Haʻu, ʻo Muimui ʻIate Au
4 Nīfai
Fiefia ʻi he Uouangatahá
ʻOku fakahā mai ʻe ha vahe ʻe taha ʻi he Tohi ʻa Molomoná ʻa e founga te tau lava ai ʻo taha ʻo fakafou ʻia Sīsū Kalaisi mo ʻEne ongoongoleleí.
Naʻa Nau ʻOmi ʻEnau Fānau Īkí, tā fakatātā ʻa Walter Rane
ʻI heʻetau hoko ko e kau muimui moʻoni ʻo Sīsū Kalaisí, ʻoku tau fakaʻamu ke maʻu e melinó ʻi ha māmani ʻo e fekeʻikeʻí mo e fakafekikí. ʻOku tau feinga mālohi ke langa ha sosaieti ʻoku fakavaʻe ʻi he ngaahi akonaki ʻa Sīsū Kalaisí, kae ʻikai nofo ʻi ha kolo ʻoku fonu ʻi he tāufehiʻá mo e fakakikihí. Naʻá Ne akonaki, “Ke mou taha pē; pea kapau ʻoku ʻikai te mou taha, ʻoku ʻikai ʻaʻaku ʻa kimoutolu” (Tokāteline mo e Ngaahi Fuakava 38:27). ʻOku mahuʻinga ʻa e uouangatahá ʻi he Siasi moʻoni ʻo Sīsū Kalaisí.
Te tau maʻu fēfē ʻa e uouangatahá?
ʻE lava ke tokoniʻi kitautolu ʻe ha vahe ʻe taha ʻi he Tohi ʻa Molomoná. ʻOku tau ako ʻi he 4 Nīfaí ki he founga ʻo e moʻui ʻa e kakaí hili e ʻaʻahi ʻa e Fakamoʻuí kiate kinautolú, akoʻi kinautolu, mo fokotuʻu Hono Siasí ʻi honau lotolotongá. ʻOku fakahaaʻi ai ʻa e founga ne nau maʻu ai ha uouangataha fiefia mo melinó, pea ʻokú ne ʻomi ha sīpinga te tau lava ʻo muimui ki ai ke maʻu ʻa e fiefiá ʻi heʻetau maʻu ʻa e uouangataha tatau ko ʻení.
1. Uluí
ʻUluakí, ʻoku tau ako “kuo fokotuʻu ʻe he kau ākonga ʻa Sīsuú ha siasi ʻo Kalaisi . … Pea … naʻe haʻu kiate kinautolu [ʻa e kakaí], pea nau fakatomala moʻoni mei heʻenau ngaahi angahalá” (4 Nīfai 1:1).
ʻI hoʻo ako fekauʻaki mo Sīsū Kalaisi, ko ʻEne ongoongoleleí, mo Hono Siasí, ʻoku fakamoʻoniʻi ʻe he Laumālie Māʻoniʻoní ʻa e moʻoní ki ho lotó. Te ke lava leva ʻo tali e fakaafe ʻa e Fakamoʻuí ke tui kiate Ia pea muimui kiate Ia ʻi he fakatomalá.
ʻOku kamata heni hoʻo fononga ʻo e uluí—mamaʻo mei he ngaahi holi siokita mo angahalá pea ki hotau ʻEiki mo e Fakamoʻui ko Sīsū Kalaisí. Ko Ia ʻa e fakavaʻe ʻo ʻetau tuí. ʻOku tau faaitaha ʻiate Ia. ʻI heʻetau sio kiate Ia ʻi he fakakaukau kotoa pē (vakai, Tokāteline mo e Ngaahi Fuakava 6:36), ʻokú Ne hoko ko ha mālohi ke fakatahatahaʻi ʻi heʻetau moʻuí.
2. Ngaahi Fuakavá
Ko kinautolu naʻe omi ki he Siasí mo fakatomala mei heʻenau ngaahi angahalá “naʻe papitaiso ʻa kinautolu ʻi he huafa ʻo Sīsuú; pea naʻa nau maʻu foki mo e Laumālie Māʻoniʻoní” (4 Nīfai 1:1). Naʻa nau fai ha fuakava mo e ʻEikí.
