ʻOku Fakahoko ʻe he Ngāue Fakaetauhí ha Liliu
Naʻe ʻikai fakapapauʻi ʻe ʻAmelia pe te ne ongoʻi ʻokú ne lata ʻi he lotú. Naʻá ne fiefia ʻaupito ʻi he fetuʻutaki ange ʻa e kakaí.
Ngaahi faitā ʻa Daniel Scott
Ko ʻAmeliá ko ha finemui ʻi Nuʻu Sila, kuo teʻeki ke ne ʻalu ʻo lotu ʻi ha taʻu ʻe fitu.
Lolotonga e vete mali e ongomātuʻa ʻa ʻAmeliá, naʻe fepaki hono fāmilí mo ha tūkunga faingataʻa, pea nau fakakaukau ai ke ʻoua naʻa nau toe maʻulotu. ʻOku manatu ʻa ʻAmelia ʻo pehē, “Naʻe ʻikai ke mau maʻu ha tokoni mei ha taha.”
Ka ʻi ha Sāpate ʻe taha, hili ha taʻu ʻe fitu mei ai, naʻe fakakaukau e faʻē ʻa ʻAmeliá ke toe ʻahiʻahi ʻalu ki he lotú. Naʻá ne maʻu ha aʻusia lelei peá ne fakaafeʻi hono ngaahi ʻofefiné ke nau foki fakataha mo ia ki he lotú. Naʻe fakakaukau ʻa ʻAmelia, “Ko e hā hano maumau?”
“ʻOku ou Fiefia ʻAupito Hoʻo ʻi Hení”
ʻOku pehē ʻe ʻAmelia, “Naʻá ku kiʻi veiveiua he kamatá. Naʻe ʻikai fuʻu lelei ʻeku ongo kau ki he Siasí.”
Ka naʻá ne fakakaukau ke tali e fakaafe ʻene faʻeé, pea ʻoku ʻikai ke ne fakaʻiseʻisa ai. “ʻI heʻeku aʻu atu pē ki he lotú, naʻe pehē mai ʻe he kakaí, ʻKuo teʻeki ke u sio kiate koeʼ mo e ʻTalitali lelei koe ki heʻemau lotúʼ mo e ʻʻOku ou fiefia ʻaupito hoʻo ʻi hení!ʼ” ʻOku manatuʻi ʻe ʻAmelia.
“Naʻe ʻikai ha taha ʻe fakamāhuahu mai. Naʻe anga fakakaumeʻa mo angaʻofa moʻoni ʻa e tokotaha kotoa pē.”
Ka ʻi he vakavakai holo ʻa ʻAmelia lolotonga e lotú, naʻe kamata ke ne fakakaukau mahalo ʻokú ne ʻi he feituʻu hala. ʻOku pehē ʻe ʻAmelia, “Naʻe ʻikai ke u lava ʻo taʻofi ka naʻá ku fakamamaʻo mei he kakaí koeʻuhí naʻe kamata ke u fakahoa ki he meʻa naʻe ʻilo ʻe he tamaiki kehé mo hai naʻa nau ʻiló.” ʻOkú ne pehē, “Ko e tamaiki tokolahi ʻi hoku uōtí ʻoku nau fāmili pe kaungāmeʻa ofi talu ʻenau kei siʻí, pea ne hangē ia naʻa nau fuʻu maheni leleí.”
Hili e houalotu sākalamēnití naʻe haʻu ʻa e pīsopé kia ʻAmelia ʻo pehē ange, “Mālō e lelei, ko Pīsope Uatisi au. ʻOku ou loto ke ke fakalea ki he taha kotoa.” Naʻá ne ʻave ia ki he lokiako ʻa e Kau Finemuí ʻo fakafeʻiloaki ia ki he tamaiki fefine kehé. ʻOku pehē ʻe ʻAmelia, “Ko ha fakalea mahuʻinga moʻoni ia koeʻuhí naʻá ne ʻomi ha ʻamanaki lelei te u lava ʻo maʻu ha ngaahi vā fetuʻutaki ʻi he uōtí.”
Pea naʻe fakalotolahiʻi ai ia ke foki ki he lotú he Sāpate hono hokó.
Ko ha Lēsoni ʻi he Angaʻofá
ʻI he uike hono hokó, naʻe fetaulaki ai ʻa ʻAmelia mo ʻInitia, ko e ʻofefine ʻo e pīsopé. Naʻá ne pehē mai, “Mālō e lelei, ne u sio atu kiate koe he ʻaho ʻe tahá. Ko hoku hingoá ko ʻInitia. ʻE lelei ʻaupito ke ta maheni mo koe.”
ʻI he ʻaho ko iá, naʻe talanoa e kalasí ki ha meʻa ne teʻeki ako ʻe ʻAmelia. Naʻe ʻunuʻunu atu ʻa ʻInitia ʻo fehuʻi ange, “ʻOku mahino nai ʻeni kiate koe?” Naʻe talaange ʻe ʻAmelia, “ʻIkai.” Ko ia naʻe tokoni ʻa ʻInitia ke mahino kiate ia ʻa e lēsoní.
ʻOku pehē ʻe ʻAmelia, “ʻOku ʻikai ke u manatuʻi e lēsoní he taimí ni, ka ʻoku ou manatuʻi ʻa ʻene fakatokangaʻi ʻeku fiemaʻu tokoní. Naʻe hoko ʻene angaʻofa mai kiate aú ko e lēsoni mahuʻinga taha naʻá ku ako he ʻaho ko iá.”
