Ko Sīsū Kalaisi Ho Mālohingá
Tamaiki Tangatá mo e Tamaiki Fefiné: Feinga ke Maheni
ʻOkú ke fakatumutumu ʻi he tuʻunga tangata pe fefine kehé? Mālieʻia? Ilifia? Fakatuʻamelie tokanga pē ʻe lava ke aʻusia ha faʻahinga feohi angamaheni? Lau pē.
Ngaahi tā fakatātā ʻa Katy Dockrill
ʻI he kamataʻangá, naʻe tuku ʻe he ʻOtuá ʻa e tangata mo e fefine ʻi he māmaní (vakai, Sēnesi 1:27). Pea talu mei ai, kuo … mālie.
Ki he kakai kei talavoú, ʻe lava ke ongo puputuʻu, fakailifia, fakalata, ngalikehe, fakafiefia, fakamanavahē mo fakavaleloto he taimi ʻe niʻihi e feinga ke mahení—mahalo ʻe hoko kotoa pē he taimi ʻe taha. Kuo pehē maʻu pē. Ka ʻoku ʻi ai ha ngaahi anga fakafonua ʻi he māmaní he ʻahó ni ʻokú ne ʻai ke toe ngalikehe ange.
Laka Atu Ki Muʻa, Kae ʻIkai Ngalikehe
Ne mau fehuʻi ki he toʻu tupu he funga ʻo e māmaní fekauʻaki mo e founga ʻoku maheni ai e tamaiki tangatá mo e tamaiki fefiné, pea pehē ki he ngaahi palopalema ʻoku nau fekuki mo iá. Vakai pe ʻoku ongo angamaheni e fakamatala ko ʻeni mei ha finemui ʻi Saute ʻAfiliká:
“ʻI he ʻaho mo e kuonga ko ʻení ʻoku hangē ia ʻoku ʻikai lava ke toe ʻi ai haʻo ngaahi kaungāmeʻá. Kapau ʻe talanoa pē ha tamasiʻi mo ha taʻahine, ʻoku ʻosi pehē ʻe he kakaí ia ʻoku ʻi ai e meʻa ʻoku hoko. ʻOku fakahela e feinga ke pukepuke ha vā kaungāmeʻá ʻi he taimi ʻoku teke ai koe ʻe he kakaí ke liliu ia ki ha meʻa ʻoku ope atu aí.”
Naʻe fakamatalaʻi peheni ia ʻe ha toʻu tupu ʻe taha:
“ʻI he taimi ʻoku talanoa ai ha tamasiʻi mo ha taʻahine, ʻoku ʻosi mahalo pē ʻa e kakaí ia ʻokú na teiti.”
Te mau lava ʻo ʻoatu ha ngaahi sīpinga lahi ange (lahi faufaua ʻaupito) mei he funga ʻo e māmaní ʻo e toʻu tupu ʻoku nau fai e lāunga tatau. Ka ʻoku ʻikai ko e fakafeʻātungia pē ia ʻoku hokó. Hangē ko ʻení:
-
ʻOku fakafaingofuaʻi ʻe he tekinolosia fakaʻilekitulōniká mo e mītia fakasōsialé ʻa e fetuʻutakí ʻi ha ngaahi founga ʻe niʻihi kae faingataʻa ange ʻa e feohi fakakaungāmeʻa moʻoní ʻi ha ngaahi founga kehe.
-
ʻOku hanga ʻe he hōloa ʻa e falala ʻi he sosaietí ʻo ʻai ke huʻuhuʻu e kakaí ki he niʻihi kehé mo ʻenau ngaahi taumuʻá. Hangē ko ʻení, ʻoku faʻa talamai ʻe he fānau tangatá ʻoku faingataʻa ke nau tokanga fakakaungāmeʻa pē ki ha kiʻi taʻahine ʻo ʻikai fifili pe ʻe fakaʻuhingaʻi hala nai ia pea lau ʻoku “anga kākā.”
ʻOku ʻai ʻe he meʻá ni kotoa ke ngalikehe ha faʻahinga feinga pē ke feohi fakakaungāmeʻa mo e kau mēmipa tuʻunga tangata pe fefine kehé. Pea tau ʻai mahino pē—naʻe ʻosi ngalikehe pē ia he kamatá.
