Ngaahi Leʻo ʻo e Toʻu Tupú

Vahevahé mo e Tokoní

Fakahoko ha Lelei ʻi Kaná

Te ke aʻusia heni ʻi Kana ʻa e anga fakafonua leleí, meʻakai leleí, pea mahuʻinga tahá, ko e feohi fakakaungāmeʻa lelei mo e niʻihi kehé. Ko e tokolahi hoku ngaahi kaungāmeʻá ko e kau mēmipa ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní, pea naʻe papitaiso hoku kaungāmeʻa mamaé ʻi he ngaahi taʻu siʻi pē kuohilí. ʻOkú ne saiʻia ke fakakata mo talamai, “Ko e hā naʻe ʻikai ke ke talamai ai ke vave ange ʻeku kau ki he Siasí?” Pea ʻokú ne moʻoni! Ko ia ʻi he taimi ní, ʻoku ou fai ha meʻa lahi ange ke ʻomi e kakaí ki he lotú, tokoniʻi kinautolu ke kau ki he ngaahi ʻekitivitií, mo tokoni ke nau vakai ki hono taumuʻá.

ʻI heʻeku kalasi ʻi he akó, ko e ongo mēmipa kehe pē ʻe toko ua ʻo e Siasí. ʻOku hangē ʻa e meʻa ʻoku tau tui ki aí ko ha meʻa foʻou ʻaupito ki ha niʻihi ʻo hoku kaungāakó. ʻOku nau faʻa ʻeke mai ha ngaahi fehuʻi fekauʻaki mo e ongoongoleleí, pea ʻoku faingataʻa ke tali ha niʻihi. Kapau ʻoku ʻikai ke mau ʻiloʻi e tali ki ha fehuʻi, ʻoku mau aleaʻi fakataha ia pea fekumi ki ha fakahinohino mei homau kau taki ʻi he Siasí. ʻI heʻemau ʻilo pē ʻa e founga ke tali ʻakí, ʻoku mau talaange ki homau kaungāakó ʻa e meʻa ʻoku mau ʻilo ʻoku moʻoní. Kuó u fakaafeʻi foki ha niʻihi ʻo kinautolu ke nau omi ʻo mamata ʻi he founga ʻo ʻetau lotú, pea kuo nau maʻu ha ngaahi ongo lelei fekauʻaki mo e houalotu sākalamēnití.

Kuó u ʻiloʻi foki ko e lahi ange e lelei ʻokú ke faí, ko e ofi ange ia ʻa e Laumālie Māʻoniʻoní kiate koé. ʻOku ou faʻa tokoni ki he kakai ʻi he halá kapau ʻoku lahi ʻenau meʻa ʻoku toʻó. Ne u fakatokangaʻi kimuí ni ha fefine naʻe hili ha ʻū meʻa hono ʻulú. Naʻe ʻikai ke u ʻiloʻi ʻa e fefiné pe ko ha meʻa fekauʻaki mo ia, ka naʻá ku lue atu ʻo ʻeke ange pe te u lava ʻo tokoni. Naʻá ne tali, peá u toʻo mai leva ha niʻihi ʻo e ʻū meʻa naʻá ne toʻó.

ʻI heʻema aʻu atu ki hono ʻapí, ne u ʻiloʻi ai ko ha fefine taʻo mā ia. ʻI he taimi ko iá, naʻe ʻikai ke u ngāue, pea naʻá ku fiemaʻu ha founga ke fakahū ai ha paʻanga lahi ange. Naʻe ʻikai ke ne ʻilo ʻe ia naʻá ku fiemaʻu ngāue. Naʻe fakafokifā ʻene talamai naʻá ne fiemaʻu ha taha ke tokoni ange heʻene taʻo maá kae totongi. Naʻá ne ʻomai ha ngaahi taimi pau ʻe feʻunga tonu mo ʻeku taimi-tēpile femoʻuekiná. ʻOku ʻikai ke u tui naʻe tupukoso pē ʻene hokó ka ko ha tāpuaki ia mei he ʻOtuá ʻi hono tokoniʻi e niʻihi kehé. Kiate au, ko e folofola mai ʻeni ʻa e Tamai Hēvaní, “Siʻoku foha, ʻoku ou ʻafioʻi e lelei kuó ke fakahokó!”

ʻOku ou fakamoʻoni ko Sīsū Kalaisi ʻoku tukutaha ki ai ʻa e tokangá pea ko Ia ʻa e halá. ʻOku totonu ke tau tauhi kiate Ia mo kinautolu ʻoku tau feohí.

Sōsiua M., taʻu 17, Vahefonua ʻAkalā Lahi Angé, Kana

Manako ke laukonga mo vaʻinga sipoti, tautautefito ki he soká.