Naʻe akoʻi ʻe ʻInitia ʻa ʻAmelia ʻi he meʻa kotoa pē naʻá ne lavá fekauʻaki mo e lotú, pea naʻá ne tokoni kia ʻAmelia ke maʻu ha tali ki heʻene ngaahi fehuʻí. Lolotonga e ngaahi fuofua uike mo e ngaahi māhina ko iá, naʻá ne hoko ko ha fakahinohino kia ʻAmelia. ʻOku manatuʻi ʻe ʻAmelia, “Naʻá ne ʻiloʻi maʻu pē ʻa e meʻa ke lea ʻakí. Ko e meʻa fakalaumālie taha ia kuó u aʻusia ʻi ha ngaahi taʻu lahi.”
ʻI he feinga ʻa ʻAmelia ke feohi mo e kakai foʻoú, naʻe fakapapauʻi ange ʻe ʻInitia he ʻikai fakamaauʻi ia ʻe ha taha ʻi heʻene foʻou ʻi he lotú. ʻOku pehē ʻe ʻAmelia, “Naʻá ne ʻai ke u ongoʻi fiemālie ʻi heʻeku foʻoú.”
Naʻe ʻai ʻe ʻAmelia ke ʻilo ʻe ʻInitia ha kiʻi meʻa siʻi fekauʻaki mo ʻene ngaahi faingataʻaʻia ʻi hono tūkunga fakafāmilí, kau ai ʻene nofo mo ha tamai naʻá ne ngaohikovia ia kimuʻa pea vete ʻene ongomātuʻá. ʻOku pehē ʻe ʻAmelia, “Ko ʻInitia ʻa e fuofua tokotaha naʻá ku falala ki ai ʻi he ʻātakai ko iá. ʻOku ou ʻilo ʻoku fakahoko ʻe he Tamai Hēvaní ha ngaahi mana, koeʻuhí ko e taimi kotoa pē ne u talanoa ai mo ʻInitiá, naʻá ne lea ʻaki maʻu pē ha meʻa naʻe tokoni. Naʻá ne fakapapauʻi naʻe ʻikai ke u teitei ongoʻi tuenoa.”
ʻOku pehē ʻe ʻAmelia naʻe fakapapauʻi ange ʻe ʻInitia ʻe lava ke ne toe foki ki he meʻa naʻe finangalo ki ai ʻa e Tamai Hēvaní maʻaná. ʻOku pehē ʻe ʻAmelia, “ʻOku ʻikai ke u tui ne u mei lava ʻo foki mai ki he lotú ka ne ʻikai ʻa ʻInitia pe ko Pīsope Uatisi.”
Naʻe tokoni ʻa ʻInitia (toʻohemá) kia ʻAmelia ke ne ongoʻi ʻoku talitali lelei ia ki he lotú.
ʻOku fekauʻaki ia mo e Tokoní
Naʻe tokoni e feohi fakakaungāmeʻa ʻa ʻAmelia mo ʻInitiá ke ofi ange ʻa ʻAmelia ki he Fakamoʻuí. ʻOku pehē ʻe ʻAmelia, “ʻI heʻeku foki mai ki he lotú, naʻe ʻikai ke u fakapapauʻi e founga ke maʻu ai ha vā fetuʻutaki mo Sīsū Kalaisí. Naʻe tokoni ʻa ʻInitia ke mahino kiate au neongo naʻe ʻikai ke u lava ʻo mamata ki he Fakamoʻuí, ka naʻá ku kei lava pē ʻo ongoʻi ʻEne ʻofá, ivi tākiekiná, mo e ngaahi maná ʻi heʻeku moʻuí.” “Naʻá ne fakahaaʻi mai ʻa e ʻofa faka-Kalaisí. ʻOku ou fie tokoni he taimí ni ki ha taha ʻo hangē ko hono tokoniʻi au ʻe ʻInitiá. ʻOku ou fie ʻi ai maʻa ha taha ʻi he taimi ʻokú ne fiemaʻu ai aú.”
ʻOku tui ʻa ʻAmelia ʻoku ope atu e ngāue fakaetauhí ʻi hono fakahoko pē ʻo ha ngāué—ʻoku fekauʻaki ia mo e tokoni ki he kakaí. ʻOku pehē ʻe ʻAmelia, “Ko e vakai ia ki ha taha ʻi ha tūkunga faingataʻa, pea ʻikai tatali ke nau kole tokoni, kae ʻi ai ʻi he taimi ʻe ʻaonga ai ki ha taha kehé.” “Naʻe ngāue fakaetauhi mai ʻa ʻInitia mo Pīsope Uatisi kiate au ʻi he taimi naʻá ku hohaʻa ai he ʻikai ke u maheni mo ha tahá. ʻI he taimi ní, ʻoku ou fiefia ʻaupito naʻe tokoni mai ha tokotaha.”
ʻOku fiemaʻu ʻe ʻAmelia e toʻu tupu kehé ke nau ʻiloʻi ʻoku ʻofa ʻa e Tamai Hēvaní mo Sīsū Kalaisi ʻiate kinautolu, naʻa mo e taimi ʻoku nau ongoʻi ai ʻoku hala e feituʻu ʻoku nau ʻi aí. ʻOkú ne pehē, “Kapau ʻokú ke ongoʻi ʻoku ʻikai ke ke feʻunga, pe ʻoku ʻikai totonu ke ke ʻi heni ʻi he Siasí ni, manatuʻi ko e feituʻu foki ʻeni maʻau.
Pea te ke lava maʻu pē ʻo foki mai.”