5 Menin jipan̄ ko n̄an Em̧m̧anļo̧k in Ājmour ilo En̄jake
Jej jutak kajoorļo̧k ippān doon.
Ļeo pāleeō, Scott, im n̄a kar jerbal āinwōt ritōl ro an mijen ilo Australia Sydney Mission jān 2018 n̄an 2021. Jabdewōt iien juon reko̧o̧t an mijenede ro rekāāl ekar kwaļo̧k bwe rej en̄taan kōn ājmour ilo en̄jake ko aer, ij kajjieon̄ kōjjeļļāik er iien eo wōt me ikar mour ilo iien aer in kōmālij ilo aolepān iien mour eo aō āinwōt juon eo rūtto. Ikar kōņaan bwe er ren meļeļe bwe kōm̧ ar pād wōt ilo ejja tiim eo bwe ren jab kar aikuj jelm̧ae men in ippāer make.
Ikar kōņaan kwaļo̧k ejja ennaan eo wōt ippemi! Elōn̄ armej ro rej jelm̧ae apan̄ ko kōn ājmour ilo en̄jake, aaet jemaron̄ aolep jipan̄ doon. N̄an maron̄ alikkar, ijjab juon eo etijem̧ļo̧k kōn ājmour ilo en̄jake. Ak ikar kōņaan kwaļo̧k jejjo meļeļe ko ilo kōļmenļo̧kjeņ im jetōb n̄an em̧m̧anļo̧k in ājmour ilo en̄jake ko rekar jipan̄ eō, barāinwōt ro otemjej ijeļā im ij iakwe.
Kraist ej Kōjerkak Leddik eo Nejin Jairōs, jān Greg K. Olsen
Menin Jipan̄ 1: Jen Dāpij Kraist ilo Ioļapļap
Ikar rūttoļo̧k epakeļo̧k San Francisco, California, USA, im keememej juon waan iuwe ilo amusemaent park eo turin parijet! Ekitbuuj juon disc aļaļ kileplep me komaron̄ jijet ioon im kajjieon̄ ettoto ie ilo an disc in erro̧lol. Ro rej jijet turinļo̧k nam̧ōj ekkā wōt aer iuun nam̧ōjļo̧k er m̧okta. Ro rej meļeļe kajoor in an erro̧lol disc eo, ijoke, rej jijet epaakeļo̧k ioļapļap in disc eo.
Ij ļōmņak menin ej juon kōmeļeļe em̧m̧an n̄an dāpij Kraist ilo ioļapļap eo ilo tōre eo jej jelm̧ae jet jekjek ko reppen—men̄e ej nana mour, aer in kōmālij, OCD, ak juon men āinļo̧k wōt. Jej aikuji Kraist ilo ioļapļap in mour ko ad.
Ilo iien ko ājmour an kōmālij eo ej kakkōt, jemaron̄ bōk juon ekkejel eo ejjeļo̧k ainikien n̄an lan̄ ak pen ad en̄jake ad epakeļo̧k Rilo̧mo̧o̧r eo. Ejjab meļeļe in men in bwe jej bōk kaje ak bwe jejjab erreo kōn iakwe eo an Anij. N̄an n̄a, lōke E ej ilo tōre eo jej kōttar ekkejel eo an jepļaaktok eo aorōk! Wōnm̧aanļo̧k im jar, kaorōki naan ko an Rilo̧mo̧o̧r eo, lōke kallim̧ur ko An, bōk m̧ōttan kwojkwoj eo, im kōm̧m̧ane aolep men ko renaaj kōm̧m̧an pedped wōt ilo E.
Menin Jipan̄ 2: Jen Pedped ioon Irooj Aolep Raan
Ajri in Israel ro ilo āne jam̧den rekar aikuj in pedped ioon Irooj kōn m̧anna aolep kajjojo raan. Jet iien jej jelm̧ae men ko āinwōt ņaetan jidimikij in kakkure ak metak in en̄jake ko jet, jekōņaan bwe er ren lukkuun jako. Im bōlen renaaj—ak remaron̄ jab pād ilo iaļ eo tok ak ilo iien eo jekōņaan. Meļeļe in bwe kōjatdikdik ejako. Jej aikuj in pedped ioon Anij kajjojo raan ilo ad jerbal im reim̧aanļo̧k n̄an tōre ko remeramļo̧k im̧aan.
Juon wāween ej n̄an kappukot jipan̄ an Jemedwōj Ilan̄ im kajjieon̄ kōļ ko roktak n̄an pukot ta eo ej jerbal n̄an kom̧. Innām E emaron̄ jipan̄ eok keememej, ilo iien ko ejjab em̧m̧an mour ak juon jidimikij in kakkure, ewi wāween an ainikien al eo āinwōt ejipan̄ ilo juon jekjek ejja āinwōt in ak ewi wāween am̧ ekkejelļo̧k ippān juon eo kwoj lōke kōm̧m̧an am̧ bar juon alen jokne. Menin ej kōtļo̧k am̧ aiini juon jet in eo ej kam̧oole kein jerbal ko n̄an kajjieon̄ iien eo tok ālkin n̄e kwonej en̄taaan. Jekdo̧o̧n ta eo kwoj kōm̧m̧ane, kappukot jipan̄ eo an Irooj aolep raan.
