tautoulu, na fai mai ai le fomai atonu o le a ou manaomia le taotoga i le tausaga pe lua e sosoo ai. I le taimi lea, sa ou tamoe i le tamoega umi i le aoga. Ae nai lo le faasolo ina lelei o o’u taimi tamoe, sa atili ona leaga. O le auala lena na ou iloa ai sa i ai se mea sa matuai sese lava.
Sa ma toe asiasi atu i le fomai ia Mati. I le taimi o le asiasiga, sa ou lagona e tatau ona ou vave fai lo’u taotoga nai lo le mea sa ma fuafuaina. Sa amata ona ou maua se lagona mafanafana faaleagaga i totonu. O lena faaaliga faaletagata lava ia na aumaia ia te au sina mafanafana. Sa faafuasei ona ou faalogoina a’u lava o ou fai atu sa ou manao i le taotoga i se taimi vave lava. Sa fai si fefefe o o’u matua i le taimi muamua, ae sa ou fai atu ia i laua, “o lea ou te toafilemu. O le a se vave e mafai ona tatou faia ai lenei mea?” Sa matou atofaina le taotoga mo Aperila.
I taimi faigata, ou te iloa e i ai pea Iesu Keriso iina mo au. E mafai ona ou tatalo i taimi uma i le Tama Faalelagi, ma e aoga lea.
Sa ou faatuatua o le a lelei mea uma, ae sa taufaafefe pea le aso o le taotoga. Sa taia ai au i le taimi lea, a o savali atu i totonu o lena potu. Ou te manatua [lo’u] gatete. Sa fesoasoani tele la’u fomai e vaaia vaifaagase ia te a’u i lena taimi. Ou te faafetai mo tagata uma na fesoasoani ia te au i lena aafiaga atoa. Sa ou maua foi le fesoasoani faalelagi. Mo se faataitaiga, sa faia e la’u uarota atoa se anapogi mo a’u, ma sa ou lagonaina moni lava le mana o le anapogi ma le tatalo.
Atapue mai faaaloaloga a le aiga o Thomas
O aso nei o loo lelei tele lo’u fatu. Ana le faia le taotoga, semanu ou te oti i totonu o le lua tausaga. O le taimi nei ua i ai so’u olaga atoa e faamoemoe i ai.
O lenei aafiaga atoa ua suia ai la’u vaaiga. E ese la’u vaai i tagata uma a o latou feagai ma o latou tofotofoga. Ou te lagonaina le malamalama alofa sili atu mo i latou. O le a i ai taimi ou te vaai ai i se tasi ma lagonaina o loo latou feagai ma se mea faigata, ona ou alu lea ma fesoasoani ia i latou.
Ia te au, o le avea ma se soo o Iesu Keriso o lona uiga moni lava o le avea ma se faataitaiga i isi ma taulimaina tagata uma e pei ona Ia faia. Ua tatou i ai faatasi uma i lenei mea. O le Atua o lo tatou Tama, ma o i tatou o Ona atalii ma afafine. E tofu tagata uma ma le faamoemoega ma le taua. E tele mea le lelei, o lea ou te taumafai ai e fesoasoani i tagata ia ataata ma ia lelei.
Ou te molimau atu e mafai ona ou maua le taitaiga patino mai le Alii i aso uma. E mafai ona Ia faia a’u ia malosi atili o se tagata ma tuuina mai ia te a’u le malosi. Ou te mafaia mea uma lava i le faamalosi mai o Keriso (tagai Filipi 4:13).