ʻI hoʻo fakahoko mo tauhi e ngaahi fuakavá, ʻokú ke toʻo ai kiate koe e huafa ʻo e ʻEikí. ʻOku ʻoatu ʻe he vā fetuʻutaki fakafuakava ko ʻení ha taumuʻa mo e tuʻunga tatau mo e niʻihi kehe kuo haʻi kinautolu ki he ʻEikí ʻo fakafou ʻi he ngaahi fuakavá. ʻOku tokoni leva ʻa e ʻEikí ke “taha honau lotó ʻi he uouangataha mo e feʻofoʻofani” (Mōsaia 18:21).
3. Vahevahe Tāú mo e Tuʻunga Tataú
ʻOku tau ʻilo foki “naʻe ʻikai ha ngaahi fekeʻikeʻi pe ngaahi fakakikihi [ʻi he kakaí], pea naʻe fefaitotonuʻaki ʻa e kakai kotoa pē ʻiate kinautolu.
“Pea naʻa nau meʻa taha ʻaki ʻenau ngaahi meʻa kotoa pē; ko ia naʻe ʻikai ha maʻu meʻa mo e masiva, pe pōpula mo e tauʻatāina, ka naʻe fakatauʻatāinaʻi ʻa kinautolu kotoa pē, ʻo nau ʻinasi ʻi he meʻa-foaki fakalangí” (4 Nīfai 1:2–3).
ʻOku finangalo e ʻEikí ke tau vahevahe taau mo faitotonu. ʻI heʻetau ʻunu ʻo ofi ange kiate Iá, “ʻe ʻikai ke ʻi [hotau] ʻatamaí ke fefakamamahiʻaki, kae nofo melino, pea fai ki he tangata taki taha ʻo fakatatau mo e meʻa ʻoku totonu ke fai kiate iá” (Mōsaia 4:13).
Ke taha mo e kakai ʻa e ʻEikí, kuo pau ke ʻoua naʻa ngata pē hoʻo anga tatau ki he niʻihi kehé, ka kuo pau foki ke ke vakai moʻoni kiate kinautolu ʻoku nau tatau mo ongoʻi ʻi ho lotó ʻoku nau tatau kotoa—ʻo tatau ʻi he ʻao ʻo e ʻOtuá, pea tatau ʻi he mahuʻingá mo e tuʻunga malavá (vakai, Tokāteline mo e Ngaahi Fuakava 38:24–25).
4. Talangofuá
Hili hono akoʻi ʻe he ʻEikí ki he kakaí ʻa ʻEne tokāteliné, ʻoange kiate kinautolu ha ngaahi fekau, mo ui ha kau tamaioʻeiki ke tauhi kiate kinautolú, naʻa “nau ʻaʻeva ʻo fakatatau ki he ngaahi fekau kuo nau maʻu mei honau ʻEiki ko honau ʻOtuá” (4 Nīfai 1:12). ʻOku mahuʻinga ʻa e talangofua ki he ngaahi akonaki ʻa e ʻEikí mo ʻEne kau tamaioʻeikí ki he hoko ʻo uouangatahá.
5. Tānaki Fakataha
Ko e kakai ʻi he 4 Nīfaí naʻa nau “fai atu ʻi he ʻaukai mo e lotu, pea ʻi heʻenau faʻa fakataha ke lotu mo fanongo ki he folofola ʻa e ʻEikí” (4 Nīfai 1:12).
Ko e ngaahi fakataha moihū fakauiké ko ha faingamālie mahuʻinga ia ke tau maʻu ai ha mālohi. ʻOku ʻikai ngata pē ʻi heʻetau maʻu e sākalamēnití, ka ʻoku tau ako, lotu, mo hiva fakataha pea mo fepoupouʻaki. ʻOku ʻomi foki ʻe he ngaahi fakatahaʻanga kehé ha ongoʻi lata, fakakaungāmeʻa, mo taumuʻa tatau.