Ki he toʻu tupu tokolahi, mahalo ko e hala faingofua angé ke mātuʻaki fakaʻehiʻehi mei he tuʻunga tangata pe fefine kehé kae ʻoua kuo aʻu ki ha tuʻunga ʻamui ʻo e moʻuí. Ko ha meʻa fakamamahi ia. Kapau te ke fakamamaʻo mei he meimei vaeua ʻo e faʻahinga e tangatá, ʻe ala mole meiate koe ha ngaahi feohi fakakaungāmeʻa mahuʻinga. Pea he ʻikai ke nau ʻiloʻi foki koe.
ʻOku pehē ʻe Tamala W. Lunia, ko e Tokoni ‘Uluaki ‘i he Kau Palesitenisī Lahi ʻo e Kau Finemuí, “ʻOku mahuʻinga ʻaupito ʻa e fetuʻutakí. Vilitaki atu ʻi he ngaahi ongo ngalikehe ko iá pea talanoa ki ha kakai tokolahi (kau ai ʻa kinautolu ʻoku tuʻunga tangata pe fefine kehé!). Hoko ko e tokotaha ke fuofua malimali mo fakaleá.”
ʻOku poupou ki ai ʻa Peletilī R. Uilikoka, ko e Tokoni ʻUluaki ʻi he Kau Palesitenisī Lahi ʻo e Kau Talavoú. ʻOkú ne pehē, “ʻOua te ke fuʻu hohaʻa ki he fakakaukau ʻa e niʻihi kehé. Ko e founga lelei taha ke ongoʻi fiefia ai mo maʻu ha ngaahi kaungāmeʻá ke ngāue leva. ʻOua te ke tatali ki ha taha kehe ke fakalea atu mo kamataʻi ha fepōtalanoaʻaki. ʻE tupulaki hoʻo loto-falalá ʻi hoʻo fetongi hoʻo manavasiʻi ki he fakakaukau ʻa e kakai kehé ʻaki e tui ki he fakakaukau ʻa e ʻOtuá.”
Ko e Hā e Lau ʻa e Fakahinohinó?
ʻOkú ke monūʻia, ʻoku maʻu ʻi he fakahinohino Ki Hono Fakamālohia ʻo e Toʻu Tupú ʻa e faleʻi ne ueʻi fakalaumālie ko ʻení:
feohi fakakaungāmeʻa moʻoní
ʻOku moʻui lelei mo fakafiefia ʻa e feohi fakakaungāmeʻa moʻoní (mo e tamaiki fefiné mo e tamaiki tangatá fakatouʻosi). ʻOku makatuʻunga ia ʻi ha saiʻia moʻoni ʻi ha taha, kae pehē ki he faitotonú, falalá, mo e fakaʻapaʻapá. ʻOku ʻikai foki angamaheni ke hoko vave ia. ʻOku langakiʻa e ngaahi feohi fakakaungāmeʻa moʻoní—ʻi he foʻi laka takitaha.
kakai tokolahi
ʻOku ʻikai fiemaʻu ia ke tokolahi ho ngaahi kaungāmeʻá, ka ʻoku ʻikai totonu ke fakangatangata hoʻo fakakaukauʻi pe ko hai te mo kaungāmeʻá. Kuo akonaki ʻa Palesiteni Lāsolo M. Nalesoni ʻo pehē, “Feinga he ʻaho takitaha ke fakatokolahi ho ngaahi mahení.” Ko e tahá—ʻe lava pē ko e tamaiki tangata mo e tamaiki fefine fakatouʻosi.
ngaahi ʻekitivitī fakakulupu ʻoku leleí
ʻI he ngaahi feituʻu lahi ʻi he māmaní, ʻe lava ke fakataha mai ha kulupu ʻo e tamaiki tangatá mo e tamaiki fefiné ke nau fiefia ʻi hono fakahoko ha ngaahi meʻa ʻoku fiefia ai ʻa e tokotaha kotoa pē pea ʻoku ʻikai fakatuʻutāmaki fakatuʻasino pe fakalaumālie. ʻE lava ke hoko ʻeni ko ha founga lelei ke maheni ai mo ha kakai kehekehe tokolahi. Kuo pehē ʻe he toʻu tupu he funga ʻo e māmaní ko e ngaahi ʻekitivitī ʻa e Siasí, ʻi he Sāpaté mo e lolotonga ʻo e uiké fakatouʻosi, ko ha niʻihi ia ʻo e ngaahi founga lelei taha ke kamata aí.
