Nonga hili ʻa e Mamateá
Hili ʻeku mamatea ʻi ha fakatuʻutāmaki, naʻá ku kei fakakaukau pē, “Ko e hā ʻoku hoko ai ʻeni kiate aú?” Ka kuo tokoni hono fakahoko ha ngaahi meʻa siʻi ke u ongoʻi nonga.
Maʻu e taá ʻi he angalelei ʻa e fāmili Tuvelá
ʻI he 2022, naʻá ku heka ai mo hoku ngaahi kaungāmeʻá ʻi ha kiʻi meʻalele ʻi he toafá pea mau mafuli ai. Naʻá ku ake hake ʻoku ou tokoto ʻi he kelekelé, kāpui ʻi he totó. Naʻe ʻikai ke u lava ʻo ongoʻi ha meʻa. Ne ʻikai fuoloa kuo haʻu ha helikopeta ke ʻave au ki ha falemahaki. Ne u ʻiloʻi ai naʻe fasi hoku kiá ʻi ha feituʻu ʻe ua pea naʻe mamatea mei hoku umá ʻo fai hifo ki lalo.
ʻI he kamatá, naʻá ne ʻahiʻahiʻi moʻoni ʻeku fakamoʻoní. Naʻá ku fakakaukau maʻu pē, “Ko e hā ʻoku hoko mai ai kiate aú?” Naʻe ʻikai mahino kiate au e ʻuhinga naʻe hao kotoa ai hoku ngaahi kaungāmeʻá mei he fakatuʻutāmakí kae ʻikai ke u kau aí. Naʻá ku taʻu 16 mo hoko ko ha tokotaha palāleli mo fakakaekae, pea naʻe ʻikai ko e meʻa ʻeni naʻá ku palani ki heʻeku moʻuí.
Fili ʻa e Houngaʻiá
ʻI ha ʻaho ʻe taha hili e fakatuʻutāmakí, ne u taʻefiemālie ʻaupito, pea naʻe ʻikai ke u fie mavahe mei he mohengá ʻo ʻalu ki he fakamālohisinó. Ka naʻá ku ʻalu, peá u sio ai ki ha tangata naʻe mamatea pea naʻe vela. Naʻá ne malimali mo talanoa ki he kau ngāué kotoa, peá u fakakaukau, “Kapau ʻokú ne lavaʻi, te u lava foki mo au.”
Hili e aʻusia ko iá, ne u lava ʻo tokanga lahi ange ki he loto-houngaʻiá. Naʻá ku fakatokangaʻi ʻeku monūʻiá, peá u lava ʻo kiʻi tali ange hoku tūkungá. Naʻá ku fakatokangaʻi kuo pau ke u fili ke u ʻā ʻo tokanga taha ki he ngaahi meʻa leleí, hangē ko hoku fāmili fakaofó pea mo e ongoongolelei ʻo Sīsū Kalaisí.
Sio fakalaka atu he Ngaahi Fakahingoá
Kuó u ʻilo ʻoku tokoniʻi au ʻi hono tokoniʻi e niʻihi kehé. ʻOku ou manatuʻi ʻeku sio ʻi he fakamālohisinó ki ha niʻihi toʻu tupu naʻe mamatea. Naʻá ku ʻalu ʻo talanoa kiate kinautolu, koeʻuhí naʻá ku saiʻia kapau naʻe ʻi ai ha taha ke ne fakahoko mai ia kiate au.
ʻOku tokolahi fau ha kakai ʻoku nau foua ha ngaahi meʻa faingataʻa. ʻI he fakamālohisinó, ʻokú ke mamata ai ki he ngaahi ʻahiʻahi kotoa ko ʻení. ʻI he akoʻanga māʻolungá, ʻoku foua foki ʻe he taha kotoa ha ngaahi meʻa lahi, ka ʻoku ʻikai ʻiloʻi moʻoni ia ʻe ha taha. ʻOku pulipulia ange ia. ʻOku ʻi ai ha ngaahi fakahingoa hangē ko e “tokotaha vaʻinga soka” mo e “tokotaha fakakaekae.” Ko e taimi ʻe niʻihi ʻoku fakailifia ke liʻaki e ngaahi fakahingoá pea kumi ha ngaahi kaungāmeʻa foʻou. ʻOku ou saiʻia ʻi he fiefiá mo e punopuná, pea naʻá ku fakakaukau maʻu pē naʻe ʻiloʻi au ʻi he ngaahi meʻa ko iá.
Ka naʻá ku fakatokangaʻi ko e ngaahi hingoa ko iá ʻoku ʻikai ko e meʻa mahuʻinga taha ia ʻi he moʻuí. Ko e fōtunga ʻo e kakaí, ko ʻenau kehe meiate koé—ʻoku ʻikai loko mahuʻinga ʻa e ngaahi meʻa ko iá. Te ke lava ʻo tokoni ki he tokotaha kotoa pē pea tokanga taha ʻi hono tokoniʻi kinautolú. Pea ko e niʻihi hoku ngaahi kaungāmeʻa lelei taha he taimi ní ko ha kakai ia naʻe ʻikai ke u teitei fakakaukau te u kaungāmeʻa mo kinautolu kimuʻa.
Falala ki he Fakamoʻuí
Hili ha vahaʻataimi ʻi ha senitā fakaakeake, kuó u lava ʻo ueʻi hoku ongo nimá mo ongoʻi hoku ongo vaʻé. ʻOku hokohoko atu ʻeku fakalakalaka he ʻaho kotoa pē.
ʻOku ʻikai ke u ʻilo pe ʻe fēfē hoku kahaʻú, pea ka ne taʻeʻoua ʻa e ʻEikí, te u manavahē ʻaupito. Ka naʻá ku toki maʻu hoku tāpuaki fakapēteliaké, pea ʻoku tokoni ia ke u ongoʻi fiemālie ko e hā pē meʻa ʻe hokó, te u SAI PĒ. Kuo tokoni foki hono lau e folofolá mo fai ʻeku ngaahi lotú ʻi he ʻaho kotoa pē ke u ikunaʻi ha ngaahi meʻa lahi. Ka ne taʻeʻoua ʻa Sīsū Kalaisi, ʻoku ou ʻiloʻi ʻe toe kovi ange hoku ngaahi faingataʻaʻiá. ʻOkú Ne tokoniʻi au ke u ongoʻi nonga neongo e taimi faingataʻá.
ʻOku nofo ʻa e tokotaha naʻá ne faʻú ʻi ʻIutā, USA.