6. ʻOfá
ʻOku tau ako ʻi he 4 Nīfaí naʻe aʻusia ʻa e uouangataha moʻoní “koeʻuhí ko e ʻofa ʻa e ʻOtuá ʻa ia naʻe ʻi he loto ʻo e kakaí” (4 Nīfai 1:15).
Ko e ʻuluaki pea ko e lahi ia ʻo e fekaú ke ʻofa ki he ʻOtuá—ʻo lahi ange ʻi ha toe taha pe ha toe meʻa. ʻI hoʻo fakatupulaki ʻa e ʻofa ki he ʻOtuá mo Sīsū Kalaisí, ʻe fakanatula pē ʻa e muimui mai ai ʻa e ʻofa ki he fāmilí mo e kaungāʻapí.
Ko e fiefia lahi taha te ke aʻusiá ʻa e taimi ʻokú ke fonu ai ʻi he ʻofa ki he ʻOtuá mo ʻEne fānaú kotoa.
Ko e ʻofa faka-Kalaisí, ʻa e ʻofa haohaoa ʻa Kalaisí, ko e tefitoʻi ʻulungaanga ia ʻo ha tokotaha muimui moʻoni ʻia Sīsū Kalaisi. ʻI he taimi ʻokú ke fakavaivaiʻi ai koe ʻi he ʻao ʻo e ʻOtuá pea lotu ʻaki e ivi kotoa ho lotó, ʻe foaki atu ʻe he ʻOtuá ʻa e ʻofa faka-Kalaisí (vakai, Molonai 7:48).
ʻI hoʻo feinga ke nofoʻia ho lotó ʻe he ʻofa ʻa e ʻOtuá, ʻe hā ngali fakanatula pē ʻa e mana ʻo e uouangatahá kiate koe.
7. Tuʻunga Fakalangí
Ko e fakaʻilonga ʻe taha ʻo e uouangatahá “naʻe ʻikai ke ʻi ai … ha kau Leimana, pe ha faʻahinga kakai kehe ʻe taha; ka naʻa nau taha pē, ko e fānau ʻa Kalaisi, pea ko e kau ʻea hoko ki he puleʻanga ʻo e ʻOtuá” (4 Nīfai 1:17).
Naʻe ʻikai ke nau fakaʻaongaʻi ha ngaahi fakahingoa naʻá ne vahevahe kinautolu, ka naʻe vakai ʻa e kakaí kiate kinautolu—mo e tokotaha kotoa pē—ʻo fakatatau ki honau vā fetuʻutaki mo e Tamai Hēvaní mo Sīsū Kalaisí. Ko e fānau kotoa kitautolu ʻa e ʻOtuá mo e kau ākonga ʻa Sīsū Kalaisi. Neongo ʻe lava ke lelei mo mahuʻinga ʻa e ngaahi faikehekehé, ka ko hotau tuʻunga mahuʻinga tahá ʻoku fekauʻaki ia mo hotau tupuʻanga mo e taumuʻa fakalangí.
Hoko ʻo Taha
Mahalo te tau kehekehe ʻi hotau ngaahi anga fakafonuá, meʻa fakapolitikalé, matakalí, ifó, pea ʻi ha ngaahi founga lahi. Ka ʻi heʻetau faaitaha ʻia Sīsū Kalaisí, ʻoku hōloa e mahuʻinga ʻo e faʻahinga faikehekehe peheé pea tau feinga ke tau taha—koeʻuhí ke ʻAʻana kitautolu.
ʻI heʻetau fakamahuʻingaʻi e ngaahi ʻelemēniti ʻo e uouangatahá naʻe maʻu ʻe he kakai ʻi he 4 Nīfaí, ʻofa ke lea ʻaki ʻo kau kiate kitautolu, hangē ko kinautolú, “Ko e moʻoni ʻoku ʻikai lava ke ʻi ai ha kakai ʻoku lahi hake ʻenau fiefiá ʻi he kakai kotoa pē kuo fakatupu ʻe he toʻukupu ʻo e ʻOtuá” (4 Nīfai 1:16).