Aaet jemaron̄ kōļļaaj ad ba: “N̄e ij pedped ioon Irooj aolep raan, inaaj wanlōn̄ļo̧k im kappukot kajoor eo ikar jab jeļā ewōr ippa!”
Menin Jipan̄ 3: Komaron̄ Kōjparok Ānbwinnum̧
Kōmālij eo ej m̧ōttan wōt ānbwin kanniōk eo ad im kōn menin epidodo an metak n̄an elōn̄ jekjek im jab wānōk ko an laļ in. Ak nuuj ko rem̧m̧an, ewōr būn̄tōn ko rej kam̧ool bwe jemaron̄ būki n̄an kōkajoorļo̧k kōmālij eo ad eo me emaron̄ kōkajoorļo̧k kōmālij eo barāinwōt kōkōm̧anm̧anļo̧k ājmour ilo en̄jake. Erkein rej jet iaan bun̄tōn ko:
-
En̄jake meram in aļ ak meram eo emeram ilo jibbon̄
-
Diwōjļo̧k n̄an peļaak ko, kepaakļo̧k eok n̄an menin kōm̧anm̧an ko an laļ in.
-
Kōmourur aolep iien
-
Mōn̄ā Mōn̄ā ko Rōne
-
Idaak elap aebōj
-
Bōk eļap iien kiki aolep bon̄
Kilen menono emaron̄ erom̧ kajoor barāinwōt. Kajjieon̄ bōk kitwōm̧ kōn lo̧n̄iim̧, innām bar juon. Dāpij kitwōm̧ jejjo jekōņ, im āliktata kadwōjļo̧k aolepān kitwōm̧ jān lo̧n̄iim̧.
Ij kōm̧m̧ane menin jejjo kōttan n̄e ij rūjtok, ilo iien ij en̄jake in kōm̧m̧ane (āinwōt m̧okta jān am̧ kwaļo̧k juon kōnono jān kweilo̧k eo eļap), im m̧okta jān kiki.
Menin Jipan̄ 4: Jemaron̄ Kajjitōk kōn Jipan̄
Eļan̄n̄e kwaar jōbwābwe ilo am̧ tallōn̄ im kar iioon juon rikajineet, kwonaaj ke kar jook n̄an kajjitōk kōn iaļ ko n̄an kōjparok? Ijjab ļōmņak un eo in. Kajjitōk kōn jipan̄ ejjab juon kōkkaļļe in m̧ōjņo̧. Emakijkij ad kōm̧m̧ane ilo eria ko jet ilo mour.
Jipan̄ joļo̧k tōmak eo enana ņae kajjitōk kōn jipan̄ ilo apan̄ ko ilo en̄jake.
Mekarta kwoj aikuji jipan̄ eo jān Anij, ro m̧ōttam, ak taktō ro retijem̧ļo̧k, kwojjab juon armej em̧ōjņo̧ ej kappukot eļapļo̧k jipan̄ eo kwoj aikuji. Ilo m̧ool, kwoj kwaļo̧k peran!
Menin Jipan̄ 5: Jen Ekkejel Wōt
Ekkejelļo̧k ippān Jemādwōj Ilan̄ ilo jar aolep raan eaorōk.
Ij barāinwōt en̄jake bwe eaorōk n̄an ekkejelļo̧k wōt n̄an armej ro jemaron̄ lo kōjparok ippāer im lōke. Kūrļo̧k jinōm̧! Jijet ippān juon m̧ōttam̧ im kōnono. Kōnono ippān ro jeiūm im jatūm̧. Jej kajoorļo̧k n̄e jej jipan̄ doon. Kajoor jab in ej etal ak ej itok. Aolep armej raikuj jet armej. Makeļo̧k iaad im aer in kōmalij ekkā aer kalōk doon. Ekkejelļo̧k n̄an ro otemjej kwoj iakwe im mour ippāer im maron̄ loe im bakwij ej juon uno n̄an eļap metak eo jej en̄jake.
Jemaron̄ Pād Wōt Iturin Kijeek eo Ippān!
Jet iien jej bar aikuj in keememej bwe Anij ej pād ippād.
Ilo Kallim̧ur M̧okta, Kiin̄ Nebuchadnezzar ekar joļo̧k Shadrack, Meshach, im Abednego ilo kijeek eo elukkuun bwil jon̄an riwaj ro inam̧ōj rekar jab maron̄ jutak ņae bwil eo.
Kōn menin ewi wāween an rein jilu mour?
Jeje ko rekwojarjar rej katakin bwe emān armej remaron̄ kar loe ilo urur eo ippāer eo “āinwōt Nejin Anij” (Daniel 3:25).
Ij tōmak meļeļe in Kraist ej pād ippād ilo meņāāņ in mālijjon̄ ko ad, eļaptata ilo ad kijenmeji. Im en̄taan an kōmālij eo emaron̄ āinwōt juon kijeek ekajoor. Kraist ej Emmanuel, eo meļeļein ej “Anij ippād.”
Jab meļo̧kļo̧k, Jisōs Kraist ej ad kajoor, jab ilo jem̧ļo̧kin iaļ eo, n̄e jej anemkwoj jān en̄jake an en̄jake ko jekar jab kajjitoki. E ej lukkuun pād ippād ilo aolepān iaļen ito itak eo ad. Ej ej ad kajoor im jo̧o̧r kiiō.
Jen jutak kajoor ippān doon!