ngaahi ʻekitivitī tautau toko taha ki he taha
ʻOku fiemaʻu ke kiʻi fakamatuʻotuʻa ha tamasiʻi mo ha taʻahine ʻoku fokotuʻutuʻu ke na hoa ʻi ha ʻekitivitī. Ko e lelei tahá ke tatali ke taʻu 16, ʻo hangē ko e lau ʻa e fakahinohinó.
ngaahi vā fetuʻutaki fakatāutahá
Tatau ai pē pe ʻokú ke ui ia ko e hā, ka ko e vā fetuʻutaki feʻofaʻaki fakatāutahá ʻoku ʻai ia maʻanautolu ʻoku fakakaukau fakamātoato ki he malí. Kimuʻa aí, ʻoku ʻikai ʻuhingamālie ia pea ʻokú ne fakaafeʻi mai pē ha fakatuʻutāmaki fakaeloto mo fakalaumālie. ʻAi ke fakafiefia hoʻo kei ʻi he toʻu tupú, kae ʻoua ʻe fonu ʻi he mamahi fakaelotó mo e ʻahiʻahí.
fakaʻaongaʻi ha taimi
ʻOku mahuʻinga mo moʻui lelei ʻa e feohi mo e kakaí mo talanoa tonu mo kinautolú (vakai, Ki Hono Fakamālohia ʻo e Toʻu Tupú: Ko ha Fakahinohino ki Hono Fakahoko ha Ngaahi Filí, 19).
kinautolu ʻoku nau tokoniʻi koe ke tauhi hoʻo ngaahi tukupā kia Sīsū Kalaisí
Ko ha kakai ʻeni ʻe malava pē ke nau kau ki he Siasí pe ʻikai pea ʻoku nau fakaʻapaʻapaʻi koe mo hoʻo tuí mo e ngaahi tuʻunga moʻuí. Ko e kakai ʻeni ʻoku ʻikai ke nau fakataueleʻi pe fakamālohiʻi koe ke ke fai ʻa e ngaahi meʻa ʻoku halá.
ʻI ai Haʻo Faleʻi?
ʻE ngali faingataʻa ke maheni mo e kau mēmipa tuʻunga tangata pe fefine kehé, mahalo ʻe ngalikehe, ka ʻoku ʻaonga ʻa e feinga kotoa pē. Ko ha ngaahi fakakaukau fakaʻosi ʻeni mo ha tokoni mei he toʻu tupu he funga ʻo e māmaní.
-
“Kuo pau ke ʻoua naʻa tau ilifia ke fakamaheni.”
-
“Te u lava ʻo maʻu ha ngaahi kaungāmeʻa mo ʻofa ʻiate kinautolu kae ʻikai ʻofa fakakaumeʻa ʻiate kinautolu. ʻOku tokoni foki e ngaahi vā fetuʻutaki ko ʻení ke tau maʻu ha kaungāmeʻa falalaʻanga pe ko ha taha ke tafoki ki ai ʻi ha taimi faingataʻa.”
-
“Ko e meʻa ʻe taha ʻoku ngali tokoní ko e ʻalu ki he ngaahi ʻekitivitī mavahe mei hotau ʻapí ʻa ia te tau lava ai ʻo fetaulaki mo fakamaheni lelei angé.”
-
“ʻOku ou tui ʻe faingofua ange ʻa e feinga ke maheni ʻi ha siasi, ʻapiako, pe fāmilí koeʻuhí ʻoku ʻosi ʻi ai ha meʻa ʻokú ne fakatahatahaʻi mai kitautolu.”
-
“Kuó u maʻu ʻa e fiefia ʻi he mahuʻingaʻia ʻi he ngaahi meʻa tatau mo ha taha tuʻunga tangata pe fefine kehé.”