“Mai le Pa’ū i le Manumalo,” Mo Le Malosi o le Autalavou, Iulai 2024.
Mai le Pa’ū i le Manumalo
E le tatau lava ona e fiu, e tusa lava pe a e pa’ū. Talitonu mai ia te au.
Ata pue mai le 2023 Toyota USATF Outdoor Championships i le aso 8 Iulai, 2023, mai le USATF
I le 2022 sa ou alu ai i le 3,000-mita tuuga o le tamoe ma puna i luga o papuipui i le suega siamupini a le malo o le Iunaite Setete. O le tuuga e pe a ma le fitu-ma le afa taamilosaga i le malae, ma e lima ni papuipui laupapa i le taamilosaga e tatau ona e puna ai i luga, e aofia ai le tasi e i luma tonu o se vaivai.
Ua lua a’u taamilosaga o le tuuga ae lāvea loa le alii sa i o’u luma, ma sa toeitiiti a ou solia o ia. Na sao o ia i luga o le papuipui, ae o au e leai—sa ou pa’ū.
Sa ou toe tu lemu i luga aua sa tau leai sa’u mānava. Sa ou mafaufau, “Pe togi la’u solo ma aluese mai le malae?” Ae sa ou saunia. Sa ou filifili a o le’i faia le tuuga o le a ou faaauau pea pe afai ou te pa’ū, o lea na amata ai ona ou toe tamoe. Sa ou manao pea e tuu i ai mea uma sa ia te au e tusa lava pe ou te le manumalo.
E lua a’u taamiloga ona faatoa ou maua atu lea o le alii sa pito i tua o le vaega pito i luma. E lei umi ae toe tolu taamilosaga ona sosoo ai lea ma le toe lua. Sa amata ona ou mafaufau atonu e mafai ona ou maua le tolu pito i luga. Ae sa fai si o’u lelavā tele, ma sa tipi a’u e ni alii se toalua sa toe afa a laua taamiloga na totoe. Sa ou lona fa, ae sa lelei tele la’u puna mulimuli i le vai. Ma sa ou mafaufau, “Oi sole, atonu e mafai ona ou manumalo i lenei mea.”
Ina ua ou faamaeaina lena 50 mita mulimuli, sa ou iloaina ai o le a ou manumalo. Sa matuai ese lava. Sa ou mafaufau, “Oka, pe ua ou manumalo moni ea i lenei mea?” Ma sa ou manumalo. Sa ou manumalo i le tuuga ina ua uma ona ou pa’ū.
Mulimuli ane, sa ou iloaina ai e i ai ni lesona e mafai ona tatou aoaoina mai le mea na tupu.
1. Ia Onosai ia te Oe Lava
Ina ua ou pa’ū, sa ou manao ia vave ona ou maua atu isi tagata i le vave e mafai ai. Ae sa tatau ona ou tamoe fuafua ina ia aua nei o’u eeva ai. E i ai se mau ua fai mai, “Ia tatou taufetuli ma le onosai i le ala tonu o i o tatou luma” (Eperu 12:1). I le olaga, e le faapea e tatau ona e manuia i le taimi lava lea. O nisi taimi e umi se taimi e alu ai.
2. Faaauau Pea
O se mea masani le lagona o lou manao e togi le solo i nisi taimi. Ina ua ou pa’ū, ou te lei manatu e mafai ona ou manumalo, ae sa ou filifili e faaauau pea. E i ai lava le faamoemoe i taimi uma pe a e pa’ū i lalo—tau lava o lou tu i luga ma toe taumafai. O le a fesoasoani le Faaola ia te oe i ou luitau o i ai. Ia pipiimau pea i mea ua e iloa e moni, ma aapa atu ma talosaga atu i isi mo se fesoasoani. O le a iu ina lelei mea uma.
3. Faalagolago ia Iesu Keriso
Sa ou le mautinoa ou te manumalo i le tuuga ina ua ou pa’ū. Ae a tatou pa’ūū i le talalelei, pe a tatou faia mea sese po o agasala, e mafai ona tatou o mai pea ia Keriso, salamo faamaoni, ma faamagaloina. O le a Ia fesoasoani ina ia tatou toe tutu i luga. Ua ia i tatou ni gafatia maoae—le gafatia ia lelei atili ai, ia faia ia sili atu. E tusa lava pe tatou te pa’ūū pea lava pea, afai tatou te salamo pea ma taumafai e mulimuli i le Faaola, ona Ia folafola mai lea e mafai ona tatou manumalo i le taufetuliga o le olaga.