Etetal ilo Meram eo an Rilo̧mo̧o̧r
Ilo am̧ itok n̄an Jisōs Kraist im ukweļo̧k, kajoor in kōmour eo An im kōkajoor eo renaaj tōlļo̧k eok jān maroklep.
Ilo juon tūreep in kelo̧k eo eaitok, kar kōm̧m̧an bwe in kipiātin in airline eo, inaaj kar kelo̧k jān Germany ilo 11:00 jibbon̄ a.m. im jokļo̧k ilo California ilo 1:00 ālikin rālep ejja raan eo wōt. Keidi jon̄an awa iien kelo̧k ko im jokļo̧k ko, emaron̄ waļo̧k ke juon tūreep in kelo̧k kijone Atlantic Ocean im laļ eo an North America ekar bōk wōt ruo awa ko.
Boeing 747 ekar m̧ōkaj, ak jab lukkuun m̧ōkaj! Ilo m̧ool, flight eo ekar bōk 11 awa ko, pedped ioon kōto, n̄an keļo̧k 5,600 m̧aiļ ko (9,000 km).
Kōnke kōm̧ ar kelo̧k rōtle ļo̧k, al ej jan̄in kar tak ilo iien eo kōm̧ij kelo̧k. Kōm̧ ar lan̄lōn̄ kōn meram an raan aolepān iaļ eo ļo̧k jān Germany n̄an California. Jepļaakļo̧k n̄an Germany, ijoke ekar juon bwebwenato elukkuun oktak. Ilo ad kelo̧k reeaar ļo̧k, tak in aļ emōkaj an tak jān an kijor tak, im m̧okta jān an jeļā, marok em̧ōj an tak iood.
Mekarta kelo̧k ilo juon bon̄, ilo an lukkuun maroklep, ijeļā kōn m̧ool eo bwe aļ enej pād wōt jokin wōt juon, dim, im maron̄ lōke. Ikar jeļā bwe āliktata aļ eo enaaj kar tak, im meram eo emeram enaaj bar jepļaaktok n̄an bōktok okmāņāņ im mour n̄an juon raan kāāl m̧okta jān an jem̧ļo̧k iaļ eo am.
Jet iien men ko ipeļaakid remaron̄ āinwōt jejjab lōki, pen anto̧o̧ni, im marok. Ekanooj ļap aō kam̧m̧oolol kōn Jisōs Kraist. E ej meram eo im mour eo an laļ. Kōn E, ewōr ad kōjatdikdik kōn ilju im jekļaj, bōk meram eo An ekwojarjar, im kallim̧ur eo eļap n̄an anjo̧ jān jerawiwi im mej.
Iakwe im Kajoor eo an Rilo̧mo̧o̧r
Kōn iakwe eo n̄an kōj, Jisōs Kraist ekar letok mour eo An kōn aolep ajri ro nejin Anij im kōppeļļo̧ke kōjem̧ eo n̄an jab wabanban im mour indeeo.
Mekarta ta eo Setan enaaj kōņaan bwe kwōn tōmak, kwoj jāmin ettoļo̧k jān maron̄ eo an Rilo̧mo̧o̧r eo n̄an lo̧mo̧o̧ren eok. Kwoj jāmin ettoļo̧k jān “pooļ indeeo ilo pein iakwe eo An” (2 Nipai 1:15).
Menin letok eo eļap tata an aolep mennin letok ko rej itok jān maron̄ im kajoor in kōmour eo an Pinmuur eo an Jisōs Kraist. Kōnke kōn en̄taan eo an Rilo̧mo̧o̧r ilo Gethsemane im Golgotha; E ejeļā wāween jipan̄ eok ilo jabdewōt im aolep am̧ apan̄ ko kwoj jelm̧ai (lale Alma 7:11–12).
Būreejtōn Russell M. Nelson ekar ba, “Ke Rilo̧mo̧o̧r [ekar letok katok in pinmuur in] n̄an aolep armej, Ekar kōppeļļo̧k juon iaļ bwe ro otemjej rej ļoor E Emaron̄ mour kōn E, kōkajoorļo̧k, im kajoor in pinmuur eo.”
Kajoor in, āinwōt aļ, ej aolep iien pād ijeņ. Ej jāmin kōtļo̧k eok. Ļoore bun̄tōn ne ko an Rilo̧mo̧o̧r eo ej etetal ļo̧k jān annan̄ in maroklep ko im n̄an lowaan meram eo, ijo komaron̄ in bōk kōjeraam̧m̧an ko an meram eo an Anij, meņāāņ, im iakwe.
Juon Ijjino Ekāāl Em̧m̧an
Bok in Mormon ej jiron̄ ewi wāween an Riipai ro joļo̧k jilu raan ko ilo maroklep ko relukkuun in marok ālkin Dōbwāāl eo an Rilo̧mo̧o̧r eo. Maroklep eo ipeļaakier ekar kakkōļļeen maroklep ilo jetōb eo jej en̄jake kōn wōt jerawiwi. Innām er raar ron̄ ainikien Kraist karuwaineneik er jān maroklep n̄an lowaan meram eo An.