Ko ha Tāpuaki Taʻu Foʻou ʻi ʻĀsenitina

Naʻá ku fakaafeʻi ha kaungāmeʻa ki ha paati Fakaʻosi Taʻu ʻi ʻapisiasi. ʻOku ʻikai ko ha mēmipa ia ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní ka ʻoku lelei pē ʻene fakakaukau ki aí. ʻI heʻene aʻu maí, naʻá ne konā. Naʻe kamata ke ne hohaʻa peá ne talanoa mai fekauʻaki mo e ngaahi faingataʻa naʻá ne fekuki mo ia mo hono fāmilí. Naʻá ku ʻiloʻi naʻe fiemaʻu ke u tokoni ki ai.

Naʻá ku ʻave ia ki heʻeku tangataʻeikí. Naʻá ku kole ange ke ne foaki ange hano tāpuaki lakanga fakataulaʻeiki. Naʻá ku fakamatala ange ha kiʻi meʻa siʻi fekauʻaki mo e ngaahi tāpuakí, pea naʻá ne talamai te ne fiemaʻu ia. Hili e tāpuakí, naʻe tuku ʻene tangí pea naʻá ne malimali foki!

Hili e aʻusia ko ʻení, naʻá ne fai mai ha ngaahi fehuʻi fekauʻaki mo e lakanga fakataulaʻeikí. Naʻá ku vahevahe fakataha mo ha kaungāmeʻa ʻe taha ʻa e founga kuo tāpuekina ai kimaua mo homa fāmilí ʻe he ongoongoleleí.

Naʻá ku ongoʻi fiefia ʻi hono vahevahe e ongoongoleleí mo hoku kaungāmeʻá. Kiate au, ʻoku feinga ha ākonga ʻa Sīsū Kalaisi ke hangē ko Sīsū Kalaisí mo fai ʻa e ngaahi meʻa naʻá Ne faí, tautautefito ʻi he taimi ʻoku tau fakatokangaʻi ai ʻoku foua ha taha ha taimi faingataʻa.

Hōsē J., taʻu 14, Pueno ʻAile, ʻĀsenitina

Manako he tā pianó, heka pasikalá, hivá, feimeʻatokoní, ʻātí, mo e mūsiká.

Lotu ʻa e Palesiteni Fakakalasí

Ko ha ʻaho momoko ia ʻi Sānuali naʻe kole mai ai ke u hoko ko e palesiteni fakakalasi ʻo e Kau Finemuí. Ko hoku fuofua taʻu ia ʻi he polokalama ʻa e Kau Finemuí, pea neongo naʻe ʻikai ke u ʻamanaki te u hoko ko e palesiteni ʻo e kalasí, ka naʻá ku fiefia lahi. Naʻá ku malimali mo kamo pē.

Naʻe talamai leva ke u kamata lotua pe ko hai ʻoku totonu ke hoko ko hoku ongo tokoní.

Naʻe vave ʻa e liliu ʻeku fiefiá ki he loto-hohaʻá. Naʻá ku hohaʻa naʻa te u fili ha kakai hala, pe toe kovi angé, he ʻikai ke u lava ʻo fai ha fili!

Kimui ange ʻi he pō ko iá, naʻá ku talaange ki heʻeku faʻeé naʻá ku hohaʻa naʻa ʻikai ke u lava ʻo fai ha fili. Naʻá ne talamai ke u ʻalu ki hoku lokí, fai ha lotu, pea lau ha ngaahi veesi mei he Tohi ʻa Molomoná.

Naʻá ku ʻalu ki hoku lokí, naʻá ku kei hohaʻa pē. Naʻá ku lotu, ʻo kole ki he Tamai Hēvaní ke tokoni mai ke u fai ʻa e fili ʻoku totonú. Naʻá ku fakaava leva ʻa e folofolá ki he feituʻu ne u ngata aí ʻo lau ʻa e veesi ʻuluaki naʻá ku sio ki aí. ʻOku pehē ai: “Pea kuo folofola ʻa Kalaisi: Kapau te mou tui kiate au te mou maʻu ʻa e mālohi ke fai ʻa e meʻa kotoa pē ʻoku totonu ke fai ʻiate aú” (Molonai 7:33).

ʻI he ʻosi pē ʻeku lau e veesi ko iá, naʻá ku ʻilo kuo tali ʻe he Tamai Hēvaní ʻeku lotú. Naʻá Ne ʻafioʻi au pea naʻá Ne fie tokoniʻi au. Ko e meʻa pē naʻe fiemaʻu ke u faí ko ʻeku tui kiate Ia, pea te Ne tokoniʻi au ke u ʻilo ʻa e meʻa ke faí.

ʻOku ou ʻiloʻi ʻoku ʻafioʻi kitautolu ʻe he ʻOtuá pea te Ne tokoniʻi kitautolu kapau ʻoku tau loto-fiemālie ke tui kiate Ia.

ʻEmeline K., taʻu 14, ʻIutā, USA

Manako he faitohí, ʻātí, mo e mūsiká, kau ai hono faʻu ha ngaahi hiva ki he pianó mo e kītaá.