“Kom̧in jab ke kiiō ro̧o̧l tok n̄an Eō, im ukeļo̧k jān jero̧wiwi ko ami, im oktak, bwe In maron̄ kōmour kom̧?” (3 Nipai 9:13).
“Ajetok āinwōt juon katok n̄an Eō bōro e rup im jetōb ettā” (3 Nipai 9:20).
“ukeļo̧k im ro̧o̧l tok n̄an Eō kōn aolep tūm̧laļ in būruōmi” (3 Nipai 10:6).
Rilo̧mo̧o̧r eo ej erļo̧ketok ejja karuwaineneik kein wōt n̄an eok n̄e kwoj loe eok make ilo maroklep. Im āinwōt an kajjojo takin aļ eo kkōļļeiki jino in juon raan kāāl, kajjojo iien kwoj ukweļo̧k, kwoj bōk juon ijjino ekāāl, juon ijiino eo ekāāl im meram.
Jān ukweļo̧k eo am̧ em̧ool, Jisōs Kraist “enaaj bōk jikin bōd eo am̧ kōn aenōm̧m̧an im lan̄lōn̄. E epan bar keememej jerawiwi ko am̧. Ilo kajoor eo An, ikdeelel eo am̧ n̄an kōjparok kien ko An enaaj lapļo̧k.”
Iien eo wōt kwōj bōke bun̄tōn eo kein kajuon n̄an ukweļo̧k, Rilo̧mo̧o̧r eo enaaj jino n̄an “ukōt būruōm̧ im mour eo am̧. Jidik kōn jidik, kwonaaj eddōkļo̧k im erom āinwōt E” im E “enaaj lewaj n̄an eok eļapļo̧k maron̄ n̄an bōk kajoor eo An.”
Kappukot Kōmour eo Ejjeļo̧k Jemļo̧kin
Rilo̧mo̧o̧r eo ej Rikōmour eo Eļaptata. Juon iaan kōmeļeļe ko raiboojoj an kajoor in kōmour eo An loe ilo kwaļo̧k eo An make ilo Bok in Mormon:
“Ewōr ke ami jabdewōt rinan̄inmej ilubwiljimi?” Eaar kajjitōk. “Ewōr ke ami jabdewōt … rinan̄inmej ilubwiljimi? Kom̧in bōktok er ije im Inaaj kōmour er, ewōr Aō tūriam̧okake kom̧. …
“Im ālikin men kein ke Eaar kōnono āindein, aolep jarlepju eo, kōn juon wōt ainikien, raar wōnm̧aanļo̧k … ; im Eaar kōmour er otemjej ke raar bōk m̧aanļo̧k er n̄an E.” (3 Nipai 17:7, 9).
Aolep iien Rilo̧mo̧o̧r eo ekar kōmour juon armej, jim̧or m̧okta jān im ālkin Jerkakpeje eo An, Ekar kam̧ool kōn kajoor eo An eļap n̄an kōmour jetōb ko ad. Kajjojo kōmour ko rekabwilōn̄lōn̄ rej jitōn̄ļo̧k kallim̧ur eo eban jem̧ļo̧k an kōmour ilo ānbwin im en̄jake eo enaaj itok n̄an kōj ilo jerkakpeje eo.
Ilo iien ko, jar kōn kōmour emaron̄ jab uwaak ilo wāween eo jej kōjatdikdik kake, ak rej jāmin kōjetokjāer. Iien eo n̄an kōmour enaaj itok ilo iien eo an Jemedwōj Ilan̄ make im iien, āinwōt an maroklep ilo bon̄ aolep iien letok iaļ n̄an tak in aļ eo eaiboojoj.
Eo m̧ōttan jitōnbōro, ij kam̧ool bwe Jisōs Kraist ej Rikōmour eo ilo mour in im indeeo. An tūriam̧o ebwe n̄an kōmour kinej ko am̧, karreoik eok jān jerawiwi, kōkajoorļo̧k eok ilo iien mālijjon̄ ko, im kōjeraam̧m̧an eok kōn kōjatdikdik, māletlet, im aenōm̧m̧an. Kajoor eo An ej aolep iien pād—aolep iien im maron̄ lōke—men̄e kwoj, ilo juon iien, en̄jake am̧ ettoļo̧k jān iakwe eo An, meram, im okmāņeeņ.
Kwomaron̄ jab n̄an jidik jerwane en̄jake in bwilōn̄ eo am̧ im kam̧m̧olol eo em̧wilaļ kōn aolep men me Jisōs Kraist ekar kōm̧m̧ane n̄an kwe. Jouj im jeļā bwe ewor rej iakwe eok. Keememej ta eo kwaar kallim̧ur kake n̄an indeeo. Im “Anij en lewōj n̄an kom̧ bwe eddo ko ami ren mera; kōn lan̄lōn̄ an Nejin,” Jisōs Kraist (Alma 33:23).